කොළඹ ප්‍රධාන මහේස්ත්‍රාත් අසංග එස්. බෝදරගම හමුවේ මෙම නඩුව අද කැඳවූ අවස්ථාවේදී මෙම නියෝගය ප්‍රකාශයට පත් කෙරිණි.
රුපියල් මිලියන 100 ක (ඇමෙරිකානු ඩොලර් 330,000 කට ආසන්න) අල්ලස් මුදලක් ලබාගැනීමේ සිද්ධියක් සම්බන්ධයෙන් අල්ලස් කොමිසම විසින් සැකකරුවකු ලෙස නම් කර සිටින පාර්ලිමේන්තු මන්ත්‍රීවරයා මෙලෙස තවදුරටත් රක්ෂිත බන්ධනාගාරගත කිරීමට නියම විය.
අල්ලස් කොමිසම අධිකරණයට දැක්වූ කරුණු
අල්ලස් කොමිසම වෙනුවෙන් පෙනී සිටි විමර්ශන නිලධාරීන් අධිකරණය හමුවේ කරුණු දක්වමින් ප්‍රකාශ කළේ අදාළ ගනුදෙනුවට භාවිත කර ඇති මුදල් නීතිවිරෝධී වත්කම් විශුද්ධිකරණයෙන් (Money Laundering) උපයාගත් ඒවා බවට ඉන්දීය රජය විසින් මෙරටට දැනුම් දී ඇති බවයි.
රුපියල් මිලියන 70 ක මුදලක් නිමල් පෙරේරා නැමැත්තා හරහා අවස්ථා දෙකකදී (මිලියන 35 බැගින්) සැකකරු භාරගෙන ඇති බව ඔහුගේම ප්‍රකාශවලින් තහවුරු වී ඇති බව විමර්ශන නිලධාරීහු පැවසූහ.
ප්‍රශ්නගත ඉඩම ක්‍රිෂ් සමාගමට පැවරීමේදී රාජ්‍ය ආයතන අසාමාන්‍ය වේගයකින් ක්‍රියා කර ඇති අතර, එකී අධ්‍යක්ෂ මණ්ඩල අනුමැතිය එක් දිනක් තුළ ලබාදී තිබේ.
එකල ශ්‍රී ලංකා මහ බැංකුව ආයෝජනය කර තිබූ ඉඩමක් මෙලෙස නාගරික සංවර්ධන අධිකාරිය හරහා ක්‍රිෂ් සමාගමට කඩිනමින් පවරා ඇත.
එවකට ආර්ථික සංවර්ධන අමාත්‍යවරයා, ආරක්ෂක ලේකම්වරයා සහ ජනාධිපතිවරයා ලෙස සැකකරුගේ ළඟම ඥාතීන් කටයුතු කළ සමයක මෙම ගනුදෙනුව සිදුව ඇති බව පෙන්වා දුන් කොමිසම, දූෂණ විරෝධී නීති යටතේ ඉදිරියේදී අධිචෝදනා පත්‍ර ගොනු කරන බව දැනුම් දුන්නේය.
විත්තියේ නීතිඥ තර්කය
නාමල් රාජපක්ෂ වෙනුවෙන් පෙනී සිටි ජනාධිපති නීතිඥ අලි සබ්රි ඇප ඉල්ලීමක් ඉදිරිපත් කරමින් අධිකරණය හමුවේ කරුණු දැක්වීය.
සැකකරු අධිකරණයට ඉදිරිපත් කර ඇත්තේ අල්ලස් පනත ප්‍රකාරව බවත්, නව දූෂණ විරෝධී විධිවිධාන යටතේ නොවන බවත් ජනාධිපති නීතිඥවරයා මෙහිදී පෙන්වා දුන්නේය.
එබැවින් අල්ලස් කොමිසමේ අධ්‍යක්ෂ ජනරාල්වරයා නිකුත් කර ඇති සහතිකයේ නීතිමය වලංගුතාවක් නොමැති බැවින්, එය සුවිශේෂී කරුණක් ලෙස සලකා තම සේවාදායකයාට ඇප ලබාදෙන ලෙස ඔහු ඉල්ලා සිටියේය.
දෙපාර්ශ්වයේ කරුණු දැක්වීම් සලකා බැලූ කොළඹ ප්‍රධාන මහේස්ත්‍රාත්වරයා, ඇප ඉල්ලීම ප්‍රතික්ෂේප කරමින් සැකකරු ලබන ඔක්තෝබර් මස දක්වා තවදුරටත් රක්ෂිත බන්ධනාගාරගත කිරීමට නියෝග කළේය.
