බුද්ධි ප්‍රධානියාගේ ෆෝන් එකේ තියෙන්නේ 'මිලේනියම් සිටි' වගේ පාවාදිය නොහැකි අතිසංවේදී තොරතුරුකරුවන්ගේ දත්ත
ඇමති නලින්ද සහ සිරිල් ගාමිණී පියතුමා මාධ්‍ය හරහා සලේට අයුතු බලපෑම් කරන බවට චෝදනා
රාජ්‍ය බුද්ධි සේවයේ (SIS) හිටපු අධ්‍යක්ෂ සුරේෂ් සලේ ගේ ජංගම දුරකථනයේ සහ පරිගණකයේ මුරපද (Passwords) රහස් පොලිසියට (CID) ලබා දෙන ලෙස කොළඹ කොටුව මහෙස්ත්‍රාත්වරයා නිකුත් කළ නියෝගය, සැකකරුවෙකුට තමන්ටම එරෙහිව සාක්ෂි සැපයීමට බල නොකිරීමේ විශ්වීය මූලධර්මයට පටහැනි බව පිවිතුරු හෙළ උරුමයේ නායක, නීතිඥ උදය ගම්මන්පිල ප්‍රකාශ කරයි.
කොළඹදී අද (02) පැවැති මාධ්‍ය හමුවකදී ඔහු අවධාරණය කළේ, අධිකරණ නියෝගයට ගරු කරන නමුත් ඊට එකඟ විය නොහැකි බැවින් සලේ මහතාගේ නීතිඥ මඩුල්ල විසින් මෙම නියෝගයට එරෙහිව ඉදිරියේදී ඉහළ අධිකරණයට අභියාචනයක් ඉදිරිපත් කිරීමට කටයුතු කරනු ඇති බවයි.
මුරපද ලබා නොදීමට බලපාන නීතිමය පදනම
අපරාධ නඩු විධාන සංග්‍රහයට සහ ජාත්‍යන්තරව පිළිගත් 'නිහඬව සිටීමේ අයිතියට' (Right to remain silent) අනුව, විමර්ශන සඳහා සහය දීමට සැකකරුවෙකුට බල කිරීමට පොලිසියට හෝ අධිකරණයට නීතිමය අයිතියක් නැත.
අයුතු බලපෑම් සිදුවීම:
නීතියට අනුව සැකකරුවෙකුට තර්ජනය කිරීම හෝ බලපෑම් කිරීම තහනම් වුවද, වත්මන් ආණ්ඩුවේ ඇමති වෛද්‍ය නලින්ද ජයතිස්ස සහ සිරිල් ගාමිණී පියතුමා ඇතුළු පාර්ශව රැසක් මාධ්‍ය හරහා සුරේෂ් සලේ ට අයුතු බලපෑම් (Inducement or Threat) එල්ල කරමින් සිටින බවට ගම්මන්පිල චෝදනා කළේය.
ජාතික ආරක්ෂාව සහ 'මිලේනියම් සිටි' තිත්ත අත්දැකීම
වසර 38ක් පුරා බුද්ධි නිලධාරියෙකු ලෙස සේවය කළ සලේ සතු සන්නිවේදන උපාංගවල (Cloud තාක්ෂණය ද ඇතුළුව) මෙරට ජාතික ආරක්ෂාවට සෘජුවම බලපාන අතිශය රහසිගත තොරතුරු තිබෙන බව ගම්මන්පිල පවසයි.
තොරතුරුකරුවන්ගේ රහස්‍යභාවය:
බුද්ධි නිලධාරියෙකු විශ්‍රාම ගියද තොරතුරුකරුවන්ගේ (Informants) සැබෑ අනන්‍යතාවයන් සහ සබඳතා පවතින්නේ අදාළ නිලධාරියා සතුව පමණක් වන අතර, ඒවා බාහිර පාර්ශව අතට පත්වීම එම පුද්ගලයන්ගේ ජීවිතවලට දැඩි තර්ජනයකි.
2002 මහා පාවාදීම:
මීට පෙර බුද්ධි තොරතුරු රහස් පොලිසිය අතට පත්වීමෙන් සිදු වූ විනාශයන් පිළිබඳව ඉතිහාසය සාක්ෂි දරන බව පැවසූ ගම්මන්පිල, 2002 වසරේ අතුරුගිරිය 'මිලේනියම් සිටි' ආරක්ෂිත නිවස පාවාදීම හේතුවෙන් මෙරට බුද්ධි අංශ ජාලය සීසීකඩ වී නිලධාරීන් සහ තොරතුරුකරුවන් 73 දෙනෙකු ඝාතනය වූ ඛේදවාචකය මෙහිදී සිහිපත් කළේය.
උපවාසය සහ ඉදිරි අධිකරණ ක්‍රියාවලිය
මෙම මර්දනකාරී ක්‍රියාවලියට එරෙහිව සුරේෂ් සලේ දින 25ක් පුරා ජලය සහ ආහාර නොමැතිව දැඩි අධිෂ්ඨානයෙන් යුතුව උපවාසයක නිරත වූ අතර, ඔහු රෝහල්ගත කෙරුණේ රහස් පොලිසියේ සහ වෛද්‍යවරුන්ගේ තීරණය මතය.
මේ වන විට ජනාධිපති නීතිඥ ශවේන්ද්‍ර සිල්වා සහ අසිත් සිරිවර්ධන ඇතුළු සලේ ගේ ප්‍රධාන නීතිඥ මඩුල්ල, කොටුව මහෙස්ත්‍රාත් අධිකරණයේ මෙම නියෝගය අභියෝගයට ලක් කරමින් ඉදිරි දින කිහිපය තුළ මහාධිකරණය හමුවේ ප්‍රතිශෝධන අභියාචනයක් ගොනු කිරීමට නීතිමය පියවර ගනිමින් සිටින බව උදය ගම්මන්පිල වැඩිදුරටත් කියා සිටියේය.
සබැඳි පුවත් :
සුරේෂ් සලේගේ ලැප්ටොප් සහ ෆෝන් මුරපද (Passwords) CIDයට දෙන්නැයි නියෝගයක්
