"ව්‍යවස්ථාදායක ඒකාධිපතිත්වය පරදමු" යන තේමාව යටතේ සංවිධානය කර තිබූ මාධ්‍ය හමුවක් අමතමින් හිටපු ජනාධිපති සිරිසේන මේ බව ප්‍රකාශ කළේය. දේශපාලන පක්ෂ නායකයින්, හිටපු අමාත්‍යවරුන් සහ පාක්ෂිකයින් රැසකගේ සහභාගීත්වයෙන් මෙම මාධ්‍ය හමුව පැවැත්විණි.
සිය දේශනය ආරම්භ කරමින්, හිටපු ජනාධිපති රනිල් වික්‍රමසිංහ අත්අඩංගුවට ගැනීම සම්බන්ධයෙන් සිය බලවත් කණගාටුව පළ කළ අතර "හිටපු ජනාධිපති රනිල් වික්‍රමසිංහ මැතිතුමා අත්අඩංගුවට ගැනීම පිළිබඳව මුලින්ම මගේ දැඩි කණගාටුව, ඒ වගේම ඒ පිළිබඳව අපේ සිත්වල ඇතිවෙලා තිබෙන වේදනාව ප්‍රකාශ කරනවා," යැයි පැවසීය.
ශ්‍රී ලංකාව ජාත්‍යන්තර දේශපාලනය සමඟ ගමන් කිරීමේදී ප්‍රජාතන්ත්‍රවාදී වටිනාකම් කෙමෙන් කෙමෙන් වියැකී යන ස්වභාවයක් දක්නට ලැබෙන බව පෙන්වා දෙමින් "අද ප්‍රජාතන්ත්‍රවාදය කියන එක පිළිබඳව ප්‍රශ්නාර්ථයක් ඇතිවෙලා තිබෙනවා දේශපාලනය දන්න අයට. ඒ මොකද, ප්‍රජාතන්ත්‍රවාදී සමාජයක තිබෙන ගති ලක්ෂණ කෙමෙන් කෙමෙන් මැකී යන ආකාරයක් අපිට දකින්න පුළුවන්," යැයි ඔහු වැඩිදුරටත් කියා සිටියේය.
1947 නිදහසින් පසු ශ්‍රී ලංකාව තුළ ප්‍රජාතන්ත්‍රවාදය ශක්තිමත් වූ බවත්, විශේෂයෙන් තමන්ගේ පාලන සමයේ ගෙන ආ 19 වන ආණ්ඩුක්‍රම ව්‍යවස්ථා සංශෝධනය මගින් එය තවදුරටත් තහවුරු වූ බවත් ඔහු සඳහන් කළේය.
වත්මන් තත්ත්වය "ප්‍රජාතන්ත්‍රවාදය වැළලීමේ මිනී පෙට්ටියේ ලෑලි යතු ගෑමක්" බවත් රටේ නිදහස හා ප්‍රජාතන්ත්‍රවාදය වෙනුවෙන් පෙනී සිටීම සියලු පුරවැසියන්ගේ, මාධ්‍ය ආයතනවල, ආගමික නායකයින්ගේ සහ රාජ්‍ය සේවකයින්ගේ යුතුකමක් හා වගකීමක් බව අවධාරණය කළේය.
එබැවින්, පවතින දේශපාලන ප්‍රතිපත්ති හා පක්ෂ භේද පසෙකලා, පොදු මහජනතාවගේ නිදහස හා ප්‍රජාතන්ත්‍රවාදය සුරැකීම සඳහා එක්සත්ව, ඒකාබද්ධ මතයක සිට කටයුතු කරන ලෙස සියලු දෙනාගෙන් ඉල්ලා සිටින බවද හිටපු ජනපතිවරයා මෙම මාධ්‍ය හමුවේදී වැඩිදුරටත් ප්‍රකාශ කර සිටියේය.
