ගණේමුල්ල සංජීව ඝාතන සිද්ධිය සම්බන්ධයෙන් අත්අඩංගුවට ගත් ඔස්මන්ඩ් ගුණසේකර හෙවත් ‘ගම්පහ ඔස්මන්ඩ්’ තවදුරටත් රැඳවුම් භාරයේ තබා ගැනීමට කොළඹ අපරාධ කොට්ඨාශයට (CCD) අවසර ලැබී තිබේ.
කොළඹ ප්‍රධාන මහේස්ත්‍රාත් අසංග එස්. බෝදරගම ඉදිරියේ අද (12) මෙම නඩුව කැඳවනු ලැබීය.
එහිදී පොලිසිය පෙන්වා දුන්නේ සැකකරුගෙන් තවදුරටත් ප්‍රශ්න කිරීම් සිදු කරන බවයි. මේ අතර, සිද්ධියට සම්බන්ධ අනෙක් සැකකාරියක වන ඉෂාරා සෙව්වන්දි නමැත්තිය ද දින 30 ක රැඳවුම් නියෝග මත ප්‍රශ්න කරමින් පවතී.
නිවසින් හමු වූ රහස් ලේඛන සහ අවිආයුධ
සැකකරුගේ නිවස සෝදිසි කිරීමේදී වැදගත් සාක්ෂි රැසක් හමු වූ බව පොලිසිය අධිකරණයට දැනුම් දුන්නේය.
‘කෙහෙල්බද්දර පද්මේ’ නමැත්තාට නිකුත් කර තිබූ ජාත්‍යන්තර ‘රතු නිවේදනයක්’ (Red Notice) ඒ අතර තිබී ඇත. ඊට අමතරව ගණේමුල්ල සංජීවගේ පැරණි නඩු විස්තර, ඔහුගේ සමීපතයන් සහ දුරකථන අංක ඇතුළත් රහසිගත ලේඛනයක් ද පොලිස් භාරයට ගෙන තිබේ.
සැකකරු, ගණේමුල්ල සංජීවගේ සියලු ක්‍රියාකාරකම් පිළිබඳව දැඩි අවධානයෙන් සිට ඇති බව මෙයින් පැහැදිලි වන බව CCD ය පවසයි. සැකකරුගේ නිවසේ තිබී ලියාපදිංචි නොකළ යතුරුපැදියක් සහ ගිනිඅවියක් ද සොයාගෙන ඇත.
නීතිඥ චෝදනා සහ අධිකරණයේ ස්ථාවරය
සැකකාර ඔස්මන්ඩ් වෙනුවෙන් පෙනී සිටි නීතිඥ අසිත් සිරිවර්ධන අධිකරණය හමුවේ විශේෂ කරුණක් මතු කළේය. කොළඹ අපරාධ කොට්ඨාශයේ සිටින සිය සේවාදායකයා හමුවීමට තමන්ට අවස්ථාව ලබා නොදුන් බව ඔහු පැවසීය.
කෙසේ වෙතත්, CCD නිලධාරීන් එම චෝදනාව තරයේ ප්‍රතික්ෂේප කළේය.
දෙපාර්ශවයේ කරුණු සැලකිල්ලට ගත් මහේස්ත්‍රාත්වරයා, මේ පිළිබඳව පැහැදිලි කිරීමක් සඳහා මීළඟ නඩු දිනයේදී අධිකරණයේ පෙනී සිටින ලෙස කොළඹ අපරාධ කොට්ඨාශයේ අධ්‍යක්ෂවරයාට නොතීසි නිකුත් කළේය. නඩුව නැවත ලබන 26 වනදා කැඳවීමට නියමිතය.
