සහනාධාර සහල් බීර සඳහා යොදාගැනීමෙන් ජාතික ආර්ථිකයට සහ සහල් ස්වයංපෝෂිතභාවයට හානි සිදුවන බවට පෙත්සම්කරුවන්ගෙන් චෝදනා
අභියාචනාධිකරණ තීරණය සහ නඩු විභාගය
බීර නිෂ්පාදනය සඳහා ප්‍රධාන අමුද්‍රව්‍ය ලෙස සහල් සහ සීනි භාවිත කිරීමට නිෂ්පාදකයින්ට අවසර නොදෙන ලෙස සුරාබදු කොමසාරිස් ජනරාල්වරයා ඇතුළු වගඋත්තරකරුවන්ට නියෝගයක් නිකුත් කරන ලෙස ඉල්ලා ගොනු කර ඇති රිට් පෙත්සම විරෝධතා ගොනු කිරීම සඳහා ලබන ඔක්තෝබර් මස 02 වැනිදා යළි කැඳවීමට අභියාචනාධිකරණය නියෝග කළේය.
ආර්. ගුරුසිංහ සහ ඒ. ප්‍රේම් ශංකර් යන අභියාචනාධිකරණ විනිසුරු මඩුල්ල ඉදිරියේ මෙම පෙත්සම කැඳවූ අවස්ථාවේදී, වගඋත්තරකාර මත්පැන් නිෂ්පාදක සමාගම් කිහිපයක් වෙනුවෙන් පෙනී සිටි කේ. කනගීෂ්වරන්, සුමති ධර්මවර්ධන සහ අලි සබ්‍රි යන ජනාධිපති නීතිඥවරුන් අධිකරණයෙන් ඉල්ලා සිටියේ අදාළ නඩුකරයට එරෙහිව විරෝධතා ගොනු කිරීමට දිනයක් ලබා දෙන ලෙසයි. ඒ අනුව වගඋත්තරකාර පාර්ශ්වයට විරෝධතා ගොනු කිරීමට අවසර දෙමින් පෙත්සම ඔක්තෝබර් 02 වැනිදා තෙක් කල් තැබිණි.
පෙත්සම්කරුවන් සහ පනතේ විධිවිධාන
බලපත්‍රලාභී මත්පැන් අලෙවිකරුවන් පිරිසක් විසින් ගොනු කරන ලද මෙම පෙත්සමේ වගඋත්තරකරුවන් ලෙස සුරාබදු කොමසාරිස් ජනරාල්වරයා, සුරාබදු නිලධාරීන්, ශ්‍රී ලංකා ප්‍රමිති ආයතනය, නීතිපතිවරයා සහ පොලිස්පතිවරයා ඇතුළු පිරිසක් නම් කර ඇත.
සුරාබදු පනතේ 2 වන වගන්තියට අනුව 'බියර්' යනු මෝල්ට්වලින් සදන ලද පැසුණු මත්පැන් බව පෙත්සම්කරුවෝ පෙන්වා දෙති. එහෙත් වර්තමානයේ බොහෝ නිෂ්පාදකයින් ඊට පටහැනිව ප්‍රධාන අමුද්‍රව්‍ය ලෙස සහල් සහ සීනි භාවිත කරන බවට තොරතුරු හෙළි වී ඇති බවත්, එය පවත්නා නීතිමය විධිවිධානවලට මුළුමනින්ම පටහැනි බවත් ඔවුහු අධිකරණය හමුවේ චෝදනා කරති.
ජාතික ආර්ථිකයට සිදුවන බලපෑම සහ පෙත්සමේ ඉල්ලීම්
රජය විසින් මහජන මුදල් භාවිත කරමින් සහල් නිෂ්පාදනය සඳහා විශාල සහනාධාර ලබා දෙන පසුබිමක, එකී සහල් බියර් වැනි වාණිජ නිෂ්පාදන සඳහා යොදා ගැනීම මගින් රට සහල්වලින් ස්වයංපෝෂිත වීමේ ක්‍රියාවලියට මෙන්ම ජාතික ආර්ථිකයටද දැඩි හානියක් සිදුවන බව පෙත්සම්කරුවෝ අවධාරණය කරති. එමෙන්ම මත්පැන් නිෂ්පාදනයේ ප්‍රමිතිය නිරීක්ෂණය කිරීම සඳහා ශ්‍රී ලංකා ප්‍රමිති ආයතනය මගින් පවත්වාගෙන යන යාන්ත්‍රණය වර්තමානයට ගැලපෙන පරිදි යාවත්කාලීන වී නොමැති බවද පෙන්වා දී තිබේ.
මේ අනුව, සහල් සහ සීනි බීර නිෂ්පාදනයට යොදා ගැනීමට අවසර දීම වළක්වන අතුරු නියෝගයක් නිකුත් කරන ලෙසත්, ප්‍රමිතීන් යාවත්කාලීන කිරීමට සුදුසු පියවර ගන්නා ලෙසත් පෙත්සම්කරුවෝ අභියාචනාධිකරණයෙන් වැඩිදුරටත් ඉල්ලා සිටිති.
