ආණ්ඩුවේ පටන්ගැන්ම නිදන් හැරීමෙන්; දිට්වා කුණාටුවෙන් 300ක් මැරෙනකන් සහ ඩෙංගුවලින් 50ක් මැරෙනකන් බලධාරීන් නිද්‍රාවක
මීගමුව බන්ධනාගාරයේ සිදු වූ මහා ඛේදවාචකයෙන් බන්ධනාගාර නිලධාරීන් හත්දෙනෙකු ඇතුළු රැඳවියන් 27 දෙනෙකු ජීවිතක්ෂයට පත්වී 150කට ආසන්න පිරිසක් රෝහල්ගතව සිටියදී, විෂයභාර අමාත්‍යවරයා "මම පසුව බලාගන්නම්" යැයි පවසමින් වගකීමෙන් මිදීමට උත්සාහ කරන බව ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ මහතා ඊයේ (07) පාර්ලිමේන්තුවේදී චෝදනා කළේය.
දේශපාලන ප්‍රකාශවලින් ඇඟ බේරාගනු වෙනුවට, ආණ්ඩුව වගකීමක් සහිතව මේ පිළිබඳ නිල ප්‍රකාශයක් වහාම සිදුකළ යුතු බව ඔහු අවධාරණය කළේය.
බන්ධනාගාර පුපුරායාම සහ පරිපාලන අර්බුදය
බන්ධනාගාරය තුළ ඇති වූ ගැටුමට මූලික හේතුව ඩෙංගු මර්දනය සහ රැඳවියන්ගේ සෞඛ්‍ය ප්‍රශ්න වුව ද, ආණ්ඩුව නියමිත වේලාවට මැදිහත් නොවීම නිසා තත්ත්වය පාලනයෙන් ගිලිහී ගිය බව නාමල් රාජපක්ෂ පෙන්වා දුන්නේය.
ධාරිතාව ඉක්මවා යාම:
බන්ධනාගාර පද්ධතියේ සැබෑ ධාරිතාව 10,000-12,000ක් වුව ද, වත්මන් ආණ්ඩුවේ "ක්ලීන් ශ්‍රී ලංකා" වැඩසටහන යටතේ 40,000-45,000ක් දක්වා රැඳවියන් අධික ලෙස ගාල් කර තිබේ. රස පරීක්ෂක වාර්තා ප්‍රමාද වීම සහ බන්ධනාගාර නිලධාරීන් හිඟකම මෙම ව්‍යුහාත්මක බිඳවැටීමට සෘජුවම බලපා ඇත.
කොමසාරිස් තනතුර හිස්:
දේශපාලන පළිගැනීම් සහ හිතුමනාපයට නිලධාරීන් ඉවත් කිරීම් හේතුවෙන් බන්ධනාගාර දෙපාර්තමේන්තුවට ස්ථිර බන්ධනාගාර කොමසාරිස්වරයකු පත් කිරීමට පවා ආණ්ඩුව මෙතෙක් කටයුතු කර නැත. විෂයභාර ඇමතිවරයා සිද්ධිය පිළිබඳව නිසි තොරතුරක් නොමැතිව "සමාජ මාධ්‍ය දැක්කේ නැහැ" කියමින් වගකීම් පැහැර හරින බවට මන්ත්‍රීවරයා චෝදනා කළේය.
"දිට්වා" කුණාටුව, ඩෙංගු සහ නිදන් හැරීමේ පාලනය
වත්මන් ආණ්ඩුවේ සමස්ත ක්‍රියාවලියම අසාර්ථක ප්‍රතිපත්ති සහ ජනතා විරෝධී න්‍යාය පත්‍ර මත ක්‍රියාත්මක වන බව නාමල් රාජපක්ෂ මෙහිදී විවේචනය කළේය.
මිනිස් ජීවිත නොසලකා හැරීම:
"දිට්වා" කුණාටුව අවස්ථාවේ පූර්ව පියවර නොගැනීම නිසා ජීවිත 300ක් අහිමි වූ අතර, තවමත් 35,000ක් කූඩාරම් සහ තාවකාලික නිවාසවල පසුවෙති. එමෙන්ම රට පුරා ඩෙංගු රෝගයෙන් 50කට අධික පිරිසක් මියගොස් රෝහල් පිරී ඉතිරී යද්දී, "දුම් ගැසීමට සහ ගම සුද්ද කිරීමට අවම රෝගීන් 10ක පොකුරක් හැදෙනකන් ඉන්න ඕනේ" කියමින් නිලධාරීන් ජන ජීවිත සෙල්ලමකට ගෙන ඇත.
ආණ්ඩුවේ ආරම්භය:
ආණ්ඩුව බලයට පත් වූ වහාම හමුදාව සහ පොලිස් විශේෂ කාර්ය බලකාය (STF) යොදවා රටම ගොඩගැනීමට යැයි කියමින් මුලින්ම සිදුකළේ නිදන් හැරීම බවත්, අවසානයේ ජනතා ප්‍රශ්න විසඳීමට නොහැකිව මර්දනය දියත් කර ඇති බවත් ඔහු පැවසීය.
ගොවි ජනතාවට 'කසිප්පුකාරයෝ' කීම සහ හාල් ලීසිං ක්‍රමය
රටේ දේශීය කෘෂිකර්මාන්තය සහ ගොවියා සහමුලින්ම වට්ටන ප්‍රතිපත්තියක් ආණ්ඩුව අනුගමනය කරන බව මන්ත්‍රීවරයා කියා සිටියේය.
පොහොර සහ සහනාධාර අර්බුදය:
ගොවීන්ට වෙලාවට පොහොර නොදීම නිසා ඔවුන් පෞද්ගලික අංශයෙන් රුපියල් 18,500-20,000 වැනි අධික මිලකට පොහොර මිලදී ගනිති. දේශීය අස්වැන්න නෙළන විට පිටරටින් හාල් ගෙන්වන ආණ්ඩුව, එම හාල් විකුණාගත නොහැකි වූ විට රජයේ සේවකයන්ට කිලෝ 20 බැගින් "ලීසිං ක්‍රමයට" හාල් දීමට සූදානම් වේ.
ගොවි නායකයන්ට තර්ජන:
තමන්ගේ අයිතීන් ඉල්ලා පාරට බහින අහිංසක ගොවියන්ට ආණ්ඩුවේ ඇමතිවරුන් "කසිප්පුකාරයෝ" යැයි අපහාස කරන බව පැවසූ නාමල් රාජපක්ෂ, මර්දනය සහ චණ්ඩිකම් පසෙක ලා වහාම ගොවි සහ ධීවර නායකයන් කැඳවා ප්‍රායෝගික විසඳුම් ලබාදීමට මැදිහත් වන ලෙස ආණ්ඩුවට බලකර සිටියේය.
