"නැතිවූ බලතල නැවත ලබාගන්නවා" - පරණ BOI පනත සහ අමාත්‍යාංශ මැද ඇති වී තිබෙන ලිපිගොනු 'වංකගිරිය'
සිංගප්පූරු ක්‍රමයට පරණ ආණ්ඩුව ගෙනා ආයෝජන කොමිෂන් සභා යෝජනා කුණු කූඩයටද? නැතහොත් නව වෙනසකටද?
ශ්‍රී ලංකා ආයෝජන මණ්ඩලයේ (BOI) නව සභාපතිවරයා ලෙස ප්‍රමුඛ පෙළේ මූල්‍ය හා බදු ක්ෂේත්‍රයේ ප්‍රවීණයෙකු වන දුමින්ද හුලංගමුව පත් කිරීම, වත්මන් පරිපාලනය යටතේ සිදුවන වඩාත්ම අවධානයට ලක්වන ආයතනික ප්‍රතිසංස්කරණයක ආරම්භය සනිටුහන් කරයි.
Ernst & Young (EY) ආයතනයේ හිටපු මෙහෙයුම් සහකරු සහ ලංකා වාණිජ මණ්ඩලයේ සභාපතිවරයා වන ඔහු වෘත්තීයමය වශයෙන් ඉහළම සුදුසුකම් සහිතව පැමිණිය ද, ඔහුගේ ලොකුම අභියෝගය ආයෝජකයන් ආකර්ෂණය කරගැනීම නොව යල් පැන ගිය නීතිමය සහ පරිපාලන රාමුවක් තුළ සිරවී ඇති BOI ආයතනය මුළුමනින්ම ප්‍රතිසංස්කරණය කිරීම බව ව්‍යාපාරික ක්ෂේත්‍රය පෙන්වා දෙයි.
ධුරයේ වැඩ භාරගැනීමෙන් අනතුරුව අදහස් දැක්වූ හුලංගමුව ප්‍රතිඥා දුන්නේ, BOI ආයතනය සතු ව තිබූ පැරණි ව්‍යවස්ථාපිත බලතල නැවත ලබාගෙන එය ආයෝජකයන් සඳහා වන සැබෑ "එකම වහලක් යටින් සේවා සපයන මධ්‍යස්ථානයක්" (One-Stop Shop) බවට පත් කරන බවයි.
ව්‍යුහාත්මක බාධා සහ අහිමි වූ බලතල
ආයෝජන අනුමත කිරීමේ ක්‍රියාවලිය සම්බන්ධීකරණය කිරීමේ පූර්ණ බලය සහිතව මුලින්ම BOI ආයතනය සැලසුම් කර තිබුණ ද, කාලයත් සමඟ එහි ව්‍යවස්ථාපිත බලතල විවිධ අමාත්‍යාංශ, රේඛීය දෙපාර්තමේන්තු සහ නියාමන ආයතන වෙත ගිලිහී ගොස් ඇත.
ලිපිගොනු ලිබරින්තය (වංකගිරිය)
වත්මන් ක්‍රමය යටතේ මෙරටට පැමිණෙන දේශීය හෝ විදේශීය ආයෝජකයෙකුට ඉඩම්, පරිසරය, රේගුව, උපයෝගිතා සහ පළාත් පාලන ආයතන වැනි වෙන් වෙන් ව්‍යුහයන්ගෙන් අනුමැතිය ලබාගැනීමට සිදුව ඇත. මෙමඟින් "One-Stop Shop" සංකල්පය මුළුමනින්ම අඩපණ වී තිබේ.
පනත සංශෝධනය කිරීමේ අවශ්‍යතාවය:
පාර්ලිමේන්තුව හරහා ශ්‍රී ලංකා ආයෝජන මණ්ඩල පනත (BOI Act) කාලීනව නවීකරණය කර ඊට අදාළ නීතිමය බලතල නැවත ආයතනයට ලබා නොදෙන්නේ නම්, කොතරම් දක්ෂ සභාපතිවරයෙකු යටතේ වුවද ආයෝජකයන් බලාපොරොත්තු වන රැඩිකල් වෙනස සිදු කිරීම අපහසු වනු ඇත.
ජනපති උපදේශක භූමිකාව සහ පරණ ආණ්ඩුවේ සැලසුම්
දුමින්ද හුලංගමුව ජනාධිපති අනුර කුමාර දිසානායක ගේ ජ්‍යෙෂ්ඨ ආර්ථික උපදේශකවරයා ලෙස කටයුතු කිරීම නිසා, පෞද්ගලික අංශයේ වෘත්තීය අත්දැකීම් රටේ ඉහළම ආර්ථික ප්‍රතිපත්ති සම්පාදනය සමඟ සෘජුවම සම්බන්ධ කිරීමේ සුවිශේෂී අවස්ථාවක් ඔහු සතු වේ.
ආයෝජන කොමිෂන් සභා ගැටලුව:
සිංගප්පූරුව සහ එක්සත් අරාබි එමීර් රාජ්‍යය (UAE) වැනි සාර්ථක රටවල් ආදර්ශයට ගනිමින්, ආයෝජන පහසුකම් සැලසීම සහ නියාමනය වෙන් වෙන් වශයෙන් සිදු කිරීම සඳහා ස්වාධීන ආයෝජන ප්‍රවර්ධන කොමිෂන් සභා පිහිටුවීමට පසුගිය රජය සැලසුම් කර තිබුණි.
ඉදිරි දිශානතිය:
එම පැරණි ප්‍රතිසංස්කරණ යෝජනා වත්මන් රජය විසින් අත්හැර දමන්නේද, නැතහොත් නව සංශෝධන සහිතව ශක්තිමත් කළ BOI ව්‍යුහයක් තුළට අවශෝෂණය කරගන්නේද යන්න මෙතෙක් පැහැදිලි නැත.
ක්ෂණික ප්‍රමුඛතා සහ දේශපාලන කැපවීම
නව සභාපතිවරයා යටතේ BOI හි ක්ෂණික ප්‍රමුඛතාවන් විය යුත්තේ ආයෝජක විශ්වාසය යළි ගොඩනැගීම, ව්‍යාපෘති අනුමත කිරීම් වේගවත් කිරීම සහ අපනයන ඉලක්ක කරගත් සෘජු විදේශ ආයෝජන (FDI) ආකර්ෂණය කරගනිමින් රටේ පවතින වෙළෙඳ හිඟය පියවා ගැනීමට දායක වීමයි.
කෙසේ වෙතත්, මෙම අරමුණු සාක්ෂාත් කර ගැනීම කළමනාකරණ හැකියාව මත පමණක් නොව, රාජ්‍ය යාන්ත්‍රණයේ පවතින පරිපාලනමය අකර්මණ්‍යතාවය බිඳ දැමීම සඳහා ලැබෙන දේශපාලන කැපවීම (Political Commitment) මත තීරණය වනු ඇත. හුලංගමුව ගේ පත්වීම ආර්ථික ප්‍රතිපත්ති සම්පාදනයේ පවතින ස්ථාවරත්වය පෙන්නුම් කරන සාධකයක් වන අතර, සීමිත පද්ධතියක් තුළ ක්‍රියාත්මක වන තවත් එක් කාර්යක්ෂම පරිපාලකයෙකු වෙනුවට BOI ආයතනය සැබෑ බලගතු ආයතනයක් බවට පරිවර්තනය කිරීමට ඔහුට හැකිවේද යන්න ඉදිරියේදී තීරණය වනු ඇත.
(සටහන | සම්පත් ධීරසේකර )
මුලාශ්‍රය
New Chairman Faces Daunting Task Reviving BOI's Lost Investment Authority
