ආදායම් අර්බුදයක් මඟහැරීමට මුදල් අමාත්‍යාංශයෙන් නව සැලසුමක්
ජාත්‍යන්තර වෙළඳ ගිවිසුම් සහ දේශීය මූල්‍ය අවශ්‍යතා අතර රජය සිරවෙයි
ඇමරිකානු එක්සත් ජනපදය ලෝක වෙළඳ සංවිධානයට (WTO) සිදුකළ නිල පැමිණිල්ලක් හේතුවෙන්, මෙරට පාවිච්චි කරන ලද වාහන ආනයන බදු ව්‍යුහය කඩිනමින් සංශෝධනය කිරීමට ශ්‍රී ලංකා රජයට සිදුව තිබේ.
ශ්‍රී ලංකාව දැනට පාවිච්චි කරන ලද (Second-hand) වාහන ආනයනය සඳහා භාවිත කරන බදු සහ තක්සේරු ක්‍රමවේදයන්, ජාත්‍යන්තර වෙළඳ ගිවිසුම්වලට පටහැනි බවට ඇමරිකාව චෝදනා කරයි. මේ සම්බන්ධයෙන් මුදල් අමාත්‍යාංශය සහ රේගු දෙපාර්තමේන්තුවේ ඉහළ නිලධාරීන් අතර විශේෂ සාකච්ඡා වටයක් පසුගිය සිකුරාදා පවත්වා ඇත.
ආන්දෝලනාත්මක 85% රීතිය
2016 වසරේ සිට ක්‍රියාත්මක වන නීතියට අනුව, ආනයනය කරනු ලබන පාවිච්චි කළ වාහනයක බදු තක්සේරු වටිනාකම, එය නිෂ්පාදනය කළ රටේ පවතින අලුත්ම වාහනයක මිලෙන් (බදු රහිත) අවම වශයෙන් 85% ක් ලෙස ගණනය කළ යුතුය.
මෙම ක්‍රමය ජාත්‍යන්තර වෙළඳ නීති හා එකඟතාවන්ට පටහැනි බව රජයේ නිලධාරීන් ද පිළිගෙන තිබේ.
පවතින බදු ක්‍රමය එකවරම අහෝසි කළහොත් රජයේ බදු ආදායම ක්ෂණිකව පහත වැටීමේ අවදානමක් පවතී. මේ හේතුවෙන් ජාත්‍යන්තර බැඳීම් ඉටු කරන අතරම, රටේ මූල්‍ය ස්ථාවරත්වය රැකගත හැකි ක්‍රමානුකූල (Gradual) නව බදු සූත්‍රයක් සකස් කිරීම කෙරෙහි නිලධාරීන්ගේ අවධානය යොමුව ඇත.
