උපරිමාධිකරණ විනිසුරුවන්ගේ විශ්‍රාම වයස වැඩි කරමින් අධිකරණයට ඇඟිලි ගැසීමේ ආණ්ඩුවේ උත්සාහය ප්‍රජාතන්ත්‍රවාදයේ මළගමයි
"බාල ගල් අඟුරු ඇමතියි ලේකම්වයි ගෙදර යැව්වේ, VAT සහ SSCL බදු පරාජය කළේ සිවිල් සමාජයේ සහ මාධ්‍යයේ ප්‍රබල අභියෝගය නිසයි"
වර්තමානයේ රට තුළ ප්‍රජාතන්ත්‍රවාදී වත්පිළිවෙත් බිඳවට්ටමින්, ඒක පක්ෂ පාලනයක් සහ ඒකාධිපති ආඥාදායකත්වයක් කරා යන ප්‍රවණතාවයට එරෙහිව දේශපාලන භේදයකින් තොරව පොදු ජනතාව, සිවිල් සංවිධාන සහ නිදහස් මාධ්‍ය එක් විය යුතු බව විපක්ෂ නායක සජිත් ප්‍රේමදාස ප්‍රකාශ කරයි.
කොළඹ ලක්ෂ්මන් කදිරගාමර් කේන්ද්‍රයේදී පැවැති "ශ්‍රී ලාංකේය සිවිල් සංවිධාන ඒකරාශී කිරීමේ හමුව" අමතමින් විපක්ෂ නායකවරයා අවධාරණය කළේ, මෙය මැතිවරණ සූදානමක් හෝ දේශපාලන සන්ධාන ගොඩනැඟීමක් සඳහා නොව සහභාගිත්ව රාජ්‍ය පාලනය සහ සංවරණ හා තුලන (Checks and Balances) ක්‍රියාවලිය සුරැකීම වෙනුවෙන් සංවිධානය කළ එකතුවක් බවයි.
දේශපාලන අවිශ්වාසය සහ සිවිල් සංවිධාන නීතිගත කිරීම
දේශපාලනඥයන් සහ සිවිල් සංවිධාන අතර පවතින ඓතිහාසික අවිශ්වාසය පිළිබඳව විපක්ෂ නායකවරයා මෙහිදී විවෘතව අදහස් දැක්වීය.
අමිහිරි අතීතයට සමුදීම:
අතීතයේදී සිවිල් සමාජ බලවේග උපයෝගී කරගෙන රාජ්‍ය බලය ලබාගත් පාලකයන්, පසුව මාදුළුවාවේ සෝභිත නාහිමියන් වැනි සිවිල් ක්‍රියාකාරීන් සම්පූර්ණයෙන්ම අමතක කර දැමූ බව හෙතෙම සිහිපත් කළේය. එම වැරැද්ද නිවැරදි කරමින්, ප්‍රජාතන්ත්‍රවාදය ශක්තිමත් කිරීම සඳහා වන "ජාතික මහජන ගිවිසුම" රටේ පාර්ලිමේන්තු පනත් සහ නීති පද්ධතිය හරහාම නෛතිකව බලාත්මක කළ යුතු බව සජිත් ප්‍රේමදාස යෝජනා කරයි.
සිවිල් බලපෑමේ වත්මන් ජයග්‍රහණ සහ බදු අරගලය
ව්‍යවස්ථාදායක සභාව තුළ සිවිල් සමාජ නියෝජිතයන් තිදෙනෙකු සිටීම හරහා විධායකයේ බලතල පාලනය කිරීමට හැකි වී ඇති බව පෙන්වා දුන් විපක්ෂ නායකවරයා, මෑතකදී සිවිල් සංවිධාන ලැබූ ප්‍රායෝගික ජයග්‍රහණ කිහිපයක් පෙන්වා දුන්නේය.
දූෂිත ගනුදෙනු පරාජය කිරීම:
පසුගිය මාස කිහිපය තුළ ප්‍රමිතියෙන් තොර බාල ගල් අඟුරු නැව් පිටින් මෙරටට ගෙන්වූ අවස්ථාවේදී, ඊට එරෙහිව සිවිල් සංවිධාන නැඟූ සෘජු දේශපාලන ප්‍රතිපත්තිය හේතුවෙන් අදාළ බලශක්ති ඇමතිවරයාට සහ ලේකම්වරයාට ධුර අතහැර ගෙදර යාමට සිදු වූ බව හෙතෙම අනාවරණය කළේය.
පීඩාකාරී බදු පනත් හකුලා ගැනීම:
මෑතකදී රජය විසින් අගය මත එකතු කළ බදු (VAT) සහ සමාජ ආරක්ෂණ දායකත්ව බදු (SSCL) පුළුල් කිරීමට ගත් උත්සාහය, පාර්ලිමේන්තුවේ 159ක බහුතර බලය තිබියදී පවා රජයට හකුලා ගැනීමට සිදු වූයේ ක්ෂුද්‍ර, කුඩා හා මධ්‍යම පරිමාණ ව්‍යාපාරිකයන් වෙනුවෙන් සිවිල් සමාජය සහ සමගි ජන බලවේගය එල්ල කළ දැවැන්ත හඬ සහ අභියෝගය නිසා බව විපක්ෂ නායකවරයා කියා සිටියේය.
අධිකරණ ස්වාධීනත්වය සහ මූලික අයිතිවාසිකම්වල නව අර්ථකථනය
උපරිමාධිකරණයේ පුරප්පාඩු පවතිද්දීම විනිසුරුවන්ගේ විශ්‍රාම යන වයස දීර්ඝ කිරීමට රජය දරන උත්සාහය අධිකරණයේ ස්වාධීනත්වයට සහ විශ්වාසනීයත්වයට එල්ල කරන මරු පහරක් බව ප්‍රේමදාස පවසයි.
ප්‍රජාතන්ත්‍රවාදයේ කුළුණු:
මෙය ජනතාව අපේක්ෂා කළ ක්‍රමයේ වෙනස (System Change) නොවන බවත්, මේ හරහා ප්‍රජාතන්ත්‍රවාදයේ මලගම සනිටුහන් වන බවත් පවසන විපක්ෂ නායකවරයා, සාම්ප්‍රදායික කුළුණු තුනට අමතරව නිදහස් මාධ්‍ය සහ සිවිල් සංවිධාන ප්‍රජාතන්ත්‍රවාදයේ සෙසු ප්‍රධාන කුළුණු විය යුතු බව ප්‍රකාශ කළේය.
දකුණු අප්‍රිකානු ආදර්ශය:
අන්ත වාමාංශික මෙන්ම අන්ත දක්ෂිණාංශික අදහස්වල පවතින යහපත් ලක්ෂණ එකතු කරමින් මූලික අයිතිවාසිකම් සඳහා නව නිර්වචනයක් දකුණු අප්‍රිකානු ආණ්ඩුක්‍රම ව්‍යවස්ථාවට අනුව සකස් විය යුතුය. ඒ අනුව අධ්‍යාපනය, සෞඛ්‍යය, අඩු පිරිවැය විදුලිය, ආර්ථික අයිතිය සහ බලශක්ති සුරක්ෂිතතාවය ද පුරවැසියන්ගේ මූලික අයිතිවාසිකම් (Fundamental Rights) බවට පත් කළ යුතු බව විපක්ෂ නායකවරයා වැඩිදුරටත් සඳහන් කළේය.
