වසරකට 2,500ක් වන මාර්ග මරණ සංඛ්‍යාව 2029 වන විට පාලනය කිරීමට ප්‍රමුඛතාව
'100ට 100' වැඩසටහන සහ පෞද්ගලික අංශයේ දායකත්වය
ශ්‍රී ලංකාවේ මාර්ග අනතුරු හේතුවෙන් සිදු වන ජීවිත හානි අවම කිරීමේ අරමුණින්, ජාතික මාර්ග ආරක්ෂණ සභාව සහ පෞද්ගලික අංශය එක්ව '100ට 100' නමැති විශේෂ යතුරුපැදි මාර්ග ආරක්ෂණ වැඩසටහනක් ආරම්භ කර තිබේ. පෞද්ගලික සමාගම් 100ක් මූලික කරගනිමින්, එකී සෑම ආයතනයක් මගින්ම යතුරුපැදිකරුවන් 100 දෙනෙකු බැගින් සමස්තයක් ලෙස යතුරුපැදිකරුවන් 10,000ක් විධිමත් පුහුණුවකට සහ දැනුවත් කිරීමේ වැඩසටහන්වලට යොමු කිරීම මෙම ව්‍යාපෘතියේ ප්‍රධාන අරමුණයි.
එක්සත් ජාතික පක්ෂය ඇතුළු විපක්ෂයේ පාර්ශ්ව රැසක් ද මාර්ග ආරක්ෂාව සම්බන්ධයෙන් අවධානය යොමු කර ඇති පසුබිමක, ප්‍රවාහන, මහාමාර්ග සහ නාගරික සංවර්ධන අමාත්‍ය බිමල් රත්නායක පෙන්වා දුන්නේ මාර්ග ආරක්ෂාව යනු පුද්ගලික ආරක්ෂාවෙන් ඔබ්බට ගිය ජාතික වගකීමක් බවයි. “කොතරම් මාර්ග සංවර්ධනය කළ ද, නවීන වාහන ගෙන්වූ ද, නිසි පුහුණුව සහ විනය නැතිනම් මාර්ග ආරක්ෂාව තහවුරු කළ නොහැකියි. වසරකට අහිමි වන 2,500කට අධික ජීවිත ප්‍රමාණය 2029 වන විට සැලකිය යුතු ලෙස අඩු කිරීම අපගේ ඉලක්කයයි,” යනුවෙන් අමාත්‍යවරයා වැඩිදුරටත් සඳහන් කළේය.
වෙනම මංතීරු (Motorcycle Lanes) සහ විදේශීය ආකෘති
දත්ත වාර්තාවලට අනුව ශ්‍රී ලංකාවේ වසරකට සිදුවන 2,500ක් පමණ වන මාර්ග මරණ අතරින් 1,000කට වැඩි ප්‍රමාණයක් යතුරුපැදි අනතුරු සම්බන්ධ ඒවා වේ. මෙම තත්ත්වයට විසඳුමක් ලෙස, ප්‍රධාන මාර්ගයන්හි යතුරුපැදි සඳහාම වෙන් වූ වෙනම මංතීරු (Dedicated Motorcycle Lanes) හඳුන්වා දීමට රජය සැලසුම් කර ඇත.
මැලේසියාව වැනි ආසියාතික රටවල යතුරුපැදි සඳහා වෙනම මංතීරු වෙන් කිරීම හරහා අනතුරු ප්‍රතිශතය විශාල ලෙස පහත හෙළීමට හැකි වූ ආකෘතිය මෙහිදී අධ්‍යයනය කර තිබේ. ඒ අනුව, නියමු ව්‍යාපෘතියක් ලෙස කළුවංචිකුඩි ප්‍රදේශයේ ප්‍රධාන මාර්ගයේ මීටර් 3.5ක තීරුවක් යතුරුපැදි සඳහා වෙන් කිරීමට පියවර ගැනෙන අතර, සාමාන්‍ය රේඛා සලකුණු කිරීම වෙනුවට භෞතික බාධක (Physical Dividers) යොදාගනිමින් එකී මංතීරුව වෙන් කිරීමට නියමිත ය.
ක්‍රියාත්මක කිරීමේ අභියෝග සහ දිගුකාලීන විසඳුම්
මාර්ග ආරක්ෂණ විශේෂඥයන් පෙන්වා දෙන්නේ යතුරුපැදිකරුවන්ගේ ධාවන විලාසය මෙන්ම, මාර්ග සැලසුම්කරණයේ පවතින අඩුපාඩු, ප්‍රමිතියෙන් තොර හෙල්මට් භාවිතය සහ නීතිය ක්‍රියාත්මක කිරීමේදී පවතින ප්‍රාදේශීය විෂමතාවයන් ද මෙම අනතුරුවලට සෘජුව බලපාන බවයි.
එබැවින් යතුරුපැදිකරුවන් පුහුණු කිරීමට අමතරව, මාර්ග යටිතල පහසුකම් සංවර්ධනය කිරීම, හෙල්මට් ප්‍රමිතිය තදින් නියාමනය කිරීම සහ අඛණ්ඩව නීතිය ක්‍රියාත්මක කිරීමේ පද්ධතියක් පවත්වාගෙන යාම මගින් පමණක් මෙම වැඩසටහනේ සාර්ථකත්වය රඳා පවතිනු ඇත.
යතුරුපැදි අනතුරු හා මහපාරේ මිනීමරණ බාල හෙල්මට් ජාවාරමක් සම්බන්ධයෙන් මිට දින කිහිපයකට පෙර ''රෙඩ් ඇලට්'' සිදුකල විශේෂ අනාවරණයකට අදාල වීඩියෝ දෙකක් මතු පළවේ.
