2027 දී අයවැය හිඟය 4.5% දක්වා අඩු කර ගැනීමේ දැඩි ආර්ථික ඉලක්ක ප්‍රකාශයට පත් කෙරේ
වැඩිම මුදලක් රාජ්‍ය පරිපාලන සහ පළාත් සභාවලට; සෞඛ්‍ය, ප්‍රවාහන හා ආරක්ෂක වියදම් මෙලෙසයි
ජනාධිපති සහ මුදල් අමාත්‍ය අනුර කුමාර දිසානායක ගේ මඟපෙන්වීම යටතේ 2027 වසර සඳහා වන රාජ්‍ය අයවැය සකස් කිරීමේ මූලික කටයුතු භාණ්ඩාගාරය විසින් නිල වශයෙන් ආරම්භ කර ඇත. මෙවර සියලුම අමාත්‍යාංශ සඳහා දැඩි වියදම් සීමාවන් පනවා ඇති අතර, පවතින සීමිත මූල්‍ය ප්‍රතිපාදන කළමනාකරණය කරගැනීම සඳහා අලුත් ව්‍යාපෘති දැඩි පරීක්ෂාවකට ලක් කිරීමට රජය තීරණය කර තිබේ.
ඒ අනුව, ජාතික අයවැය චක්‍රලේඛ 02/2026 යටතේ නිකුත් කර ඇති නව උපදෙස් මාලාවට අනුව සෑම අමාත්‍යාංශයක්ම තමන්ට කලින් අනුමත කළ මූලික මූල්‍ය සීමාවන් ඇතුළත පමණක් දෛනික වියදම් පවත්වා ගත යුතුය.
මූල්‍ය ඉලක්ක සහ අමාත්‍යාංශවලට බෙදී යන මුදල්
රටේ මූල්‍ය ස්ථාවරත්වය රැකගැනීමේ අරමුණින් රජය 2027 වසර සඳහා දැඩි ආර්ථික ඉලක්ක කිහිපයක් හඳුන්වා දී ඇත. 2026 වසරේ 5.6%ක් ලෙස පැවැති අයවැය හිඟය 2027 වසර වන විට දළ දේශීය නිෂ්පාදිතයේ (GDP) ප්‍රතිශතයක් ලෙස 4.5% දක්වා අඩු කර ගැනීමට රජය සැලසුම් කරයි.
වැඩිම වෙන්කිරීම්:
නව අයවැය ඇස්තමේන්තුවලට අනුව වැඩිම මුදලක් වෙන් කර ඇත්තේ රාජ්‍ය පරිපාලන, පළාත් සභා සහ පළාත් පාලන අමාත්‍යාංශය වෙනුවෙනි. එය රුපියල් බිලියන 722කි.
අනෙකුත් අමාත්‍යාංශ:
මීට අමතරව පළාත් සභා සඳහා රුපියල් බිලියන 655ක් ද, සෞඛ්‍ය හා ජනමාධ්‍ය අමාත්‍යාංශයට රුපියල් බිලියන 595ක් ද, ප්‍රවාහන, මහාමාර්ග හා නාගරික සංවර්ධන අමාත්‍යාංශයට රුපියල් බිලියන 491ක් ද, මුදල් හා සැලසුම් අමාත්‍යාංශයට රුපියල් බිලියන 458.1ක් සහ ආරක්ෂක අමාත්‍යාංශයට රුපියල් බිලියන 447ක් ලෙස උපරිම සීමාවන් පනවා ඇත.
අලුත් ව්‍යාපෘතිවලට දැඩි නීති සහ ඩිජිටල්කරණය
පසුගිය කාල වකවානුවල මෙන් නොව, මෙවර අමාත්‍යාංශවලට ලැබෙන මූලික ප්‍රතිපාදනවලින් අලුත් සංවර්ධන ව්‍යාපෘති හෝ සේවාවන් ආරම්භ කිරීමට අවසර ලැබෙන්නේ නැත.
විශේෂ ඇගයීම:
ඕනෑම අලුත් ව්‍යාපෘති යෝජනාවක් වෙන වෙනම ඉදිරිපත් කළ යුතු අතර, ඒවා පොදු මූල්‍ය කළමනාකරණ පනතට අනුව පිහිටුවා ඇති 'රාජ්‍ය ආයෝජන කමිටුව' මඟින් දැඩි ලෙස පරීක්ෂාවට ලක් කෙරේ. ආර්ථික වර්ධනය, අපනයන ඉහළ නැංවීම, ඩිජිටල් පරිවර්තනය සහ දේශගුණික විපර්යාසයන්ට ඔරොත්තු දීමේ හැකියාව පවතින ව්‍යාපෘතිවලට පමණක් මෙහිදී ප්‍රමුඛතාවය හිමි වේ.
අනිවාර්ය වියදම්:
වැටුප්, විශ්‍රාම වැටුප්, නිවාස කුලී, බදු සහ ජල-විදුලි බිල්පත් වැනි අනිවාර්යයෙන්ම ගෙවිය යුතු දෑ සඳහා මුලින්ම මුදල් වෙන් කළ යුතු අතර, වසර මැදදී අතිරේක ප්‍රතිපාදන ඉල්ලීම සීමා කළ යුතු බව භාණ්ඩාගාරය දන්වා ඇත.
ඩිජිටල් ක්‍රමවේදය:
රජයේ මූල්‍ය කටයුතු ඩිජිටල්කරණය කිරීමේ පියවරක් ලෙස, සියලුම අමාත්‍යාංශ සහ රාජ්‍ය ආයතන තමන්ගේ අයවැය ඇස්තමේන්තු භාණ්ඩාගාර ඒකාබද්ධ තොරතුරු පද්ධතිය (ITMIS) හරහාම ඉදිරිපත් කිරීම අනිවාර්ය කර තිබේ.
සියලුම අමාත්‍යාංශ සහ රජයේ ආයතන තමන්ගේ 2027 අයවැය ඇස්තමේන්තු ලේඛන එළඹෙන ජූලි 31 වැනිදාට පෙර ජාතික අයවැය දෙපාර්තමේන්තුව වෙත භාර දිය යුතුය.
මුලාශ්‍රය :
2027 Budget Call goes out
