එම ව්‍යාපාරය මෙලෙස සඳහන් කරන්නේ එහි මහ ලේකම් සුනිල් ජයසේකර ගේ අත්සනින් යුත් මාධ්‍ය නිවේදනයක් නිකුත් කරමිනි.
එම මාධ්‍ය නිවේදනයේ සඳහන් වන ආකාරයට රටේ රාජ්‍ය නායකයාට පවා දණ්ඩ මුක්තිය හිමි නොවිය යුතු බව පිළිගන්නා සහ ඒ වෙනුවෙන් පෙනී සිටි සිවිල් සමාජ ව්‍යාපාරයක් ලෙස ඔවුන් එය රටේ යහපත සඳහා තහවුරු කළ යුතුව ඇති දේශපාලන සංස්කෘතියක් බව අවධාරණය කර ඇත.
එමෙන් ම රටේ පුරවැසියකුගේ මූලික අයිතිවාසිකම් උල්ලංඝණය වී ඇතැයි සැලකෙන අවස්ථාවක ධුරය දරමින් සිටින අතරතුර පවා ජනාධිපතිවරයා හෝ ජනාධිපතිවරිය වග උත්තරකරුවකු කරමින් නඩු පැවරීමට හැකි වන ආකාරයට ආණ්ඩුක්‍රම ව්‍යවස්ථාවට 19 වන සංශෝධනය ගෙන ඒමට කැපවී කටයුතු කළ සමාජ ව්‍යාපාරයක කොටස්කරුවෙකු ලෙස ද නීතියේ ආධිපත්‍යය හා සමානාත්මතාවය වෙනුවෙන් එම ව්‍යාපාරය තුළ පවත්නා උනන්දුව හා පෙනී සිටීම යළි යළිත් තහවුරු කරන බව ද සදහන් කර ඇත.
තව ද, රාජ්‍ය නායකයා ද ඇතුළු සියලු පුරවැසියන් හට නීතිය සමාන ලෙස ක්‍රීයාත්මක වීම, නීතිය හා සාමය පිළිබඳ විශ්වාසය ගොඩ නැගීමට අත්‍යව්‍යශ්‍ය බවත්, ඒ පිළිබඳ විවාදයක් නොමැති බවත් එම ව්‍යාපාරය අවධාරණය කරයි.
එවන් පසුබිමක රනිල් වික්‍රමසිංහ හිටපු ජනාධිපතිවරයා අත් අඩංගුවට ගැනීම පිළිබඳව පොදු සමාජය තුළ මෙන්ම දේශපාලන සමාජය තුළ ගොඩනැගෙන සැක සංකා සැලකිල්ලට ගත යුත්තේ යහපත් රාජ්‍යකරණයක් සඳහා එය අත්‍යවශ්‍ය සාධකයක් වන බව ද සාධාරණ සමාජයක් සඳහා වන ජාතික ව්‍යාපාරය අවධාරණය කරයි.
මතු පළවන්නේ සාධාරණ සමාජයක් සඳහා වන ජාතික ව්‍යාපාරය නිකුත් කළ සම්පූර්ණ මාධ්‍ය නිවේදනය යි.
