කොළඹ මධ්‍යම බස් නැවතුම්පොළ ‘ස්මාර්ට්’ වෙයි

* ජාතික ඩිජිටල්කරණ ඉලක්ක සපුරන්න නම් රාජ්‍ය ප්‍රවාහන සේවය තුළ විනිවිදභාවය සහ වගවීම (Accountability) අනිවාර්ය බවට විශේෂඥ මත.

ශ්‍රී ලංකාවේ පොදු ප්‍රවාහන ක්ෂේත්‍රය නවීකරණය කිරීමේ ජාතික උපායමාර්ගික පියවරක් සනිටුහන් කරමින්, කොළඹ කොටුව මධ්‍යම බස් නැවතුම්පොළ (Central Bus Stand) ඩිජිටල් තාක්ෂණය කේන්ද්‍ර කරගත් නව මුහුණුවරකින් යළි විවෘත කර තිබේ.

ප්‍රවාහන, මහාමාර්ග සහ නාගරික සංවර්ධන අමාත්‍ය බිමල් රත්නායක ගේ ප්‍රධානත්වයෙන් නිල වශයෙන් ආරම්භ වූ මෙම ව්‍යාපෘතිය, හුදු භෞතික අලුත්වැඩියාවකට පමණක් සීමා නොවී පොදු ප්‍රවාහන සංස්කෘතිය "පද්ධතිමය ඩිජිටල් පරිවර්තනයකට" (Digital Transformation) ලක්කිරීමක් ලෙස හඳුන්වා දී ඇත.

තොරතුරු අවුල නිමා කරන ‘රියල්-ටයිම්’ තාක්ෂණය

ධීවර, වෙළඳ සහ දෛනික මගීන් දහස් ගණනක් මුහුණ දෙන ප්‍රධානතම ගැටලුවක් වූ බස් රථ පැමිණීමේ සහ පිටත්වීමේ වේලාවන් පිළිබඳ පවතින අවිනිශ්චිතභාවය නැති කිරීම සඳහා නව ඉලෙක්ට්‍රොනික ප්‍රදර්ශන පද්ධති (Electronic display systems) මෙහි ස්ථාපිත කර තිබේ.

SLT-MOBITEL ආයතනයේ සන්නිවේදන යටිතල පහසුකම් දායකත්වය මත ක්‍රියාත්මක වන මෙම පද්ධතිය මඟින් මගීන්ට සජීවී කාලසටහන් (Real-time bus schedules) සහ නිවේදන කඩිනමින් ලබාගත හැකි අතර, සමස්ත පර්යන්තයම ආවරණය වන පරිදි නොමිලේ Wi-Fi පහසුකම් ද සලසා ඇත.

වගවීම සහ ස්මාර්ට් යටිතල පහසුකම්

ස්වාධීන ක්ෂේත්‍ර නිරීක්ෂකයන් පෙන්වා දෙන්නේ ගෝලීය ප්‍රමිතීන්ට අනුව පොදු ප්‍රවාහන මධ්‍යස්ථානයක් කාර්යක්ෂම වීමට නම් මෙවැනි විද්‍යුත් පාලන පද්ධති (Digital Ecosystem) අත්‍යවශ්‍ය සාධකයක් වන බවයි.

තාක්ෂණය බද්ධ කිරීම මඟින් සේවා ප්‍රමාදයන් අවම වනවා සේම, ප්‍රවාහන ක්ෂේත්‍රය තුළ වඩාත් විනිවිදභාවයකින් යුත් සහ වගවීම් සහිත (Transparent and accountable) මෙහෙයුම් වටපිටාවක් නිර්මාණය වන බව බලධාරීහු විශ්වාස කරති.

මෙම ව්‍යාපෘතියේ සාර්ථකත්වය ඉදිරියේදී දිවයින පුරා පවතින සෙසු ප්‍රවාහන ජාලයන් ද "ස්මාර්ට් යටිතල පහසුකම්" (Smart Infrastructure) දක්වා පරිවර්තනය කිරීමේ නියමුවක් (Benchmark) වනු ඇතැයි ආර්ථික සහ ප්‍රවාහන විශේෂඥයෝ පෙන්වා දෙති.

(වාර්තාව - විපුල ගුණසේකර)