සංඝ සම්මුතිය සහ බන්ධනාගාර රෙගුලාසි අතර ගැටුම
බන්ධනාගාරගත කර සිටින පූජ්‍ය ගලගොඩඅත්තේ ඥානසාර හිමියන්ගේ සිවුර ඉවත් කර බන්ධනාගාර ඇඳුම් ඇන්දවීම සම්බන්ධයෙන් මේ වන විට ආගමික, නෛතික මෙන්ම සමාජීය ක්ෂේත්‍රයන්හි පුළුල් සංවාදයක් මතු වී පවතී.
විපක්ෂ නායක සජිත් ප්‍රේමදාස පන්නිපිටිය රුක්මල්ගම ධර්ම විජයාලෝක විහාරයට පැමිණ කෝට්ටේ ශ්‍රී කල්‍යාණි සාමග්‍රී ධර්ම මහා සංඝ සභාවේ මහානායක අතිපූජ්‍ය ඉත්තෑපානේ ධම්මාලංකාර මහා නාහිමියන් බැහැදුටු අවස්ථාවේදී මෙම කරුණ විශේෂ අවධානයට ලක් විය.
එහිදී මහානායක හිමියන් පෙන්වා දුන්නේ, භික්ෂුවකගේ චීවරය ඉවත් කිරීමේ බලය හිමිවන්නේ මහා සංඝරත්නයට පමණක් බවයි. ඥානසාර හිමියන් නියෝජනය කරන කෝට්ටේ සංඝ සභාවෙන් හෝ ඒ පිළිබඳ විමසීමකින් තොරව මෙවැනි ක්‍රියාමාර්ගයක් ගැනීම කනගාටුදායක බවත්, මෙරට ත්‍රෛනිකායික මහා සංඝරත්නයෙන් බහුතරයක් ඊට විරෝධය පළ කරන බවත් උන්වහන්සේ ප්‍රකාශ කළහ. මේ සම්බන්ධයෙන් ජනාධිපතිවරයා හමුවී කරුණු පැහැදිලි කිරීමට බලාපොරොත්තු වන බව ද උන්වහන්සේ සඳහන් කළහ.
නීතියේ ආධිපත්‍යය සහ බෞද්ධ විනය පද්ධතිය
නිරීක්ෂකයින් පෙන්වා දෙන්නේ මෙහි එක් පසෙකින් රටේ අපරාධ නීතිය සහ බන්ධනාගාර ආඥාපනතේ සඳහන් ඒකාකාරී නීතිමය ක්‍රියාපටිපාටිය පවතින බවයි. රජයේ ස්ථාවරය වී ඇත්තේ අධිකරණ නියෝගයකින් සිරදඬුවම් නියම වූ පුද්ගලයකුට බන්ධනාගාර පද්ධතිය තුළ සැලකීමේදී අදාළ ආඥාපනත අනුව කටයුතු කිරීම නිලධාරීන්ගේ වගකීමක් බවයි.
අනෙක් අතින්, මෙරට ආණ්ඩුක්‍රම ව්‍යවස්ථාවේ 9 වැනි වගන්තිය යටතේ බුද්ධ ශාසනයට ලබා දී ඇති විශේෂ ව්‍යවස්ථාපිත ආරක්ෂාව සහ සියවස් ගණනාවක් මුළුල්ලේ පැවත එන සංඝාධිකරණ හෝ විනය සම්ප්‍රදායන් නොසලකා හැරීම ගැටලුකාරී බව සංඝරත්නයේ මතය වී තිබේ.
මේ අතර, බන්ධනාගාර බලධාරීන් ගත් මෙම තීරණය බලරහිත කරන ලෙස ඉල්ලා අභියාචනාධිකරණය හමුවේ රිට් පෙත්සමක් ද ගොනු කර ඇති හෙයින්, ගැටලුව නීතිමය මෙන්ම අධිකරණමය ක්‍රියාදාමයකට ද යොමුව ඇත.
දේශපාලන මැදිහත්වීම සහ සියුම් සමබරතාව
සාකච්ඡාවෙන් අනතුරුව අදහස් දැක්වූ විපක්ෂ නායක සජිත් ප්‍රේමදාස කියා සිටියේ, රටේ නීතිය ක්‍රියාත්මක වන අතරතුරම මෙරට ඓතිහාසික ආගමික හා සංස්කෘතික අනන්‍යතාවන්ට ගරු කිරීම අත්‍යවශ්‍ය කරුණක් බවයි. බුදුදහම සුරක්ෂිත කරන අතරතුරම සියලු ආගම් හා ජාතීන්ට හිමි රැකවරණය තහවුරු කරමින්, එකම ශ්‍රී ලාංකික අනන්‍යතාවක් යටතේ ඉදිරියට යා යුතු බව ඔහු සඳහන් කළේය.
දේශපාලන හා නීති විශේලේෂකයින් පෙන්වා දෙන්නේ, නීතිය සැමට එක හා සමානව ක්‍රියාත්මක කිරීමේ ප්‍රජාතන්ත්‍රවාදී අවශ්‍යතාව සහ ශ්‍රී ලාංකේය සංස්කෘතික මූලයන් තුළ භික්ෂු විනය කෙරෙහි දක්වන සංවේදීතාව අතර මනා තුලනයක් පවත්වා ගැනීම මෙවැනි අවස්ථාවක පාලකයන් හමුවේ ඇති ප්‍රධාන අභියෝගය බවයි.
'සිවුරට යුක්තිය' - කොළඹ බලා එන පාගමනේ දෙවන දිනය අද
බන්ධනාගාර ගතව සිටින පූජ්‍ය ගලගොඩඅත්තේ ඥානසාර හිමි වෙනුවෙන් හා භික්ෂූන්ගේ ආගමික අයිතිවාසිකම් වෙනුවෙන් මහා සංඝරත්නයේ මූලිකත්වයෙන් ආරම්භ කළ පා ගමන අද (11) දෙවන දිනටත් පැවැත්වේ.
සිවුරට යුක්තිය - ජාතික අධිෂ්ඨාන පූජාව සහ නිදහසේ පාද යාත්‍රාව ඊයේ (10) උදෑසන මහනුවර ඓතිහාසික ශ්‍රී දළදා මාලිගාව අභියසින් ආරම්භ විය.
කඩුගන්නාව ප්‍රදේශයෙන් පා ගමනේ පළමු දිනය ඊයේ පස්වරුවේ අවසන් කෙරුණු අතර එය අද දිනයේ කඩුගන්නාවේ සිට ගමන් ආරම්භ කිරීමට නියමිතය.
පාගමන කෑගල්ල, වරකාපොල, නිට්ටඹුව, කඩවත යන නගර පසු කරමින් එළැඹෙන 15 වැනි දින කොළඹට ළගා වීමට නියමිත බවද පූජ්‍ය උලපනේ සුමංගල හිමි පැවසීය.