ගම්මන්පිලගෙන් අභියාචනාධිකරණයට රිට් පෙත්සමක්

තමන් අත්අඩංගුවට ගැනීම වළකාලන අතුරු නියෝගයක් නිකුත් කරන්නැයි ඉල්ලා හිටපු අමාත්‍ය උදය ගම්මන්පිල, අභියාචනාධිකරණය වෙත රිට් පෙත්සමක් අද (01) ගොනු කර ඇත.

හිටපු අමාත්‍යවරයා විසින් ගොනුකොට ඇති මෙම රිට් පෙත්සම උත්තරකරුවන් වශයෙන් ආරක්ෂක අමාත්‍යවරයා ඇතුළු පිරිසන් නම් කරනු ලැබ සිටිති.

ඒ සම්බන්ධයෙන් මාධ්‍ය නිවේදනයක් නිකුත්කර ඇති පිවිතුරු හෙළ උරුමයේ මාධ්‍ය ලේකම් අරවින්ද අතුකෝරළ පවසන්නේ, තමන් නීති විරෝධි සහ අසාධාරණ ලෙස අත්අඩංගුවට ගැනීම වළක්වන්නැයි ඉල්ලා තම පක්ෂයේ නායක නීතිඥ උදය ගම්මන්පිල නඩුවක් ගොනු කර ඇති බවයි.

එම මාධ්‍ය නිවේදනයට අනුව, හිටපු කොටි ත්‍රස්තවාදි නායකයෙකුගෙන් ලබා ගත් ගොතන ලද සාක්ෂි මත හිටපු නාවික හමුදාපති නිශාන්ත උළුගේතැන්න ව අත්අඩංගුවට ගැනීම විවේචනය කරමින් 2025 අගෝස්තු 5වන දින ගම්මන්පිල මාධ්‍ය හමුවක් පවත්වා ඇත.

එකී ප්‍රකාශය තුළ කිසිම ජනවර්ගයක් පිළිබඳ කිසිම සඳහනක් නොමැති බවත්, එසේ ප්‍රකාශ කිරීම ආණ්ඩුක්‍රම ව්‍යවස්ථාවේ 14(1) වගන්තියෙන් තහවුරු කර ඇති භාෂණයේ නිදහස භුක්ති විඳීමක් වුව ද  එකී ප්‍රකාශය තුළින් ජනවර්ග අතර අසමගිය ඇති කරන හෙයින් සිවිල් සහ දේශපාලන අයිතිවාසිකම් පිළිබඳ ජාත්‍යන්තර සම්මුති පනතේ (අයිසීසීපීආර් පනතේ) 3(1) වගන්තිය සහ දණ්ඩ නීති සංග්‍රහයේ 120 වගන්තිය යටතේ වරදක් කර ඇති බවට විමර්ශනයක් ආරම්භ කර ඇති බව අපරාධ පරීක්ෂණ දෙපාර්තමේන්තුව විසින් 2025 අගෝස්තු 27 දින කොටුව මහෙස්ත්‍රාත් අධිකරණයට වාර්තා කර ඇත.

අදාළ නිවේදනයේ තව දුරටත් සඳහන් වන අන්දමට උදය ගම්මන්පිල ජාතික යුතුකමක් ඉටු කිරීම මත අසාධාරණ ලෙස අත්අඩංගුවට ගැනීමට යන හෙයින් ඔහු අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඔහු අධිකරණයෙන් ඉල්ලා සිටියි.

එසේම මර්ධනකාරී  ICCPR පනත දේශපාලඥයෙකු අත්අඩංගුවට ගැනීම සදහා යොදාගනු ලබන්නේ ඉතිහාසයේ පළමු වතාවට බව ද ඒම නිවේදනයෙන් අවධාරණයය කරයි.

 අරවින්ද අතුකෝරළ විසින් නිකුත්කර ඇති සම්පූර්ණ මාධ්‍ය නිවේදනය මතු පළවේ.

උදය ගම්මන්පිල ගොනු කර ඇති නඩුවේ පිටපත මෙතනින්.