දෙවැනි අදියරේ කැනීම් කටයුතු සිදු කළ 36 වැනි දිනය වු අගෝස්තු 28 වැනි බ්‍රහස්පතින්දා හවස් යාමය වන විට චෙම්මනි සිත්තුපාත්ති සමූහ සුසානයෙන් තවත් පුද්ගලයන් අට දෙනකුට අයත් අස්ථි අලුතින් මතු කරගත් බව වින්දිතයන් වෙනුවෙන් පෙනී සිටින නීතිඥ වී එස් නිරංජන් පවසයි.
චෙම්මනි සමුහ සුසාන සංකීර්ණයෙන් මේ වන විට කුඩා දරුවන්ගේ ඇතුළු පුද්ගලයන් 164 දෙනකුට අයත් ඇටසැකිලි ගොඩ ගෙන තිබේ.
දෙවැනි අදියරේ කැනීම් කටයුතු දින 32 ක් පුරා සිදු කිරීමෙන් පසු කැනීම් කාර්ය මණ්ඩලයට විවේකයක් ලබා දීම සදහා අගෝස්තු 06 වැනිදා සිට විමර්ශන කටයුතු තාවකාලිකව නතර කරන විට සමූහ සුසානයේ කරන ලද කැනීම්වලින් කුඩා දරුවන්ගේ ඇතුළු පුද්ගලයන් 150 දෙනෙකුට අයත් ඇටසැකිලි ගොඩ ගෙන අධිකරණයට බාර දී තිබු තිබුනි.
දින දහ අටක විවේකයෙන් පසු සමූහ සුසාන සංකිර්ණයේ කැනීම් කටයුතු යළි ආරම්භ කර තිබුනේ අගෝස්තු 25 වැනිදායි.
වෝහාරික පුරාවිද්‍යාඥ මහාචාර්ය රාජ් සෝමදේවගේ හා අධිකරණ වෛද්‍ය සෙල්ලයියා ප්‍රනවන් ප්‍රමුඛ විමර්ශකයන් විසින් කැනීම් කටයුතු මෙහෙයවනු ලබයි.
