IMF ගිවිසුම 2027 මාර්තු මාසයෙන් අවසන්: ණය ගෙවීම ඇරඹෙන 2028ට පෙර විධිමත් ආර්ථික සැලැස්මක අවශ්‍යතාව අවධාරණය කෙරේ
ශ්‍රී ලංකාවේ විදේශ ණය ප්‍රතිව්‍යුහගතකරණ ක්‍රියාවලියේ සහන කාලය අවසන් වී, 2028 වසරේ සිට යළිත් විදෙස් ණය වාරික ගෙවීමට සිදුවන පසුබිමක් තුළ, මෙරට විදේශ විනිමය සංචිතය අමෙරිකානු ඩොලර් බිලියන 15ක් දක්වා වර්ධනය කරගැනීමේ දැඩි අවශ්‍යතාවක් පවතින බවට හිටපු ජනාධිපති රනිල් වික්‍රමසිංහ අනතුරු අඟවයි. ජාත්‍යන්තර මූල්‍ය අරමුදල (IMF) අපේක්ෂා කරන එකී ඉලක්කය සපුරා ගැනීමට අපොහොසත් වුවහොත් රටට යළිත් දරුණු ආර්ථික අර්බුදයකට මුහුණදීමට සිදුවනු ඇති බව හෙතෙම පෙන්වා දෙයි.
හිටපු අමාත්‍ය රංජිත් සියඹලාපිටිය විසින් රචිත "යුධ දෙකකට උර දී" ග්‍රන්ථය එළිදැක්වීමේ උත්සවයට කොළඹදී එක්වෙමින් හිටපු ජනාධිපතිවරයා මෙම කරුණු අනාවරණය කළේය.
ඩොලර් බිලියන 7ක ආර්ථික හිඩැස
වර්තමාන ශ්‍රී ලංකා මහ බැංකුවේ දත්ත සහ පුරෝකථනවලට අනුව මේ වසර අවසන් වන විට මෙරට විදේශ සංචිත ප්‍රමාණය ඩොලර් බිලියන 8ක් පමණ වනු ඇතැයි අපේක්ෂා කෙරේ. කෙසේ වෙතත්, 2028 වන විට ඩොලර් බිලියන 15ක සීමාවට ළඟා වීමට නම් ඉදිරි වසර දෙකක කාලය තුළ තවත් ඩොලර් බිලියන 7ක ප්‍රමාණයක් උපයා ගැනීමේ දැවැන්ත අභියෝගය රට හමුවේ පවතී.
මෙම ඩොලර් බිලියන 7ක හිඩැස පියවා ගැනීම සඳහා ප්‍රායෝගික වැඩපිළිවෙළක් මෙතෙක් ඉදිරිපත්ව නොමැති බව සිය දේශනයේදී පෙන්වා දුන් රනිල් වික්‍රමසිංහ හිටපු ජනාධිපතිවරයා, අපනයන ආදායම් සහ විදේශ ආයෝජන කඩිනමින් ඉහළ නංවා ගැනීමේ වැදගත්කම අවධාරණය කළේය. ඊට අමතරව ඩොලර් බිලියන 3.2ක ණය මුදලක් පියවීම වෙනුවෙන් තවත් ඩොලර් බිලියන 3ක බැඳුම්කර නිකුත් කිරීමට සිදුවන පසුබිමක් තුළ විදේශ විනිමය උත්පාදනය අතිශය තීරණාත්මක සාධකයක් බව ඔහු කියා සිටියේය.
2027න් පසු ඉදිරි මාවත
ශ්‍රී ලංකාව සහ ජාත්‍යන්තර මූල්‍ය අරමුදල අතර පවතින වත්මන් විස්තීර්ණ අරමුදල් පහසුකමේ (EFF) ගිවිසුම් කාලය 2027 මාර්තු මාසයෙන් අවසන් වීමට නියමිතය. ඉන් අනතුරුව, නැවත වරක් ජාත්‍යන්තර මූල්‍ය වෙළෙඳපොළ සමඟ ගනුදෙනු කිරීමේදී ශ්‍රී ලංකාවට ස්වාධීනව සිය ණය ගෙවීමේ හැකියාව තහවුරු කිරීමට සිදුවෙයි. ආර්ථික විශේෂඥයින්ද පෙන්වා දෙන්නේ 2027 න් පසු එළැඹෙන කාලසීමාව ශ්‍රී ලංකාවේ ආර්ථික ස්ථායීතාව මනින සැබෑ පරීක්ෂණය වනු ඇති බවයි.
හිටපු ජනාධිපතිවරයා සිය පාලන සමය තුළ සම්මත කළ මහ බැංකු පනත, රාජ්‍ය මුදල් පනත, රාජ්‍ය ණය කළමනාකරණ පනත සහ ආර්ථික පරිවර්තන පනත යන නීතිමය රාමුව ගෙන ආවේ මෙම අනාගත අවදානමට මුහුණ දීම සඳහා වුවත්, වත්මන් රජය ආර්ථික පරිවර්තන පනත ක්‍රියාත්මක නොකරන බවට ගෙන ඇති තීරණය හමුවේ, එම රික්තය පියවීම සඳහා නව විකල්ප ආර්ථික සැලැස්මක් කඩිනමින් රටට ඉදිරිපත් විය යුතු බවද ඔහු මෙහිදී විශ්ලේෂණාත්මකව පෙන්වා දුන්නේය.
"තුන්වැනි යුද්ධයේ" අභියෝගය
රංජිත් සියඹලාපිටිය ගේ ග්‍රන්ථය මගින් අතීත අභියෝගයන් පිළිබඳව කතා කළද, රට හමුවේ ඇති "තුන්වැනි යුද්ධය" වන්නේ 2028 ණය ගෙවීමේ අභියෝගය බව හිටපු ජනාධිපතිවරයා ප්‍රකාශ කළේය. මෙම ආර්ථික සටනින් පරාජයට පත්වුවහොත් රට යළිත් බංකොලොත් භාවයට පත්වීම වැළැක්විය නොහැකි වනු ඇතැයි ඔහු අනතුරු ඇඟවීය.
ව්‍යවස්ථා සංශෝධන හෝ දේශපාලන මාතෘකාවලට වඩා රටේ ඉදිරි අවධානය යොමු විය යුත්තේ මෙම මූල්‍ය අභියෝගය ජයගැනීමට බව අවධාරණය කළ හිටපු ජනාධිපතිවරයා, මේ සම්බන්ධයෙන් පාර්ලිමේන්තුව තුළ මෙන්ම ඉන් පිටතද ප්‍රමාණවත් කතිකාවතක් තවමත් ගොඩනැගී නොමැති බව කණගාටුවෙන් යුතුව සඳහන් කළේය.
ජාත්‍යන්තර ආර්ථික නිරීක්ෂකයින්ගේද අදහස වන්නේ ශ්‍රී ලංකාව සිය ණය ප්‍රතිව්‍යුහගතකරණයේ පළමු අදියර සාර්ථකව නිම කර ඇති නමුත්, සැබෑ අභියෝගය වන්නේ හුදෙක් ණය කල් දමා ගැනීම පමණක් නොව, ආර්ථික වර්ධනය වේගවත් කරමින් එම ණය ගෙවීමට අවශ්‍ය ධාරිතාව රට තුළ ස්ථාවරව ගොඩනගා ගැනීම බවයි.
