ව්‍යාජ ලෙස පෙනී සිටිමින් මෙරටින් අතිදැවැන්ත විදේශ විනිමය ප්‍රමාණයක් සූක්ෂ්ම ලෙස විදේශ රටවලට ගලා යාමට සැලැස්වූ ආනයන සමාගම් ජාලයක් (Shell Companies) වටලා, මූල්‍ය පද්ධතියේ ආරක්ෂාව තහවුරු කිරීමට රජය සහ ශ්‍රී ලංකා මහ බැංකුව කඩිනමින් පියවර ගෙන ඇත.
ආර්ථික විශ්ලේෂකයන් පෙන්වා දෙන පරිදි, භාණ්ඩ ආනයනය කිරීමේ මුවාවෙන් සිදුවූ මෙම මූල්‍ය වංචාව නීතියේ රැහැනට හසුකර ගැනීම මෙරට විදේශ සංචිත සුරැකීම වෙනුවෙන් තැබූ සාධනීය පියවරකි.
විමර්ශනවලට අනුව හොර ආනයන සමාගම් 100කට අධික ප්‍රමාණයක් ඉතා කෙටි කාල පරාසයන් තුළ විවිධ අනන්‍යතාවලින් පෙනී සිටිමින්, ව්‍යාජ විදුලි පණිවුඩ හුවමාරු (Telegraphic Transfers) හරහා ඩොලර් මිලියන 85ක (රුපියල් බිලියන 25කට අධික) මුදලක් විදේශයන්ට යොමුකර ඇත. භාණ්ඩ කිසිවක් රට තුළට නොපැමිණි මෙම "අදෘශ්‍යමාන ආනයන" හේතුවෙන් මෙරට ඖෂධ, ඉන්ධන සහ ආහාර වැනි අත්‍යවශ්‍ය ද්‍රව්‍ය මිලදී ගැනීමට තිබූ විදේශ සංචිතවලට සහ රුපියලේ ස්ථාවරත්වයට සෘජු බලපෑම් එල්ල වී ඇත.
පද්ධතිය ශක්තිමත් කිරීමට ගෙන ඇති ධනාත්මක පියවර
මෙම මූල්‍ය සිදුරු වැසීම සඳහා මූල්‍ය නියාමකයන් සහ රජය විසින් හඳුන්වා දී ඇති නව ආරක්ෂණ ක්‍රමවේද මෙසේය.
තත්‍ය කාලීන නිරීක්ෂණය (Real-time Tracking):
මින් ඉදිරියට රේගුවේ පූර්ණ අනුමැතිය සහ සත්‍යාපනයකින් තොරව වාණිජ බැංකුවලට ඩොලර් අත්තිකාරම් ගෙවීම් කළ නොහැක. සෑම ගනුදෙනුවක් සඳහාම අනන්‍ය හැඳුනුම් අංකයක් (Unique ID) නිකුත් කෙරෙන බැවින් මහ බැංකුවට ඕනෑම මුදල් ප්‍රවාහයක් ක්ෂණිකව නිරීක්ෂණය කළ හැක.
බදු සහ බැංකු පද්ධති බද්ධ කිරීම:
විදේශයන්ට Remit කරන සෑම ඩොලරයකටම සාපේක්ෂව භාණ්ඩ මෙරටට ඇතුළු වූවාදැයි තහවුරු කරගැනීම සඳහා බදු ගෙවන්නන්ගේ අංකය (TIN), බැංකු වාර්තා සහ රේගු දත්ත එකම ජාලයකට (Linked Network) සම්බන්ධ කර ඇත.
නීතිමය දඩයම දැඩි කිරීම:
මුදල් විශුද්ධිකරණය වැළැක්වීමේ පනත යටතේ මෙම විනිමය වංචා සාපරාධී වැරදි ලෙස වර්ගීකරණය කර ඇති අතර, වංචාවට උදව් කළ නිලධාරීන් සෙවීමට ද්විපාර්ශ්වික විමර්ශන ක්‍රියාත්මක වේ.
ව්‍යාපාරික ප්‍රජාව මුහුණ දෙන අභියෝග
මූල්‍ය පද්ධතිය සුරක්ෂිත කිරීමේ මෙම යහපත් ක්‍රියාවලිය තුළ, පවතින ප්‍රායෝගික දුෂ්කරතා ද සමබරව කළමනාකරණය කරගත යුතු බව ආර්ථික විශ්ලේෂකයෝ පෙන්වා දෙති.
පරිපාලනමය ප්‍රමාදයන්:
නව දැඩි රෙගුලාසි නිසා නීත්‍යානුකූල සහ අවංක ආනයනකරුවන්ට ලියකියවිලි සනාථ කිරීම සඳහා අමතර කාලයක් සහ පිරිවැයක් දැරීමට සිදුව ඇත.
අපනයනකරුවන්ගේ අවිශ්වාසය:
විදේශ විනිමය මෙරටට ගෙන්වා ගැනීමේ නීති දැඩි වීම නිසා අපනයනකරුවන් ද යම් මන්දගාමී ස්වභාවයක් පෙන්වන අතර, රජය විසින් ඔවුන් දිරිමත් කරන නම්‍යශීලී යාන්ත්‍රණයක් ද පවත්වා ගත යුතුය.
කෙසේ වෙතත්, කෙටි කාලීන පරිපාලනමය බාධා මධ්‍යයේ වුවද, හොර මූල්‍ය ජාලයන් මෙලෙස වටලා විනාශ කිරීම දිගුකාලීන ආර්ථික ස්ථාවරත්වයට, මූල්‍ය විනිවිදභාවයට සහ ජාත්‍යන්තර ආයෝජකයන්ගේ විශ්වාසය දිනා ගැනීමට රජය ලැබූ සුවිශේෂී ජයග්‍රහණයකි.
(සටහන | සම්පත් ධීරසේකර)
මුලාශ්‍රය :
Fake Import Firms Drain Millions from Sri Lanka
