අධිකරණ ස්වාධීනත්වය කියන්නේ විනිසුරුවරුන්ට හිතුමතේ වැඩ කරන්න දීපු පෞද්ගලික ලයිසන් එකක් නෙමෙයි
ලියාපදිංචි වූ පළියට නීතිඥයන්ගේ වගකීම ඉවර නෑ - සදාචාරය බිඳ වැටුණොත් සමස්ත පද්ධතියම ඉවරයි
ස්වභාවික ආපදාවලින් සිදුවන විනාශයටත් වඩා වේගයෙන්, දුර්වල සහ දූෂිත අධිකරණ පද්ධතියක් හේතුවෙන් රටක් මුළුමනින්ම විනාශ වී යා හැකි බව අගවිනිසුරු ප්‍රීති පද්මන් සුරසේන අවධාරණය කරයි.
ශ්‍රී ලංකා විනිශ්චයකාරවරුන්ගේ ආයතනයේදී ඊයේ (02) පැවැති නව මහේස්ත්‍රාත්වරුන් පුහුණු කිරීමේ නිල උත්සවය අමතමින් අගවිනිසුරුවරයා කියා සිටියේ, අධිකරණ පද්ධතිය බිඳ වැටීමෙන් රටක් විනාශ වුවහොත් එය යථා තත්ත්වයට පත් කිරීමට කිසිදු ජාත්‍යන්තර ආධාරයකට හෝ සහායකට නොහැකි වන බවයි.
විනිසුරු බලයේ සැබෑ උරුමකරු ජනතාවයි
ආණ්ඩුක්‍රම ව්‍යවස්ථාව සහ ජනතා ස්වෛරීභාවය පිළිබඳව අදහස් දක්වමින් අගවිනිසුරුවරයා පෙන්වා දුන්නේ විධායකය, ව්‍යවස්ථාදායකය, ඡන්ද බලය මෙන්ම රටේ තුන්වන ප්‍රධාන බලය වන අධිකරණ බලය මුළුමනින්ම ජනතාව සතු වස්තුවක් බවයි.
බලයේ මූලාශ්‍රය:
"ඔබ ඔය නීතිමය බලය ඔබේ නිවසින් ගෙන එන්නේ නැත. අපි ඔබට බලය ලබා දෙන්නේ ද නැත. ඔබට බලය ලබා දෙන්නේ අධිකරණ සේවා කොමිෂන් සභාව (JSC) ද නොවේ. ඔබට බලය ලබා දෙන්නේ රටේ පොදු ජනතාවයි. එය ක්‍රියාත්මක කළ යුත්තේ ද ජනතාවගේම ප්‍රයෝජනය සඳහා පමණි," යැයි අගවිනිසුරුවරයා නව විනිසුරුවරුන්ට මතක් කර දුන්නේය.
ස්වාධීනත්වයේ සීමාව:
ඇතැම් පුද්ගලයන් විනිසුරුවරයකු වූ පමණින් තමන්ට කැමති ඕනෑම දෙයක් කළ හැකි යැයි වැරදියට වටහාගෙන ඇති බවත්, අධිකරණයේ ස්වාධීනත්වය පවතින්නේ විනිසුරුවරුන්ගේ පෞද්ගලික වාසියට නොව ජනතා විශ්වාසය ආරක්ෂා කිරීමටත් බවත් හෙතෙම සඳහන් කළේය.
නීති වෘත්තියේ සදාචාරය සහ වගකීම
අධිකරණ සංවිධාන පනතේ ප්‍රතිපාදන උපුටා දක්වමින් අගවිනිසුරු ප්‍රීති පද්මන් සුරසේන, නීතිඥවරුන්ගේ වෘත්තීය හැසිරීම් රටාව පිළිබඳව ද දැඩි ස්ථාවරයක් ප්‍රකාශ කළේය.
තේරීම් ප්‍රමිතිය:
නීති ක්ෂේත්‍රයට බඳවා ගත යුත්තේ යහපත් කීර්ති නාමයක්, නිපුණතාවයක් සහ නීතිමය දැනුමක් ඇති පුද්ගලයන් පමණක් බව ඔහු පෙන්වා දුන්නේය.
අඛණ්ඩ වගවීම:
නීතිඥවරයකු ලෙස ශ්‍රේෂ්ඨාධිකරණයේ ලියාපදිංචි වූ පළියට වගකීම අවසන් නොවන බවත්, වෘත්තීය ජීවිතය පුරාම එම සදාචාරාත්මක හැසිරීම් රටාව (Ethical Behaviour) දිගටම පවත්වාගෙන නොගියහොත් සමස්ත අධිකරණ පද්ධතියම බරපතළ ගැටලුවලට මුහුණ දෙන බවත් අගවිනිසුරුවරයා වැඩිදුරටත් අවධාරණය කළේය.
