දොළොස් වසරකට පසුව ශ්‍රී ලංකාවේ පැවැත්වෙන මේ සමුළුවේ සාඩම්බර සත්කාරකත්වය දරන්නේ සැපයුම් හා ප්‍රවාහන කටයුතු සම්බන්ධ ශ්‍රී ලංකාවේ ප්‍රමුඛ පෙලේ ආයතනයක් වන ශ්‍රී ලංකා වරලත් ක්‍රම කාර්ය සම්පාදන හා ප්‍රවාහන ආයතනය (CILT Sri Lanka).
“අනාගතයට සූදානම් ක්‍රම කාර්ය සම්පාදන: වෙනසට අනුගතව, තිරසාරත්වය කරා මෙහෙයවීම” යන්නයි මේ ජාත්‍යන්තර උළෙලේ තේමාව වී තිබෙන්නේ.
මේ සමුළුවේදී, ක්ෂේත්‍රයේ වර්තමාන හා අනාගත හැඩරුව හඳුනා ගැනීමට අවස්ථාව සලසන අතරතුර ප්‍රවණතා හා නවෝත්පාදන මෙන්ම ක්ෂේත්‍රය මුහුණ දෙන අභියෝග ද ගැඹුරින් සාකච්ඡාවට බඳුන් කරමින් ලෝක ප්‍රකට විශේෂඥයින් විසින් දේශන පැවැත්වීමට නියමිතයි. සහභාගි වන පිරිස ද සම්බන්ධ කරගෙන පැවැත්වෙන අන්තර් ක්‍රියාකාරී වැඩමුළු හා සාකච්ඡා ද මේ දේශනවලට ඇතුළත්.
මීට සමගාමීව, වෘත්තීය විශිෂ්ටත්වය උදෙසා වන කීර්තිමත් CILT සම්මාන උළෙලක් ද පැවැත්වෙන අතර සමුළුවේ සත්කාරක රට වශයෙන් ශ්‍රී ලංකාවේ පොහොසත් සංස්කෘතික උරුමය ලොවට විදහා දක්වන සංස්කෘතික චාරිකාවක් ද සංවිධානය කර තිබෙනවා.
1919 වසරේදී පළමු ලෝක යුද්ධයේ නිමාවෙන් පසුව ලන්ඩන් අගනුවර ආරම්භ කරන ලද CILT ආයතනය මේ වන විට රටවල් 30කට අධික සංඛ්‍යාවක සිය මෙහෙයුම් කටයුතු සිදුකරන සැපයුම්, සැපයුම් ක්‍රියාදාම සහ ප්‍රවාහන ක්ෂේත්‍රයන් හි ප්‍රමුඛතම ගෝලීය වෘත්තීය ආයතනයක්. මෙය ක්ෂේත්‍රයේ විශේෂභාවය, පුහුණුව සහ වෘත්තීය ප්‍රමිතීන් සම්බන්ධයෙන් ලොව පුරා ගෞරවය දිනා ගත් ආයතනයක් වන අතර එය අද වන විට ජාත්‍යන්තර මට්ටමේ ක්‍රම කාර්ය සම්පාදන වෘත්තිකයන් රැසක් ලොවට දායාද කර තිබෙනවා.
1984 වසරේදී වරලත් ප්‍රවාහන ආයතනය ලෙස පිහිටුවනු ලැබූ CILT Sri Lanka ආයතනය එහි ශක්තිමත් පාලනය, නායකත්වය හා පුළුල් වන සාමාජිකත්වය විදහා දක්වමින් 2012 වසරේදී ශ්‍රී ලංකාව තුළ ස්ථාවරත්වය සටහන් කිරීමට සමත් වුනා. ක්ෂේත්‍රයේ ප්‍රමුඛ පෙලේ විද්වතුන්ගෙන් සමන්විත මණ්ඩලයක් මගින් මෙහෙයවනු ලබන CILT SL මෙරට සැපයුම් හා ප්‍රවාහන ක්ෂේත්‍රය හැඩගැස්වීමෙහිලා තීරණාත්මක කාර්යභාරයක් ඉටු කරනවා. මේ ආයතනය යටතේ තවත් විශිෂ්ට උප අංශ දෙකක් ක්‍රියාත්මක වන අතර ස්ත්‍රී පුරුෂ විවිධත්වය සහ කාන්තාවන් සවිබල ගැන්වීම පිණිස වන WiLAT (සැපයුම් හා ප්‍රවාහන ක්ෂේත්‍රයේ කාන්තාවන්) එක් අංශයක්.
අනෙක් අංශය වන්නේ තරුණ වෘත්තිකයන් අතර නායකත්වය සහ නවෝත්පාදනය බිහිකිරීම වෙනුවෙන් කටයුතු කරන Next Generation Forum.
CILT ජාත්‍යන්තර සමුළුව 2025 පිළිබඳව පැවති මාධ්‍ය හමුවේදී CILT ශ්‍රී ලංකා සභාපති චන්දිම හුලංගමුව, සැපයුම් දාමයේ උපකමිටුවේ ප්‍රධානී චානක ගුණතිලක, ජාත්‍යන්තර උපසභාපති නිරාල් කඩවතාරච්චි හා සමුළුවේ සභාපතිනි ගයාත්‍රි කරුණානායක අදහස් දැක්වූවා.
( සටහන | වර්නන් ගුණසේකර)
