ඒ අද හිටපු මන්ත්‍රීවරු පිරිසක් එහි සංචාරයක නියැලුණු අවස්ථාවේ දීය.
අදාළ විදුලි බිල නොගෙවීම හේතුවෙන් මේ වනවිට එම උෂ්ණත්ව පාලිත කෘෂිකර්ම ගබඩාවේ විදුලිය විසන්ධි කර ඇතැයිද වාර්තා වේ.
පාර්ලිමේන්තු මන්ත්‍රී හර්ෂ ද සිල්වා ගේ යෝජනාවකට අනුව මීට වසර කිහිපයකට ඉහතදී ඉන්දියානු රජයේ ආධාර ඇතිව මෙම උෂ්ණත්ව පාලිත කෘෂිකර්ම ගබඩාව ඉදිකර තිබුණි.
ඒ අනුව එහි විවෘත කිරීම පසුගිය අප්‍රේල් මස 5 වෙනිදා ජනාධිපති අනුර කුමාර දිසානායක ගේ ආරාධනයෙන් ඉන්දියානු අග්‍රාමාත්‍ය නරේන්ද්‍ර මෝදි දුරස්ථ පාලකයක් උපයෝගී කරගනිමින් විවෘත කරන්නට යෙදුණි.
පැපිලියාන සුනේත්‍රා‍දේවි රජමහාවිහාරාධිපති නාගරික මන්ත්‍රි පූජ්‍ය වැල්ලම්පිටියේ සුමනධම්ම හිමි ප්‍රමුඛ මහා සංඝරත්නයත්, හිටපු පාර්ලිමේන්තු මන්ත්‍රිවරුන්වන උදය ගම්මන්පිල, නිමල් පියතිස්ස, සංජීව එදිරිමාන්න, ප්‍රේමනාත් සී. දොලවත්ත, ඇතුළු විපක්ෂයේ දේශපාලන පක්ෂ කිහිපයක නායකයින් සහ නියෝජිතයින්ද මෙම දඹුල්ලේ ගමනට එක්ව සිටියේය.
එහිදී කෘෂිකර්ම උෂ්ණත්ව පාලිත කෘෂිකර්ම ගබඩාවේ ගේට්ටු වසා දමා තිබෙනු දක්නට ලැබුණු අතර, පසුව එහි මුරකරු සම්බන්ධ කරගනිමින් හිටපු මන්ත්‍රී පිරිස ගබඩා පරිශ්‍රයට ඇතුළු වී තිබේ.
''ආහාර ගබඩාකිරීමේ ශිතාගාරය විවෘත කළදා සිට අක්‍රියයි''
මෙම නිරීක්ෂණ චාරිකාවට එක්ව සිටි නව ජනතා පෙරමුණේ නායක සුගීෂ්වර බණ්ඩාර ප්‍රකාශ කළේ මීට මාස කිහිපයකට පෙර විවෘත කරනලද ආහාර ගබඩාකිරීමේ ශිතාගාරය විවෘත කළදා සිට අක්‍රියව පවතින බවයි.
මෙරටට පැමිණි ඉන්දිය අග්‍රාමාත්‍ය නරේන්ද්‍රමෝදි විසින් මෙම ශීතාගාරය විවෘතකළ බව සඳහන් කළ සුගීෂ්වර බණ්ඩාර පවසා සිටියේ, ශීතාගාරය ක්‍රියාත්මක නොවීම නිසා එළවළු පළතුරු ඇතුළු ආහාර වර්ග තොග වශයෙන් ගබඩාකිරීමට නොහැකි වී ඇති බවයි.
විවිධ ආහාර වර්ග රැසක් අපතේ යන බවත් එම නිසා දඹුල්ල ඇතුළු ප්‍රදේශ රැසක ගොවි ජනතාව දැඩි අසරණතාවයකට පත්ව ඇති බව සුගීෂ්වර බණ්ඩාර පැවසිය.
මෙම කරුණු සියල්ල සොයාබලා අදාළ බලධාරීන්ගේ අවධානය යොමුකිරීමටත් රටට මේ බව ප්‍රකාශ කිරීම මෙම ගමනේ අරමුණ බව සුගීෂ්වර බණ්ඩාර වැඩිදුරත් පවසා සිටියේය.
