පොහොට්ටු පක්ෂයේ නිර්මාතෘ බැසිල් රාජපක්ෂ හෙට (03) දිනයේ
පාර්ලිමේන්තුවේ දී මන්ත්‍රීවරයකු ලෙස දිව්රුම්දීමට නියමිත බවට සමාජ මාධ්‍ය ඔස්සේ පලවන වාර්තා සත්‍ය නොවන බව එම පක්ෂයේ පාර්ලිමේන්තු මන්ත්‍රී ජයන්ත කැටගොඩ පැවසිය.
ඔහු එබව සඳහන් කළේ theleader.lk කළ විමසීමකදීය.
පොහොට්ටු පක්ෂයේ ජාතික ලැයිස්තු මන්ත්‍රී ජයන්ත කැටගොඩ වහාම ඉල්ලා අස්වී බැසිල් රාජපක්ෂ හෙට දිනයේ මන්ත්‍රීවරයකු ලෙස දිව්රුම් දීමේ සුදානමක් පවතින බව ඇතැම් සමාජ මාධ්‍ය වාර්තා කර ඇති අතර ඒ සම්බන්ධ කුතුහලයක් මතුවුයේ සමගි ජන බලවේගයේ ප්‍රචාරක අංශ ප්‍රධානි, හරින් ප්‍රනාන්දු මන්ත්‍රීවරයා සිය ෆේස්බුක් පිටුවේ පළකර තිබු පහත පොස්ටුවයි.
ඉන් අනතුරුව ඇතැම් සමාජ මාධ්‍ය වාර්තා කර තිබුනේ පාර්ලිමේන්තුව හෙට දිනයේ පැය දෙකකට පමණක් රැස්වීමට නියමිත බවත්, එහිදී බැසිල් රාජපක්ෂ දිව්රුම් දීමට කටයුතු යොදා ඇති බවත්ය.
බැසිල් රාජපක්ෂ මුදල් හා ආර්ථික සංවර්ධන අමාත්‍යවරයා ලෙස බදාදා දිනයේ ජනාධිපතිවරයා ඉදිරිපිට දිව්රුම් දෙන බවත්, එම තත්ත්වය තුල මහින්ද රාජපක්ෂ නාමමාත්‍රීක අගමැතිවරයකු බවට පත්වන බවත් එවැනි මාධ්‍ය වාර්තා වල සඳහන් විය.
කෙසේවුවද ජයන්ත කැටගොඩ මන්ත්‍රීවරයා ඒ සියලු වාර්තා මුළුමනින්ම ප්‍රතික්ෂේප කළේය.
'' අද උදේ ඉඳලා ඔයවගේ කටකතාවක් යනවා කියලා ආරංචියි. එත් ඒවායේ සත්‍යතාවයක් නැහැ. බැසිල් මහත්තයා මේ දවස්වල නිදිමරාගෙන කොරෝනා මර්ධන මෙහෙයුමේ වැඩ. එතුමාට පාර්ලිමේන්තු යන්න හදිසියක් නැහැ. ඔය කටකතා බොරු..'' කැටගොඩ මන්ත්‍රීවරයා වැඩිදුරටත් කියා සිටියේය.
