* අඩි 6x4 කාමරයේ මීයන්ගේ වධය; මධ්‍යස්ථ-දරුණු විශාදය (Depression) සහ සියදිවි නසාගැනීමේ අධි-අවදානමක් JMO වාර්තාවෙන් හෙළි වෙයි!
* සලේගේ 'මාරාන්තික උපවාසය' (Fast-unto-death) හමුවේ විශේෂඥ වෛද්‍ය මණ්ඩලයක් පත්කිරීමේ නීතිපතිගේ ඉල්ලීමට අද නියෝගය!
ත්‍රස්තවාදය වැළැක්වීමේ පනත (PTA) යටතේ අපරාධ පරීක්ෂණ දෙපාර්තමේන්තු (CID) භාරයේ රඳවා සිටියදී මාරාන්තික ආහාර වර්ජනයක් ආරම්භ කර, පසුව අසාධ්‍ය තත්ත්වයෙන් කොළඹ ජාතික රෝහලට ඇතුළත් කෙරුණු රාජ්‍ය බුද්ධි සේවයේ හිටපු ප්‍රධානී විශ්‍රාමික මේජර් ජෙනරාල් සුරේෂ් සලේ, විශේෂඥ වෛද්‍ය මණ්ඩලයක් වෙත ඉදිරිපත් කර වාර්තාවක් කැඳවීමට පියවර ගන්නා ලෙස සෞඛ්‍ය සේවා අධ්‍යක්ෂ ජෙනරාල්වරයා වෙත නියෝගයක් නිකුත් කරන්නැයි නීතිපතිවරයා කළ ඉල්ලීම පිළිබඳ තීරණාත්මක නියෝගය අද (10) කොළඹ කොටුව මහේස්ත්‍රාත් පසන් අමරසේන විසින් ප්‍රකාශයට පත් කිරීමට නියමිතය.
සුරේෂ් සලේ ගේ පාර්ශ්වයෙන් ඉදිරිපත් වූ මෝසමක් ඉකුත් ජූනි 04 වනදා සලකා බැලූ අවස්ථාවේදී, ඔහුගේ වත්මන් වෛද්‍ය විද්‍යාත්මක තත්ත්වය සහ රැඳවුම් භාරයේදී සිදු වූවා යැයි කියන ශාරීරික හා මානසික පීඩාවන් සම්බන්ධයෙන් දෙපාර්ශවයේ නීතිඥවරුන් අතර අධිකරණය හමුවේ දැවැන්ත වාද විවාදයක් ඇති විය.
සිරුර තමන්ගේම මස්පිඬු කා දමයි! (Muscle Wasting)
එක්සත් ජාතික පක්ෂය (UNP) සහ සලේ ගේ පවුලේ සාමාජිකයන් විසින් ප්‍රසිද්ධ කරන ලද වෛද්‍ය සාරාංශ වාර්තාවලට (Medical Summary) අනුව, දින 100කට අධික කාලයක් පැවති දුර්වල රැඳවුම් කොන්දේසි සහ වත්මන් පූර්ණ උපවාසය හේතුවෙන් සලේ ගේ සිරුර මේ වන විට දරුණු මන්දපෝෂණීය තත්ත්වයකට පත්ව ඇත.
ශරීරයට අවශ්‍ය බලශක්තිය ලබාගැනීම සඳහා සිරුර විසින්ම තමන්ගේම මස්පිඬු දියකර හැරීමේ (Muscle wasting) දරුණු ජීව විද්‍යාත්මක බිඳ වැටීමක් මේ වන විට සිදුවෙමින් පවතී. පූර්ණ ආහාර වර්ජනය හේතුවෙන් ශරීරයේ පොටෑසියම්, සෝඩියම් සහ මැග්නීසියම් වැනි අත්‍යවශ්‍ය ඛනිජ ලවණ ක්ෂය වී යාම නිසා, මොළය, පෙනහළු සහ හදවත වැනි අත්‍යවශ්‍ය ඉන්ද්‍රියයන් අකර්මණ්‍ය වීමේ (Organ Malfunctioning) මෙන්ම හදිසි හෘදයාබාධයක් (Cardiac arrest), ආඝාතය (Stroke) හෝ වකුගඩු මුළුමනින්ම අකර්මණ්‍ය වීමේ (Renal Failure) මාරාන්තික අවදානමකට සලේ මහතා මුහුණ දී සිටී.
අධිකරණ වෛද්‍ය නිලධාරී (JMO) වාර්තාව උපුටා දක්වමින් සලේ වෙනුවෙන් පෙනී සිටි ජනාධිපති නීතිඥ ෂවින්ද්‍ර ප්‍රනාන්දු අධිකරණයට පෙන්වා දුන්නේ, තම සේවාදායකයා දැනට "මධ්‍යස්ථ-දරුණු විශාදයකින්" (Moderate to Severe Depressive Episode) සහ පශ්චාත් කම්පන ආතති ආබාධයකින් (PTSD) පෙළෙන අතර, ඔහු සියදිවි නසාගැනීමේ අධි-අවදානමක (High risk of suicide) පසුවන බවයි.
"මම සතෙක්ද? ඉතිරි දේවල් කියන්න ලැජ්ජයි!" - සලේ හඬයි
ජූනි 04 වැනිදා උසාවියේදී සලේ ගේ නීතිඥවරයා, සලේ වෛද්‍යවරුන් හමුවේ කළ ප්‍රකාශයක් මෙසේ හෙළි කළේය: "මම ඉන්නේ අඩි 6x4 කාමරයක. එතැන මීයන්ගෙන් කරදර තිබෙනවා. විදුලි පංකාවක් නැහැ. සුදු පාට ඇඳුම් ඇඳගත්ත පිරිසක් ඇවිල්ලා මට ඇඳුම් ඉවත් කරන්න කිව්වා. ඊටපස්සේ සියලු රැඳවියන් ඉදිරිපිට පරීක්ෂාවට ලක්කළා. මට අත් දිගු කරන්න කිව්වා. ඉතිරි දේවල් කියන්න ලැජ්ජයි. මම සතෙක්ද? අවුරුදු 37ක් රාජ්‍ය සේවයේ හිටපු නිලධාරියෙක්..."
"මොහු පතෝල කරලක් නෙවෙයි; ඔස්කාර් සම්මානයක් දෙන්න ඕනේ!" - CIDය කියයි
මෙම කරුණුවලට දැඩි ලෙස විරෝධය දැක්වූ අපරාධ පරීක්ෂණ දෙපාර්තමේන්තුව (CID) වෙනුවෙන් පෙනී සිටි අතිරේක සොලිසිටර් ජෙනරාල් දිලීප පීරිස් , මෙම මෝසම අධිකරණය නොමඟ යැවීම සඳහා සැලසුම් සහගතව ඉදිරිපත් කළ එකක් බව පැවසීය.
"මේ සැකකරුව සෑම බදාදාවකම නීතිඥවරු, බිරිඳ සහ දරුවා මුණගැසෙනවා. වධ හිංසා කළා නම් ඒ බව ඔවුන්ට නොකීවේ ඇයි? මේ මානසික වෛද්‍ය වාර්තාව සම්පූර්ණයෙන්ම මා ප්‍රතික්ෂේප කරනවා. සැකකාර සුරේෂ් සලේ මේ වෛද්‍ය පරීක්ෂණයට මුහුණදීලා තිබෙන්නේ හඬමින්. ස්වාමීනි, මොවුන් බුද්ධි අංශ නිලධාරීන්. එහෙම පුද්ගලයෙක් හඬයිද? මොහු පතෝල කරලක් නෙවෙයි, හොඳ රංගන ශිල්පියෙක්. ඔහුට ඔස්කාර් සම්මානයක් දෙන්න ඕනේ..." යනුවෙන් අතිරේක සොලිසිටර් ජෙනරාල්වරයා තදින්ම කියා සිටියේය.
පාස්කු ප්‍රහාරයේ මහමොළකරු සුරේෂ් සලේ බවට CIDය චෝදනා කරද්දී, සැකකරුවෙකුගේ මානුෂීය අයිතිවාසිකම් සහ වෛද්‍ය නිර්දේශ උල්ලංඝනය වන බව විපක්ෂය පවසයි. මෙම තීරණාත්මක නෛතික ගැටලුවේ වෛද්‍ය මණ්ඩල නියෝගය අද කොටුව අධිකරණයෙන් නිකුත් වීමට නියමිතය.
සෞඛ්‍ය තත්ත්වය පිලිබඳ සාරාංශ සටහනක්
හිටපු බුද්ධි ප්‍රධානී, විශ්‍රාමික මේජර් ජෙනරාල් සුරේෂ් සලේ ගේ වත්මන් සෞඛ්‍ය තත්ත්වය සහ ඔහු මුහුණ දී සිටින මාරාන්තික අවදානම පිළිබඳව ඉදිරිපත් කර ඇති වෛද්‍ය වාර්තාවේ සාරාංශ (Medical Summary) සටහනක් එක්සත් ජාතික පක්ෂය විසින් ඊයේ (09) නිකුත්කළ මාධ්‍ය නිවේදනය සමග ඇමුණුමක් ලෙස යොමුකර තිබිණ. එහි සිංහල පරිවර්තනය මතු දැක්වේ:
උපවාසය සහ රැඳවුම් භාරයේදී සිදු වූ වධහිංසා හේතුවෙන් ජීවිතයට එල්ල වී ඇති ආසන්නතම අවදානම
විශ්‍රාමික මේජර් ජෙනරාල් සුරේෂ් සලේ ශ්‍රී ලංකා අපරාධ පරීක්ෂණ දෙපාර්තමේන්තුවේ (CID) හුදෙකලා රැඳවුම් භාරයේ පසුවෙමින් සිටියදී, මේ වන විට ඔහුගේ ජීවිතයට ක්ෂණික සහ අතිශය බීරදූරු (තීරණාත්මක) තර්ජනයකට මුහුණ දී සිටී. දිගුකාලීන ශාරීරික පරිහානිය, ප්‍රමිතියෙන් තොර රැඳවුම් කොන්දේසි සහ ක්‍රමානුකූලව සිදු වූ අනිසි සැලකීම් (හිංසනයන්) හමුවේ ඔහු මේ වන විට "මාරාන්තික උපවාසයක්" (Fast Unto Death) ආරම්භ කර ඇත. ඔහුගේ රැඳවුම් ස්ථානයේ පවතින දරුණු තත්ත්වයන් සමඟ මෙම උපවාසය ද එකතු වීම නිසා, ඔහු දිනෙන් දින දරුණු කායික විද්‍යාත්මක බිඳ වැටීමක (Physiological collapse) දැඩි අවදානමකට ලක්ව සිටී:
දරුණු මන්දපෝෂණය සහ මස්පිඬු ක්ෂය වීම (Muscle Wasting):
දින 100කට අධික කාලයක් පුරා ප්‍රමාණවත් නොවන සහ බාල ප්‍රමිතියෙන් යුත් ආහාර සැපයීම සහ එයට ඔහුගේ වත්මන් පූර්ණ ආහාර වර්ජනය ද එකතු වීම නිසා ඔහුගේ ශරීරය දරුණු මන්දපෝෂණ තත්ත්වයකට පත්වෙමින් තිබේ. ශරීරය සතු ඉතිරි ශක්ති සංචිත මුළුමනින්ම ක්ෂය වී යාමත් සමඟ, ඔහුගේ සිරුරේ මස්පිඬු සක්‍රීයව හැකිලීමට සහ දියවී යාමට (Wasting away) මෙය හේතු වී ඇත. උපවාසය හේතුවෙන් මෙම තත්ත්වය තවදුරටත් උත්සන්න වී තිබේ.
ඉන්ද්‍රියයන් අකර්මණ්‍ය වීම (හදවත, පෙනහළු සහ මොළය):
හදවත, පෙනහළු සහ මොළය ඇතුළු ශරීරයේ පැවැත්මට අත්‍යවශ්‍ය ප්‍රධාන ඉන්ද්‍රියයන් අකර්මණ්‍ය වීමේ ආසන්නතම අවදානමක් පවතී. දිගුකාලීන නින්ද නොයාම, වාතාශ්‍රය නොමැති සිරකුටියක 24/7 පුරා සිරකර තැබීම සහ නීත්‍යානුකූලව නියම කර ඇති වෛද්‍ය ඖෂධ ලබා නොදීම හේතුවෙන් මෙම පද්ධතිමය ඉන්ද්‍රිය අකර්මණ්‍ය වීමේ අවදානම තවදුරටත් තීව්‍ර වී ඇත. උපවාසය නිසා මෙම තත්ත්වයන් තවත් දරුණු වී තිබේ. ඔහුගේ ඇස් ගිලී යාම, අධික දුර්වලතාවය සහ දැඩි කෘෂ බව ඇතුළු ශාරීරික පරිහානියේ දරුණු ලක්ෂණ ඔහුගේ පවුලේ සාමාජිකයන් විසින් දැනටමත් නිරීක්ෂණය කර ඇත.
දරුණු ඉලෙක්ට්‍රොලයිට් (ඛනිජ ලවණ) අසමතුලිතතාවය සහ පෝෂ්‍ය පදාර්ථ ක්ෂය වීම:
ආහාර සහ දියර වර්ග ලබා ගැනීම මුළුමනින්ම නැවතීම හේතුවෙන්, ශරීරයේ අත්‍යවශ්‍ය ඉලෙක්ට්‍රොලයිට් මට්ටම් (විශේෂයෙන් පොටෑසියම්, සෝඩියම් සහ මැග්නීසියම් වැනි ලවණවල තීරණාත්මක විපර්යාසයන්) දරුණු ලෙස අසමතුලිත වන අතර, උපවාසය නිසා ශරීරයේ අත්‍යවශ්‍ය විටමින් සහ ඛනිජ ලවණ මුළුමනින්ම ක්ෂය වී යයි.
හදිසි හෘදයාබාධයක්, ආඝාතය (ස්ට්‍රෝක්) හෝ වකුගඩු අකර්මණ්‍ය වීම:
ඉහත සඳහන් කළ තත්ත්වයන් සහ දරුණු විජලනය (Dehydration) හේතුවෙන් ඇති වන මෙම දරුණු ඉලෙක්ට්‍රොලයිට් අසමතුලිතතාවය නිසා, ඔහු මාරාන්තික හෘද රිද්මයානුකූල නොවීම් (Fatal cardiac arrhythmias - හදිසි හෘදයාබාධ), ස්නායු ආබාධ (ආඝාතය/ස්ට්‍රෝක්) හෝ වකුගඩු වලට සිදුවන දරුණු හානි හේතුවෙන් වකුගඩු මුළුමනින්ම අකර්මණ්‍ය වීමේ ක්ෂණික අවදානමකට ලක්ව සිටී.
අධිකරණ වෛද්‍ය නිලධාරී (JMO) වාර්තාවේ සොයාගැනීම් මත පදනම් වූ ඔහුගේ මානසික තත්ත්වය:
"සියදිවි නසාගැනීමේ ඉහළ අවදානමක් (High risk of suicide) සහිත, පශ්චාත් කම්පන ආතති ආබාධයේ (PTSD) ලක්ෂණ සහ කැපී පෙනෙන කාන්සා ලක්ෂණ ඇතුළත්, මධ්‍යස්ථ-දරුණු මට්ටමේ විශාදමය තත්ත්වයක් (Moderate to Severe Depressive Episode)." අද දින වන විට, ඔහුව ජාතික රෝහලේ වාට්ටුවේ රඳවා තබාගෙන සිටින අතරතුර මානසික වෛද්‍යවරයකු (Psychologist) වෙත ද යොමු කර ඇත.
