ෆේස්බුක් සටහනක් මුල් කරගනිමින් සෞදි අරාබියේදී මරණ දණ්ඩනය නියම වූ අනෝජන් සිවරාසා වෙනුවෙන් එරට ශ්‍රේෂ්ඨාධිකරණය වෙත ඉදිරිපත් කෙරෙන විශේෂ අභියාචනය අද (11) නිල වශයෙන් ගොනු කෙරිණි. රියාද් හි පිහිටි ශ්‍රී ලංකා තානාපති කාර්යාලයේ මැදිහත්වීමෙන් මෙම නීතිමය ලියකියවිලි බාරදීම සිදු විය.
සෞදි අරාබියේ ශ්‍රී ලංකා තානාපති ඕ. එල්. අමීර් අජ්වාඩ් මහතාගේ සම්බන්ධීකරණයෙන් යුතුව, කොළඹින් ගිය ජනාධිපති නීතිඥවරුන් සහ එරට ප්‍රමුඛ නීති විශාරදයන් එක්ව සාකච්ඡා වට කිහිපයක් ඔස්සේ මෙම අභියාචනාව සකස් කර තිබේ.
මරණ දණ්ඩනය දක්වා නඩුව පෙරළුණු හැටි
පහළ අධිකරණයකින් අනෝජන්ට මුලින් නියම වූයේ පස් වසරක සිර දඬුවමකි. එහෙත් සෞදි නීතිපතිවරයා කළ අභියාචනයක් සලකා බැලූ අභියාචනාධිකරණය, චෝදනාව ඉස්ලාමීය නීතියේ ‘හද්’ (Hadd) ඝනයට අයත් බරපතළ වරදක් සේ සලකමින් තීන්දුව මරණ දණ්ඩනය දක්වා දැඩි කළේය.
ශ්‍රී ලංකා රජය සාමාන්‍යයෙන් තනි පුද්ගල නඩු වෙනුවෙන් සෘජුව මැදිහත් නොවන නමුදු, මෙම නඩුවේ පවතින සුවිශේෂී සහ සංවේදී මානුෂීය ස්වභාවය සලකා විදේශ කටයුතු අමාත්‍යාංශය මඟින් රුපියල් මිලියන ගණනක නීතිමය වියදම් දරමින් මෙම නීතිඥ කණ්ඩායම රියාද් වෙත යැවීමට පියවර ගත්තේය. ඔක්තෝබර් 14 වැනිදාට පෙර මෙම අභියාචනය ගොනු කළ යුතුව තිබිණි.
යුද බිය මැද නීතිඥයන් සිරවෙයි
අභියාචනා ලේඛන සකස් කිරීම අවසන් වුවද, නීති කණ්ඩායමට වහා දිවයිනට පැමිණීමට අවස්ථාව සැලසුණේ නැත. යේමනයේ හූති සටන්කාමීන් එල්ල කළ මිසයිල සහ ඩ්‍රෝන ප්‍රහාර හේතුවෙන් රියාද් ගුවන් තොටුපළේ මෙහෙයුම් කටයුතු ඇණහිටීම ඊට හේතුවයි.
ශ්‍රීලන්කන් ගුවන් සේවය ද ඔක්තෝබර් 18 දක්වා රියාද් වෙත ගුවන් ගමන් අත්හිටුවා ඇත. ගොඩබිම් මාර්ග ඔස්සේ අසල්වැසි රටකට ගොස් එතැනින් කොළඹ බලා පියාසර කිරීමේ විකල්පය කෙරෙහි අවධානය යොමු වුවද, පවතින දුර ප්‍රමාණය සහ ආරක්ෂක අවදානම් සලකා එම අදහස අත්හිටුවීමට බලධාරීහු තීරණය කළහ.
නීති කණ්ඩායමේ බලාපොරොත්තුව
අතිරේක සොලිසිටර් ජනරාල් අසාද් නවාවි, ජනාධිපති නීතිඥ ෆයිසර් මුස්තාපා, ජනාධිපති නීතිඥ උපුල් කුමාරප්පෙරුම සහ නීතිඥ හෆීල් ෆාරිස් යන මහත්වරුන්ගෙන් සමන්විත දූත පිරිස, ජෙඩා හි කොන්සල් ජනරාල් විනිසුරු මොහොමඩ් ලෆාර් ද කැටුව මෙම නෛතික කරුණු දැක්වීම් සම්පාදනය කළහ.
තානාපති අමීර් අජ්වාඩ් මහතා රියාද් නුවර සිට කිලෝමීටර් 450ක් පමණ ඈතින් පිහිටි දම්මාම් මධ්‍යම බන්ධනාගාරයේ රඳවා සිටින අනෝජන් සිවරාසා හමුවී ඔහුගේ සුවදුක් විමසා බැලීමට ද කටයුතු කළේය.
සෞදි ශ්‍රේෂ්ඨාධිකරණය මූලික වශයෙන් පහළ අධිකරණවල නීතිමය සහ ක්‍රියා පටිපාටිමය දෝෂ සමාලෝචනය කරන ඉහළම ආයතනය බැවින්, ඉදිරිපත් කළ නීතිමය කරුණු ඔස්සේ සාධාරණ සහනයක් ලැබෙනු ඇතැයි නීති නියෝජිතයෝ විශ්වාසය පළ කරති.
වැඩිදුර තොරතුරු සඳහා මූලාශ්‍ර: