ශ්‍රී ලංකා රුපියල අවප්‍රමාණය වීම සම්බන්ධයෙන් සමාජය තුළ පවතින අනියත බිය දුරු කරමින්, ආචාර්ය අනිල් ජයන්ත ප්‍රනාන්දු මේ බව කීය.
පසුගිය දින කිහිපය තුළ රුපියලේ අගය යම් උච්චාවචනයකට භාජනය වූයේ ප්‍රධාන වශයෙන් බාහිර සාධක කිහිපයක් නිසා බව අමාත්‍යවරයා පෙන්වා දෙයි. විශේෂයෙන්ම මැදපෙරදිග කලාපයේ පවතින යුදමය වාතාවරණය හේතුවෙන් ඉන්ධන මිල ඉහළ යාම සහ අනෙකුත් කරුණු මත ඩොලරය සඳහා වූ ඉල්ලුම කෙටි කාලයක් තුළ ඉහළ යාම මෙයට හේතු වී ඇත.
ඩොලරයේ අගය රුපියල් 378 දක්වා ඉහළ යන බවට විපක්ෂය ගෙන ගිය ප්‍රචාරයන් අසත්‍ය බව මෙහිදී සනාථ වී තිබේ.
ඇමැතිවරයා සඳහන් කරන පරිදි, යම් අවස්ථාවක රුපියල් 335-336 සීමාව දක්වා ඉහළ ගියද, එය නැවතත් කළමනාකරණය වී රුපියල් 326 මට්ටමට පැමිණ ඇත. වෙළඳපල බලවේග ක්‍රියාත්මක වීම හරහා රුපියලේ අගය නැවත සාමාන්‍ය තත්ත්වයට පත්වන බව ඔහු විශ්වාසය පළ කරයි.
රටේ ආර්ථිකයට අවශ්‍ය ඩොලර් ප්‍රමාණය අපනයන ක්ෂේත්‍රය, සංචාරක කර්මාන්තය සහ විදේශ ප්‍රේෂණ හරහා නිසි පරිදි ලැබෙමින් පවතින බව අමාත්‍යවරයා සහතික කරයි. මේ නිසා රට තුළ කිසිදු ආකාරයක ආර්ථික අර්බුදයක් හෝ ඩොලර් හිඟයක් පිළිබඳ ගැටලුවක් නොමැති බවත්, සිදුව ඇත්තේ ඉල්ලුම වැඩිවීම මත පදනම් වූ කෙටි කාලීන වෙළඳපල වෙනසක් පමණක් බවත් ඔහු පෙන්වා දෙයි.
වැරදි තොරතුරු හෝ නොමඟ යවන සුළු ප්‍රකාශ මත පදනම්ව ජනතාව කලබලයට පත්විය යුතු නැති බව අමාත්‍ය ආචාර්ය අනිල් ජයන්ත ප්‍රනාන්දු වැඩිදුරටත් සඳහන් කරයි.
ආර්ථිකයේ මූලික පදනම ශක්තිමත්ව පවතින බැවින් මෙවැනි උච්චාවචනයන් කෙටි කාලයක් තුළ සමතුලිත වන බව ඔහු අවධාරණය කළේය.
(සටහන | ජේ. මුණසිංහ)
