ඕනෑම රටක මූල්‍ය වෙළඳපොළක ස්ථාවරත්වය ප්‍රධාන වශයෙන්ම තීරණය වන්නේ පාලකයන් කෙරෙහි ඇති විශ්වසනීයත්වය මත බව පෙන්වා දෙන මන්ත්‍රීවරයා, රුපියලේ අගය රැකගැනීමට රජයට ඇති හැකියාව පිළිබඳව වෙළඳපොළ තුළ පවතින විශ්වාසය මේ වන විට ක්‍රමයෙන් දුර්වල වෙමින් පවතින බව සඳහන් කළේය.
ගෝලීය ආර්ථික බලපෑම් පිළිබඳව අදහස් දක්වමින් ආචාර්ය හර්ෂ ද සිල්වා අවධාරණය කළේ, වත්මන් ලෝක යුද වාතාවරණය ලංකාවට පමණක් නොව පොදුවේ සෑම රටකටම බලපා ඇති බවයි.
කෙසේ වෙතත්, අමෙරිකානු ජනාධිපති ඩොනල්ඩ් ට්‍රම්ප්ගේ නව බදු ප්‍රතිපත්ති (Trump's New Tariffs) හේතුවෙන් ලංකාවට අමතර බදු බරකට මුහුණ දීමට සිදුවීමේ බරපතල අවදානමක් මතුව ඇතැයි ඔහු පෙන්වා දුන්නේය.
වෙනත් රටවල් අමෙරිකාව සමඟ කල්තියා නිසි වෙළඳ ගිවිසුම්වලට එළඹී ඇති බැවින් ඔවුන් මෙම අවදානමෙන් මිදී ඇති මුත්, වත්මන් රජය ගිවිසුම්ගත වන බව ප්‍රකාශ කළ ද ප්‍රායෝගිකව එය ඉටු කිරීමට අපොහොසත් වීම නිසා ලංකාව මෙලෙස අනාරක්ෂිත වී ඇති බව ද මන්ත්‍රීවරයා වැඩිදුරටත් කියා සිටියේය.
