මෙරට රජයේ රෝහල්වල දීර්ඝ කාලයක සිට පවතින ප්‍රධානතම අඩුවක් වූ නවීන රෝග විනිශ්චය පහසුකම් පුළුල් කරමින්, රුපියල් මිලියන 1,950ක (බිලියන දෙකකට ආසන්න) පිරිවැයකින් දිවයින පුරා රෝහල් වෙත අධි තාක්ෂණික නවීනතම CT ස්කෑන් යන්ත්‍ර 11ක් ලබාදීමේ මහා පරිමාණ ව්‍යාපෘතියක් සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස ගේ මඟපෙන්වීම යටතේ ආරම්භ කර ඇත.
මෙතෙක් කල් බොහෝ රජයේ රෝහල්වල භාවිත කළේ පැරණි තාක්ෂණයේ 16-ස්ලයිස් (16-Slice) CT ස්කෑන් යන්ත්‍රයි. එමඟින් රෝග විනිශ්චය සඳහා වැඩි වේලාවක් ගතවන අතර සියුම් රෝගී තත්ත්වයන් හඳුනාගැනීම ද අපහසු විය. වත්මන් තාක්ෂණයේ ඉහළම මට්ටමක පවතින 64 සහ 128-ස්ලයිස් යන්ත්‍ර මඟින් තත්පර කිහිපයක් ඇතුළත ආඝාත (Stroke), හදිසි අනතුරු, පිළිකා සහ හෘද රෝග පිළිබඳ අතිශය නිවැරදි වාර්තා ලබාගැනීමට වෛද්‍යවරුන්ට හැකි වේ.
රෝහල් මට්ටමින් ස්කෑන් යන්ත්‍ර බෙදී යන ආකාරය
සෞඛ්‍ය අමාත්‍යාංශයේ ජීව වෛද්‍ය ඉංජිනේරු සේවාව මැදිහත් වී මෙම යන්ත්‍ර 11 රට පුරා ස්ථාපිත කරන්නේ මෙසේය.
දැනටමත් වැඩ අවසන්:
කළුතර ශික්ෂණ රෝහල සඳහා රුපියල් මිලියන 200ක් වටිනා 128-ස්ලයිස් යන්ත්‍රයක් සහ කුරුණෑගල ශික්ෂණ රෝහල සඳහා රුපියල් මිලියන 160ක යන්ත්‍රයක් දැනටමත් සවි කර අවසන්ය.
ස්ථාපන කටයුතු සිදුවන රෝහල්:
ආසියානු සංවර්ධන බැංකුවේ (ADB) රුපියල් මිලියන 640ක ආධාර මත කොළඹ ජාතික රෝහල, මහනුවර ජාතික රෝහල, කරාපිටිය (ගාල්ල) ජාතික රෝහල සහ කළුබෝවිල (කොළඹ දකුණු) ශික්ෂණ රෝහල සඳහා යන්ත්‍ර 4ක් මේ දිනවල සවි කෙරේ.
මිලදී ගැනීමට නියමිත රෝහල්:
කුලියාපිටිය ශික්ෂණ රෝහල, දඹුල්ල, නාවලපිටිය, හලාවත සහ මන්නාරම දිස්ත්‍රික් මහ රෝහල් සඳහා රුපියල් මිලියන 950ක වියදමින් අතිනවීන යන්ත්‍ර 5ක් මිලදී ගැනීමට කටයුතු සූදානම් කර ඇත.
ගමේ රෝගියාට කොළඹ එන්න ඕනෑ නැහැ
මෙම ව්‍යාපෘතියේ ඇති සුවිශේෂීම දේශපාලන සහ සමාජීය සාධකය වන්නේ, මෙය සෞඛ්‍ය අමාත්‍යාංශයේ ප්‍රධාන රෝහල්වලට පමණක් සීමා නොකර පළාත් සභා යටතේ පවතින ඈත පළාත්වල රෝහල් ද ආවරණය වන පරිදි ක්‍රියාත්මක කිරීමයි.
මන්නාරම, දඹුල්ල වැනි දුරබැහැර ප්‍රදේශවල ජනතාවට ද මින් ඉදිරියට මිල අධික CT ස්කෑන් පරීක්ෂණ සඳහා කොළඹ හෝ මහනුවර වැනි ප්‍රධාන නගරවලට පැමිණීමට අවශ්‍ය නොවන අතර, ප්‍රාදේශීයවම නොමිලේ මෙම සේවාව ලබාගත හැක.
ලංකාව තුළ සීඝ්‍රයෙන් ඉහළ යන මාර්ග අනතුරු, බෝ නොවන රෝග සහ වයස්ගත ජනගහනයේ සෞඛ්‍ය අර්බුදයන්ට මුහුණ දීමට මෙම පියවර දිගුකාලීන ආයෝජනයක් වනු ඇත.
