ඇමෙරිකානු වාණිජ මණ්ඩලය සහ මැක්ලාටි ඇසෝසියේට්ස් (McLarty Associates) සංවිධානය කළ මෙම වටමේස සාකච්ඡාවට Apple, Boeing, Mastercard, AdvaMed වැනි ලෝක පූජිත සමාගම් මෙන්ම Atlantic Council සහ CSIS වැනි ප්‍රමුඛ පෙළේ ප්‍රතිපත්ති ආයතන ද එක්ව සිටියේය. මෙහිදී වරාය, සැපයුම් පද්ධති, පුනර්ජනනීය බලශක්තිය, සංචාරක සහ උසස් තාක්ෂණික නිෂ්පාදන යන ක්ෂේත්‍ර කෙරෙහි දැඩි අවධානයක් යොමුව ඇත.
වේගය සහ ස්ථාවරත්වය: ආයෝජකයන් ඉල්ලන සහතිකය
"ලංකාව ව්‍යාපාර සඳහා විවෘතයි. අපට අවශ්‍ය කරන්නේ ව්‍යාපාර කිරීමේ පහසුව (Ease of doing business) විතරක් නෙවෙයි, ව්‍යාපාර ආරම්භ කිරීමේ වේගය (Speed of doing business) වැඩි දියුණු කරන්නයි," යැයි හනීෆ් යූසුෆ් එහිදී අවධාරණය කළේය. ශ්‍රී ලංකාවේ භූගෝලීය පිහිටීම, උගත් ශ්‍රම බලකාය සහ පවතින ආර්ථික ප්‍රතිසංස්කරණ පිළිබඳව ඔහු කරුණු පැහැදිලි කළේය.
ඇමෙරිකානු නියෝජිතයන් ශ්‍රී ලංකාවේ ඉදිරි ගමන ගැන කැමැත්ත පළ කළද, ඔවුන්ගේ ප්‍රධාන අවධානය යොමුව තිබුණේ ප්‍රතිපත්තිවල විනිවිදභාවය, සැපයුම් දාමයන්හි ස්ථාවරත්වය සහ කලාපීය සම්බන්ධතාවය කෙරෙහි ලංකාව දක්වන සූදානම පිළිබඳවයි.
බලාපොරොත්තු සහ යථාර්ථය: ඊළඟ පියවර කුමක්ද?
මෙම සාකච්ඡාවල ප්‍රතිඵලයක් ලෙස ඇමෙරිකානු ව්‍යාපාරික නියෝජිත කණ්ඩායමක් නුදුරේදීම ලංකාවට පැමිණීමට නියමිතය. එය සාධනීය ප්‍රවණතාවයකි. එහෙත්, වොෂින්ටනයේදී ඇති කරගත් මෙම උනන්දුව මෙරට තුළ සැබෑ ආයෝජන, රැකියා සහ ආර්ථික වර්ධනයක් බවට පරිවර්තනය කිරීම බරපතළ අභියෝගයකි.
හනීෆ් යූසුෆ් පවසන පරිදි, ආයෝජන ආකර්ෂණය කර ගැනීම යනු දිගුකාලීන විශ්වාසය ගොඩනැගීමකි. විදේශීය උනන්දුව ජයග්‍රහණයක් කර ගැනීමට නම්, ලංකාව ලබාදුන් පොරොන්දු ක්‍රියාවෙන් ඔප්පු කර පෙන්විය යුතු ධනාත්මක මෙන්ම තීරණාත්මක කාලසීමාවක් දැන් එළඹ තිබේ.
