“අයිතිය කාගේ වුණත් වැඩක් නෑ තරඟකරුවෝ අපිට වඩා වේගවත්” - කලාපීය නැව් සමාගම්වල විශ්වාසය පළුදු වීමේ අනතුරක්.
කොළඹ වරායේ නැගෙනහිර බහාලුම් පර්යන්තය (ECT) කිසිදු බාහිර හෝ පෞද්ගලික අංශයකට බදු නොදෙන බවත්, එය 100%ක් රාජ්‍ය අංශය යටතේම පවත්වාගෙන යන බවත් වරාය අමාත්‍ය අනුර කරුණාතිලක පාර්ලිමේන්තුවේදී නිල වශයෙන් ප්‍රකාශ කර ඇත. මෙමඟින් පෞද්ගලීකරණ බිය තාවකාලිකව නැති වුවද, පර්යන්තය සම්පූර්ණයෙන්ම ක්‍රියාත්මක කර පවත්වාගෙන යාමට රජයට ඇති ප්‍රායෝගික හැකියාව පිළිබඳව ක්ෂේත්‍රයේ ප්‍රවීණයන් අතර බරපතළ සැක සංකා මතු වී තිබේ.
2022 අර්බුදයේ සිට ඇදෙන ප්‍රසම්පාදන ලෙඩේ
ලෝකයේ විශාලතම බහාලුම් නැව් හැසිරවිය හැකි ගැඹුරු මුහුදු පර්යන්තයක් ලෙස නිර්මාණය කළ ECT ව්‍යාපෘතියේ වැඩ කටයුතු සැලසුම් කළ කාලයට වඩා බෙහෙවින් ප්‍රමාද වී ඇත.
ඩොලර් හිඟය:
2022 වසරේ රට තුළ පැවති දැඩි මූල්‍ය අර්බුදය සහ ඩොලර් හිඟකම නිසා විදේශයන්ගෙන් ගෙන්වීමට තිබූ යන්ත්‍රෝපකරණවලට මුදල් ගෙවීම් ප්‍රමාද විය.
ස්ට්‍රැඩල් කැරියර් අර්බුදය:
පර්යන්තය ඇතුළත බහාලුම් එහා මෙහා කිරීමට අත්‍යවශ්‍ය වන "ස්ට්‍රැඩල් කැරියර්" (Straddle Carriers) උපකරණ ගෙන්වා ගැනීමට මෙතෙක් ගත් උත්සාහයන් අසාර්ථක වී ඇත.
5 වැනි ටෙන්ඩරය:
අමාත්‍යවරයා පිළිගන්නා පරිදි, අදාළ උපකරණ ලබාගැනීම සඳහා දැනටමත් පස්වැනි වතාවටත් (5th time) ලංසු කැඳවා ඇති අතර, එහි තාක්ෂණික සහ මූල්‍ය ඇගයීම් තවමත් අවසන් අදියරේ පවතී. මීට අමතරව තවත් එවැනි උපකරණ 15ක් ගැනීමට අලුත්ම ටෙන්ඩරයක් ද දමා ඇත.
පරිපාලන ප්‍රමාදයන් දේශීය තරඟකාරිත්වයට පහරක්
නාවික ක්ෂේත්‍රය යනු වේගය, කාර්යක්ෂමතාව සහ විශ්වාසනීයත්වය මතම තීරණය වන ව්‍යාපාරයකි. යන්ත්‍රෝපකරණ මිලදී ගැනීමට එකම ටෙන්ඩරය පස් වතාවක් කැඳවීමට සිදුවීමෙන් පෙනී යන්නේ මූල්‍ය ප්‍රශ්නවලට වඩා රටේ පවතින බරපතළ රාජකාරිමය සහ පරිපාලනමය ප්‍රමාදයන් (Administrative delays) ව්‍යාපෘතිය අඩාල කර ඇති බවයි. මෙම ප්‍රමාදයන් නිසා ජාත්‍යන්තර නැව් සමාගම් කොළඹ වරාය මඟහැර කලාපයේ වෙනත් තරඟකාරී වරායන් වෙත හැරීමේ දැඩි අවදානමක් මතුවේ.
මීළඟ තීරණාත්මක සන්ධිස්ථානය
ලෝකයේ ප්‍රමුඛ පෙළේ බොහෝ වරායන් පවතිනුයේ රජයේ අයිතිය යටතේ වුවද, ඒවායේ මෙහෙයුම් කටයුතු (Operations) සඳහා පෞද්ගලික අංශයේ තාක්ෂණය, ප්‍රාග්ධනය සහ කළමනාකරණ පළපුරුද්ද සහයෝගීතා ගිවිසුම් (Partnerships) හරහා ලබා ගනී. මෙය සෘජු පෞද්ගලීකරණයක් නොවේ. නැගෙනහිර පර්යන්තයේ සැබෑ ගැටලුව වන්නේ එහි අයිතිය කා සතුද යන්න නොවේ; දැනට පවතින රාජ්‍ය කළමනාකරණ ක්‍රමය හරහා කලාපීය තරඟකරුවන්ට මුහුණ දිය හැකි මට්ටමට මෙම පර්යන්තය කඩිනමින් සක්‍රීය කරන්නේ කෙසේද යන්නයි.
(සටහන | සම්පත් ධීරසේකර)
මුලාශ්‍රය :
Colombo East Terminal Delays Raise Questions Beyond Privatization Claims
