ලංකාවේ ව්‍යාපාරවලට යුරෝපා වෙළඳපොළ දිනන්න ‘හරිත වාර්තාකරණයක්’: ජනාධිපති අනුරගෙන් නව උපායමාර්ගික රාමුවක් එළියට!

* යුරෝපා සංගමයේ (EU) සහ UNIDO සංවිධානයේ මූල්‍ය හා තාක්ෂණික දායකත්වයෙන් ‘දේශගුණික ප්‍රතිචාර’ (AICRSL) ව්‍යාපෘතියක්.

* ස්වේච්ඡා පදනමෙන් ඇරඹුණද, ගෝලීය ආයෝජන සහ විදේශීය වෙළඳපොළ රැකගැනීමට ESG දත්ත අනිවාර්ය බවට විශේෂඥ මත.


ලෝක වෙළඳපොළේ පවතින දැඩි තරඟකාරීත්වය හමුවේ ශ්‍රී ලංකාවේ ආයතනික තිරසාරභාවය සහ පාරිසරික වගවීම ජාත්‍යන්තර මට්ටමට ඔසවා තැබීම සඳහා නවීකරණය කරන ලද ‘ජාතික හරිත වාර්තාකරණ පද්ධතියේ’ (NGRS) නව මාර්ගෝපදේශ නිල වශයෙන් ප්‍රකාශයට පත් කර තිබේ.

ජාතික පරිසර දින සැමරුම් උත්සවයේදී ජනාධිපති අනුර කුමාර දිසානායක විසින් අරලියගහ මන්දිරයේදී මෙම යාවත්කාලීන කළ රාමුව එළිදක්වන ලදී.

යුරෝපා සංගමයේ (EU) මූල්‍ය ආධාර මත ක්‍රියාත්මක වන “ශ්‍රී ලංකාවේ කර්මාන්තවල දේශගුණික ප්‍රතිචාර වේගවත් කිරීම” (AICRSL) ව්‍යාපෘතිය යටතේ, එක්සත් ජාතීන්ගේ කාර්මික සංවර්ධන සංවිධානයේ (UNIDO) මැදිහත් වීමෙන් මෙම නවීකරණය සිදු කර ඇත.

වසර 15කට පසු සිදුවූ ගෝලීය සමපාත වීම

පළමුවරට 2011 වසරේදී හඳුන්වා දුන් NGRS පද්ධතිය වසර 15කට පසු මෙලෙස දැවැන්ත වෙනසකට ලක් කර ඇත්තේ, ලෝකයේ වඩාත්ම පිළිගත් තිරසාර වාර්තාකරණ රාමුවක් වන Global Reporting Initiative (GRI) ප්‍රමිතීන්ට අනුකූලවය.

යුරෝපා සංගමයේ දූත පිරිසේ සහයෝගිතා ප්‍රධානී ආචාර්ය ජොහෑන් හෙසේ පෙන්වා දෙන්නේ, ජාත්‍යන්තරව සැසඳිය හැකි මෙවැනි පරිසර, සමාජ සහ පාලන (ESG) දත්ත සැපයීම හරහා ලංකාවේ ව්‍යාපාරවලට ඉහළ මිලක් සහිත යුරෝපා වෙළඳපොළ අවස්ථා සුරක්ෂිත කරගත හැකි බවයි.

ආයෝජන ආකර්ෂණය සහ ආර්ථික පුනරුත්ථාපනය වත්මන් ගෝලීය ආයෝජකයන් සහ පාරිභෝගිකයන් සැපයුම්කරුවන්ගේ පාරිසරික පිරිසිදුභාවය දැඩි ලෙස පරීක්ෂා කරන බැවින්, මෙම පද්ධතිය ස්වේච්ඡා පදනමෙන් ක්‍රියාත්මක වුවද ව්‍යාපාරවල පැවැත්මට එය අත්‍යවශ්‍ය වනු ඇත.

AICRSL ප්‍රධාන තාක්ෂණික විශේෂඥ ආචාර්ය ජගත්දේව විදානගම ඇතුළු ආර්ථික විශ්ලේෂකයන් පෙන්වා දෙන්නේ, මෙමඟින් ශ්‍රී ලංකාවේ අපනයන තරඟකාරීත්වය ඉහළ යනවා සේම, පාරිසරික හිතකාමී විදේශීය ආයෝජන ආකර්ෂණය කරගනිමින් රටේ සාර්ව ආර්ථික පුනරුත්ථාපන ක්‍රියාවලියට ද විශාල තල්ලුවක් ලැබෙන බවයි.

(වාර්තාව - විපුල ගුණසේකර)