මාලිමා ආණ්ඩුවේ මූල්‍ය විනයට ජාත්‍යන්තරයේ ඉහළම සහතිකය!

* දේශීය ආදායම්, රේගුව සහ සුරාබදු දෙපාර්තමේන්තු ඉලක්ක ඉක්මවා යමින් උපයා දුන් දැවැන්ත ආදායම් වාර්තාව IMF ඇගයීමට ලක් කරයි.

ලෝක වෙළඳපොළ තුළ මැදපෙරදිග යුද අර්බුදය හේතුවෙන් නව තෙල් මිල කම්පනයන් සහ සැපයුම් දාම බිඳවැටීම් (Supply chain disruptions) පිළිබඳ බියක් මතුවෙමින් පවතින මොහොතක, ඊට සාර්ථකව මුහුණ දීම සඳහා ශ්‍රී ලංකාවට ජාත්‍යන්තර මූල්‍ය අරමුදලෙන් (IMF) ඇමෙරිකානු ඩොලර් මිලියන 695ක (රුපියල් බිලියන 200කට අධික) දැවැන්ත මූල්‍ය ශක්තියක් නිල වශයෙන් ලැබී තිබේ. 

ලංකාවේ විස්තීර්ණ අරමුදල් පහසුකමෙහි (EFF) පස්වැනි සහ හයවැනි සමාලෝචන සාර්ථකව අවසන් කරමින් IMF විධායක මණ්ඩලය ලබාදුන් මෙම අනුමැතිය, වත්මන් රජය ක්‍රියාත්මක කරන දැඩි මූල්‍ය ප්‍රතිසංස්කරණවලට ජාත්‍යන්තරයෙන් ලැබුණු ඉහළම සහතිකයකි.

භාණ්ඩාගාර ලේකම් ආචාර්ය හර්ෂණ සූරියප්පෙරුම පෙන්වා දෙන්නේ, මෙම ජයග්‍රහණයත් සමඟ මැදපෙරදිග අර්බුදයෙන් මෙරට සුළු හා මධ්‍ය පරිමාණ ව්‍යවසායකයන් (SMEs) සහ පීඩිත ජනතාව ආරක්ෂා කරගැනීම සඳහා IMF වැඩසටහන තුළම පවතින ප්‍රතිපත්තිමය විකල්ප උපරිමයෙන් භාවිත කරන බවයි.

රාජ්‍ය ආදායම් වාර්තා බිඳහෙලූ දේශීය ආයතනවල වික්‍රමය

මෙම ජාත්‍යන්තර ජයග්‍රහණය පිටුපස ඇත්තේ තාවකාලික පැලැස්තර විසඳුම් නොව, රටේ සිදුවූ ගැඹුරු ව්‍යුහාත්මක වෙනස්කම්ය. විශේෂයෙන්ම, මීට පෙර පැවති දූෂිත මූල්‍ය සංස්කෘතිය වෙනස් කරමින් රාජ්‍ය මූල්‍ය කළමනාකරණ පනත (Public Financial Management Act) ක්‍රියාවට නැංවීම, ව්‍යාපාරවල සැබෑ අයිතිකරුවන් හෙළිදරව් කිරීමේ (Beneficial ownership) නීති සහ ආයෝජන අනුමැතියේ විනිවිදභාවය ඇති කිරීම IMF හි දැඩි පැසසුමට ලක්ව ඇත.

සියල්ලටම වඩා, දේශීය ආදායම් දෙපාර්තමේන්තුව, ශ්‍රී ලංකා රේගුව සහ සුරාබදු දෙපාර්තමේන්තුව යන ප්‍රධාන ආදායම් ඉපයීම් ආයතන තුනම තමන්ට ලබා දී තිබූ ඉලක්කයන් සීමාව ඉක්මවා ජයගනිමින් රජයේ භාණ්ඩාගාරය ශක්තිමත් කිරීමට දැක්වූ දායකත්වය මෙහිදී කැපී පෙනේ.

අර්බුද මැද ස්ථාවර වන නව ආර්ථිකය

පසුගිය කාලයේ ‘ඩිට්වා’ සුළි කුණාටුවෙන් රටේ ආර්ථිකයට දැවැන්ත හානි සිදුවෙද්දී සහ ජාත්‍යන්තර වෙළඳපොළ අස්ථාවර වෙද්දී පවා, ලංකාව බංකොලොත් භාවයෙන් මුදාගැනීමේ මෙම ප්‍රතිසංස්කරණ සජීවී ලෙස ඉදිරියටම රැගෙන යාමට සමස්ත ව්‍යාපාරික ප්‍රජාව, රාජ්‍ය නිලධාරීන් සහ පාලකයන් දැක්වූ කැපවීම අතිශය ප්‍රශංසනීයය.

මින් පෙර ණය ගෙවීම පැහැර හැර (Default) ලෝකය ඉදිරියේ අසරණව සිටි ශ්‍රී ලංකාව, අද වන විට ගෝලීය ආර්ථික කම්පන හමුවේ වුවද ඔරොත්තු දීමේ හැකියාව (Resilience) පෙන්නුම් කරමින් සිටියි. IMF වැඩසටහන හුදු ණය මුදලකට එහා ගොස්, රටේ ව්‍යවසායකයන් සුරකින සහ අනාගත කඩාවැටීම් වළක්වන ශක්තිමත් ආර්ථික මෙවලමක් ලෙස පරිවර්තනය කරගැනීමට රජය ගෙන ඇති මෙම දූරදර්ශී පියවර ලංකාවේ නව පුනරුදයට තැබූ සුවිශේෂී ධනාත්මක සන්ධිස්ථානයකි.


(සටහන | විපුල ගුණසේකර)