වරාය පරිශ්‍රයේ කන්ටේනර් සිරවීමක් හේතුවෙන් ඉදිරි දිනවල අත්‍යවශ්‍ය ආහාර ද්‍රව්‍ය හිඟයක් මතුවිය හැකි බවට පළවන වාර්තා වෙළෙඳ, වාණිජ හා ආහාර සුරක්ෂිතතා අමාත්‍ය වසන්ත සමරසිංහ තරයේ ප්‍රතික්ෂේප කරයි. ප්‍රතික්ෂේප වී ඇත්තේ ප්‍රමිතියෙන් තොර බහාලුම් කිහිපයක් පමණක් බවත්, වෙළෙඳපොළට අඛණ්ඩව භාණ්ඩ සැපයුම ලැබෙන බවත් අමාත්‍යවරයා අවධාරණය කරයි.
කොළඹ වරාය තුළ භාණ්ඩ බහාලුම් (Containers) ගොඩගැසී සිරවීම හේතුවෙන් ඉදිරි දින කිහිපය තුළ මෙරට වෙළෙඳපොළේ අත්‍යවශ්‍ය ආහාර ද්‍රව්‍යවල බරපතළ හිඟයක් නිර්මාණය විය හැකි බවට සමාජය තුළ පැතිර යන ප්‍රචාරයන්හි කිසිදු සත්‍යතාවක් නොමැති බව වෙළෙඳ, වාණිජ හා ආහාර සුරක්ෂිතතා අමාත්‍ය වසන්ත සමරසිංහ සඳහන් කරයි.
මාධ්‍ය වෙත අදහස් දක්වමින් අමාත්‍යවරයා පෙන්වා දුන්නේ, පසුගිය දිනවල මෙවැනි අසත්‍ය මතයක් සමාජගත කිරීමට සංවිධානාත්මක උත්සාහයක් ක්‍රියාත්මක වූ බවයි. වරාය මෙහෙයුම් කටයුතු සාමාන්‍ය පරිදි සිදුවන අතර, ආහාර තොග වෙළෙඳපොළට මුදාහැරීමේ කිසිදු බාධාවක් නොමැති බව ඔහු තහවුරු කළේය.
නැව් පැමිණීම ඉහළට; අත්‍යවශ්‍ය භාණ්ඩ සැපයුම සුරක්ෂිතයි
වරාය මෙහෙයුම් සම්බන්ධයෙන් වැඩිදුරටත් කරුණු පැහැදිලි කළ අමාත්‍යවරයා, මෙරට ප්‍රධාන වරායන් වෙත පැමිණෙන නෞකා ප්‍රමාණය මෙන්ම මෙහෙයවනු ලබන බහාලුම් ධාරිතාවද සාමාන්‍ය මට්ටමට වඩා ඉහළ ගොස් ඇති බව පෙන්වා දුන්නේය.
"කන්ටේනර් හිරවීමක් හින්දා අත්‍යවශ්‍ය භාණ්ඩ හිඟයක් එයි කියන කතාවක් හදන්න පසුගිය දිනවල උත්සාහයක් තිබුණා. එහෙම කිසිම කන්ටේනර් හිරවීමක් නෑ. වරායන් වලට වැඩිපුර නැව් සහ බහාලුම් එන ප්‍රවණතාවක් තමයි තියෙන්නේ. මේ මොහොත වන විටත් කිසිදු අත්‍යවශ්‍ය භාණ්ඩ හිඟයක් වාර්තා වෙලා නෑ," යනුවෙන් අමාත්‍යවරයා පැවසීය.
සීනි, පරිප්පු, අර්තාපල් සහ ලූණු ඇතුළු ප්‍රධාන පාරිභෝගික ද්‍රව්‍ය අඛණ්ඩව වෙළෙඳපොළට නිකුත් කෙරෙන බවත්, ඒ හරහා ඇතැම් භාණ්ඩවල සිල්ලර මිල ගණන් පහළ මට්ටමක පවත්වා ගැනීමට හැකිවී ඇති බවත් අමාත්‍යවරයා වැඩිදුරටත් කියා සිටියේය.
මිරිස් කන්ටේනර් ප්‍රශ්නය: ප්‍රතික්ෂේප වූයේ තෙතමනය වැඩි තොග පමණයි
ආහාර තොග සිරවීමක් පිළිබඳව සමාජයේ අවධානයට ලක්වූ මිරිස් බහාලුම් පිළිබඳව අදහස් දැක්වූ අමාත්‍යවරයා, එය නිරෝධායන හා ප්‍රමිති නීතිරීතිවලට අදාළ තාක්ෂණික කාරණයක් පමණක් බව පැහැදිලි කළේය.
පසුගිය මාස නවයක කාලය තුළ අත්‍යවශ්‍ය භාණ්ඩ රැගත් බහාලුම් 2,000කට අධික ප්‍රමාණයක් පරීක්ෂා කර සාර්ථකව වෙළෙඳපොළට නිදහස් කර ඇති බව පෙන්වා දුන් ඔහු, රඳවාගෙන ඇත්තේ නියමිත තත්ත්ව පරීක්ෂාවලදී තෙතමනය අධික බව තහවුරු වූ මිරිස් බහාලුම් 7ක් හෝ 8ක් වැනි සුළු ප්‍රමාණයක් පමණක් බව සඳහන් කළේය. පාරිභෝගික සෞඛ්‍ය ආරක්ෂාව වෙනුවෙන් මෙවැනි ප්‍රමිතියෙන් තොර තොග ප්‍රතික්ෂේප කිරීම සාමාන්‍ය ක්‍රමවේදය බව වෙළෙඳ අංශ නිරීක්ෂකයෝද පෙන්වා දෙති.
කෘත්‍රිම හිඟයන් මැඬලීමේ අභියෝගය
වෙළෙඳපොළ ආරංචි මාර්ග පෙන්වා දෙන්නේ උත්සව හා වාරික ඉල්ලුම ඉහළ යන කාලසීමාවන් ආසන්නයේ මෙවැනි කෘත්‍රිම හිඟයන් හෝ සැපයුම් ජාල බිඳවැටීම් පිළිබඳ කටකතා නිර්මාණය වීමෙන් අනවශ්‍ය ලෙස භාණ්ඩ රැස්කිරීම් (panic buying) සහ මිල ඉහළ දැමීම් සිදුවිය හැකි බවයි.
පාරිභෝගික ජනතාව නොමඟ යවන මෙවැනි අසත්‍ය තොරතුරුවලට හසු නොවී, නිල නියාමන ආයතන නිකුත් කරන දත්ත සහ වෙළෙඳපොළ යථාර්ථය පිළිබඳව අවධානයෙන් පසුවීම වැදගත් බව ආර්ථික විශ්ලේෂකයෝ සිහිපත් කරති.