මෑතකාලීනව දේශීය විදේශ විනිමය වෙළෙඳපොළ තුළ ඩොලරයේ අගයෙහි සිදුවූ වෙනස්වීම් හුදෙක් නිදහස් වෙළෙඳපොළ බලවේග (Market Forces) මත සිදුවන්නක් මිස රටේ පවතින ආර්ථික අර්බුදයක ලක්ෂණයක් නොවන බවත්, කෙටි කාලයක් ඇතුළත එය ස්වයංක්‍රීයවම සමතුලිතතාවයට පත්වනු ඇති බවත් මුදල් සහ ක්‍රමසම්පාදන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු පවසයි.
මැදපෙරදිග කලාපයේ පවතින උණුසුම් යුදමය තත්ත්වය සහ ලෝක වෙළෙඳපොළේ ඉන්ධන මිල ඉහළ යාම හේතුවෙන් කෙටි කාලීනව ඩොලරයට ඇතිවූ ඉල්ලුම (Short-term demand) මෙම තත්ත්වයට හේතු වී ඇති බව රජයේ නිල ස්ථාවරයයි.
රජයේ සහ මූල්‍ය නිලධාරීන්ගේ ස්ථාවරය
විපක්ෂය විසින් සමාජගත කිරීමට උත්සාහ කරන පරිදි ඩොලරය රුපියල් 370, 380 හෝ 390 සීමාවට පැන යාමේ කිසිදු ඉඩකඩක් නොමැති බව අවධාරණය කරන නියෝජ්‍ය අමාත්‍යවරයා, දැනටමත් වෙළෙඳපොළ නිසි පරිදි කළමනාකරණය කිරීමට අවශ්‍ය මැදිහත්වීම් සිදුව ඇති බව කියා සිටියි.
රටට අවශ්‍ය කරන විදේශ ප්‍රේෂණ (Remittances), අපනයන ආදායම් සහ සංචාරක කර්මාන්තයෙන් ලැබෙන ඩොලර් අඛණ්ඩව ගලා එන බැවින් අනවශ්‍ය කලබලයක් ඇති කරගත යුතු නැති බව භාණ්ඩාගාර ආරංචි මාර්ග තහවුරු කරයි. ඒ අනුව, පසුගිය දිනක රුපියල් 320ත් 330ත් අතර පැවති ඩොලරයේ අගය, සිකුරාදා (ජූනි 5) දිනය නිමා වන විට රුපියල් 335.50/336.25 මට්ටමේ සමතුලිත වෙමින් පවතින බව විදේශ විනිමය තැරැව්කරුවන්ගේ (Forex Dealers) නිල දත්ත පෙන්වා දෙයි.
බැඳුම්කර වෙළෙඳපොළෙන් ස්ථාවරත්වයට සාක්ෂි
රජයේ මූල්‍ය ප්‍රතිපත්තිය කෙරෙහි දේශීය හා ජාත්‍යන්තර ආයෝජකයන් තැබූ විශ්වාසය තහවුරු කරමින්, සිකුරාදා දිනය වසා දමන විට රජයේ භාණ්ඩාගාර බැඳුම්කර පොලී අනුපාතික (Bond Yields) කැපී පෙනෙන ලෙස පහත වැටී තිබුණි.
කොළඹ කොටස් සහ සුරැකුම්පත් වෙළඳපොළ වාර්තාවලට අනුව භාණ්ඩාගාර බැඳුම්කරවල සිදුවූ ධනාත්මක වෙනස පහත පරිදි වේ:
ආණ්ඩුවේ මූල්‍ය විශේෂඥයන් පෙන්වා දෙන්නේ දිගුකාලීන බැඳුම්කර පොලී අනුපාත 12% සීමාවට පැමිණීමෙන් පැහැදිලි වන්නේ රජයේ සාර්ව ආර්ථික ස්ථාවරීකරණ (Macroeconomic Stabilization) වැඩපිළිවෙළ කෙරෙහි වෙළඳපොළ තුළ පවතින ඉහළ විශ්වාසනීයත්වය බවයි.
(සටහන | විපුල ගුණසේකර)
