නිහඬ සිනමාවේ සිට හොලිවුඩ් පරිණාමය දක්වා විවෘත සිනමා දැක්මක් තානාපති කාර්යාල පරිශ්‍රයේදී
ජපානයේ සිට පැමිණි විශේෂ හමුදා සංගීත කණ්ඩායමක ප්‍රසංගයක් සහ ගිනිකෙළි සංදර්ශනයක් සමඟ උත්සවය නිමවෙයි
ඇමරිකා එක්සත් ජනපදයේ 250 වැනි නිදහස් දින සංවත්සරය (Freedom 250) නිමිත්තෙන් කොළඹ පිහිටි ඇමරිකානු තානාපති කාර්යාලය සංවිධානය කළ විශේෂ සැමරුම් උත්සවයක් ඉකුත් බ්‍රහස්පතින්දා පැවැත්විණි. ප්‍රජාතන්ත්‍රවාදය, නිදහස සහ අදහස් ප්‍රකාශ කිරීමේ අයිතිය අගය කරනු වස් මෙවර උත්සවයේ ප්‍රධාන තේමාව ලෙස ඇමරිකානු සිනමාව යොදාගෙන තිබීම විශේෂත්වයකි.
මෙම අවස්ථාවට ප්‍රධාන අමුත්තා ලෙස සෞඛ්‍ය හා ජනමාධ්‍ය අමාත්‍ය ආචාර්ය නලින්ද ජයතිස්ස සහභාගී වූ අතර රජයේ උසස් නිලධාරීන්, ව්‍යාපාරික නායකයින් සහ විදේශීය රාජ්‍ය තාන්ත්‍රිකයින් රැසක් ද ඊට එක්ව සිටියහ.
සිනමාවෙන් කියැවුණු නිදහස සහ උත්සවයේ හැඩය
ඇමරිකානු ඉතිහාසය හැඩගැස්වීමට එරට සිනමාවෙන් ලැබුණු දායකත්වය සහ විවිධ සංස්කෘතීන් අතර විවෘත අදහස් හුවමාරුවට සිනමා මාධ්‍ය භාවිත වූ ආකාරය පිළිබඳව ඇමරිකානු භාරකාර නිලධාරිනී (Chargé d’Affaires) ජේන් හවෙල් මෙහිදී අදහස් දැක්වීය.
සිනමා පරිශ්‍රය:
1776 ජූලි 4 වන දින ඇමරිකානු නිදහස් ප්‍රකාශනයට අත්සන් තැබීම සිහිපත් කරමින් තානාපති කාර්යාල භූමිය විවෘත සිනමා ශාලාවක ස්වරූපයෙන් සකසා තිබූ අතර, එහිදී නිහඬ සිනමා යුගයේ සිට නූතන හොලිවුඩ් සිනමාව දක්වා වූ ගමන්මඟ විදහාපාන සිනමා දර්ශන ඇතුළත් කර තිබුණි.
විශේෂාංග:
උත්සවය අවසානයේ ආකර්ෂණීය ගිනිකෙළි සංදර්ශනයක් පැවැත්වුණු අතර, ජපානයේ ඔකිනාවා හි පිහිටි ඇමරිකානු නාවික බලකායේ (III Marine Expeditionary Force Band) විශේෂ සංගීත කණ්ඩායම ඉදිරිපත් කළ සංගීත ප්‍රසංගයකින් ද උත්සවය වර්ණවත් විය. පැමිණ සිටි අමුත්තන් වෙනුවෙන් සාම්ප්‍රදායික ඇමරිකානු ආහාර පානවලින් යුත් විශේෂ භෝජන සංග්‍රහයක් ද සූදානම් කර තිබිණි.
මෙම 250 වැනි නිදහස් සැමරුම හරහා වෙළෙඳාම, ආයෝජන, අධ්‍යාපන සහ ආරක්ෂක ක්ෂේත්‍රයන්හි ශ්‍රී ලංකාව සහ ඇමරිකාව අතර පවතින දිගුකාලීන ද්විපාර්ශ්වික සබඳතා තවදුරටත් තහවුරු වන බව ඇමරිකානු තානාපති කාර්යාලය නිවේදනය කරයි.
