ආධිපත්‍යය අභියෝගයට ලක් කරන්නට විවිධ පාර්ශ්ව කටයුතු කළ ද ස්වාධීන අපක්ෂපාතී අධිකරණය හමුවේ යුක්තිය සාධාරණත්වය ඉටු වූ බව විපක්ෂ නායක සජිත් ප්‍රේමදාස පැවසී ය.
ඔහු මෙම අදහස් පළ කළේ අද හිටපු ජනාධිපති රනිල් වික්‍රමසිංහ හට අධිකරණයෙන් ඇප ලැබීමෙන් පසු මාධ්‍ය වෙත අදහස් දක්වමිනි.
එම අවස්ථාවේ දී වැඩි දුරටත් අදහස් දැක්වූ විපක්ෂ නායකවරයා...
ස්වාධීන අපක්ෂපාතී අධිකරණය හමුවේ යුක්තිය සාධාරණත්වය ඉටු වුණා
''අද දවස ශ්‍රී ලාංකේය දේශපාලන ඉතිහාසයේ සහ ව්‍යවස්ථා ඉතිහාසයේ ඓතිහාසික දවසක්. රටේ ස්වාධීන අධිකරණය, යුක්තිය පසිඳලීමේ ක්‍රියාවලි, නීතියේ ආධිපත්‍යය අපක්ෂපාතීව විනිවිදභාවයෙන් යුක්තව සර්ව සාධාරණව ක්‍රියාත්මක වුණා. මේ අවස්ථාවේ අධිකරණ ක්‍රියාවලිය ක්‍රියාත්මක වෙන්න පෙර තීන්දු ගැන විවිධ අනාවැකි පළ කර, යුක්තිය පසිඳලීමේ ක්‍රියාවලිය නීතියෙ ආධිපත්‍යය අභියෝගයට ලක් කරන්න විවිධ පාර්ශ්ව කටයුතු කළත් ස්වාධීන අපක්ෂපාතී අධිකරණය හමුවේ යුක්තිය සාධාරණත්වය ඉටු වුණා.
මේ අවස්ථාවේ හිටපු ජනාධිපතිවරයා වෙනුවෙන් ඉදිරිපත් වූ නීතිඥයන්, එතුමාගේ නිදහස වෙනුවෙන් එකතු වූ සමගි ජන බලවේගය, සමගි ජන සන්ධානය ඇතුළු විපක්ෂ දේශපාලන පක්ෂවල සාමාජිකයන්ට මගේ ස්තූතිය පුද කරනවා.
අද ප්‍රජාතන්ත්‍රවාදය මෙන් ම මානව හා මූලික අයිතිය ජය ගත්තා
තර්ජනයට බිය නොවී, බලපෑම්වලට ආපස්සට නොයන ලෙස ඉල්ලා සිටිනවා. උත්තරීතර නීතිය තුළින් මේවා යටපත් වෙනවා. තමන් සිතන පතන ආකාරයට නිදහස්ව නිවහල්ව නීතිය තුළ: ප්‍රතිපත්ති, දේශපාලන පක්ෂ, ආගම්, සංස්කෘතින් ක්‍රියාත්මක කළ හැකියි. කාටවත් මේවා උදුරා ගන්න බැහැ.
