ස්පා වැටලීම් වීඩියෝ මාධ්‍යයට දීමෙන් මානව අයිතීන් කඩවෙලා! පොලිසියට එරෙහිව මානව හිමිකම් කොමිසමට පැමිණිල්ලක්

"සම්බාහන සේවිකාවන් සියදිවි නසාගැනීමේ ප්‍රවණතාවක්"; නීතිඥ සංගමය සහ ස්පා සංගමය පෙරමුණට

ස්පා ක්ෂේත්‍රය සහ ආයුර්වේද නීති පිළිබඳ පොලිස් දැනුවත්භාවයේ පවතින ගැටලු සහසම්බන්ධ වෙයි


තලවතුගොඩ ප්‍රදේශයේ සම්බාහන මධ්‍යස්ථාන වැටලීමකදී අත්අඩංගුවට ගත් තෙරපිවරියන් පිරිසකගේ අනන්‍යතාවය හෙළි වන පරිදි පොලිස් ස්ථානය තුළදීම වීඩියෝ ගත කර මාධ්‍ය වෙත මුදා හැරීමට එරෙහිව ශ්‍රී ලංකා මානව හිමිකම් කොමිෂන් සභාව (HRCSL) වෙත ඊයේ (22) නිල පැමිණිල්ලක් ඉදිරිපත් කර ඇත.

ජාත්‍යන්තර මානව හිමිකම් නීති සංගමය සහ ලංකා ස්පා සංගමය එක්ව මෙම ඒකාබද්ධ පැමිණිල්ල සිදුකර තිබේ.

මෙම සිදුවීම හුදු සාමාන්‍ය වැටලීමකට එහා ගිය, අත්අඩංගුවට පත්වන පුද්ගලයන්ගේ (විශේෂයෙන්ම කාන්තාවන්ගේ) මූලික මානව හිමිකම්, පුද්ගලිකත්වය (Privacy) සහ මාධ්‍ය සන්නිවේදනයේ සීමාවන් පිළිබඳව නෛතික ගැටලුවක් මතු කරන්නකි. චෝදනා ලැබූවන්ගේ අනන්‍යතාව විනිශ්චයකින් තොරව ප්‍රසිද්ධ කිරීම මඟින් ඔවුන් දැඩි මානසික බිඳවැටීමකට ලක්වන බවත්, එය සමාජීය වශයෙන් ඔවුන්ව කොන් කිරීමට හේතුවන බවත් නීති ක්ෂේත්‍රයේ ප්‍රවීණයෝ පෙන්වා දෙති.

පැමිණිල්ල මඟින් මතු කර ඇති ප්‍රධාන කරුණු 3ක්

නීති විරෝධී දෘශ්‍ය පටිගත කිරීම්:
පොලිස් භාරයේ සිටින සැකකාරියන්ගේ මුහුණු සහ අනන්‍යතාවය පැහැදිලිව පෙනෙන පරිදි පොලිස් ස්ථානය ඇතුළතදීම වීඩියෝ කිරීමට ඉඩ දීම හෝ ඒවා මාධ්‍ය වෙත ලබාදීම අනීතික ක්‍රියාවක් බව පැමිණිල්ලේ සඳහන් වේ.

ජීවත්වීමේ අයිතියට තර්ජනයක් වීම:
මෙම දර්ශන ප්‍රසිද්ධ වීම හේතුවෙන් අදාළ කාන්තාවන්ට සිය පවුල් සහ සමාජය තුළ මුහුණ දීමට සිදුව ඇති දැඩි අවමන් සහගත තත්ත්වය මත ඔවුන් සියදිවි නසාගැනීමේ අවදානමකට (Suicidal tendencies) මුහුණ දී සිටින බව ජාත්‍යන්තර මානව හිමිකම් නීති සංගමයේ නීතිඥ සුසන්ත ගුණවර්ධන පවසයි.

තාක්ෂණික නීති පිළිබඳ නොදැනුවත්කම:
ස්පා (Spa) සේවාවන් සඳහා ආයුර්වේද වෛද්‍යවරුන් අත්‍යවශ්‍ය නොවන බවත්, ඔවුන් සිටිය යුත්තේ ආයුර්වේද වෛද්‍ය මධ්‍යස්ථානවල බවත් පෙන්වා දෙන ලංකා ස්පා සංගමයේ සභාපති ප්‍රසන්න මුණසිංහ, මේ පිළිබඳව වැටලීම් සිදුකරන නිලධාරීන්ට නිසි අවබෝධයක් නොමැති බව චෝදනා කරයි.

ඉදිරි පියවර සහ නෛතික තත්ත්වය

පැමිණිලිකාර පාර්ශවයන් සඳහන් කරන්නේ මානව හිමිකම් කොමිසමට අමතරව මෙම සිදුවීම සම්බන්ධයෙන් වහාම සාධාරණ පරීක්ෂණයක් පවත්වන ලෙස ඉල්ලා පොලිස්පතිවරයා වෙත ද නිල වශයෙන් පැමිණිලි කිරීමට පියවර ගන්නා බවයි.

නීති විචාරකයන් පෙන්වා දෙන පරිදි, ඕනෑම වැටලීමකදී නීතිය ක්‍රියාත්මක කිරීමේ අයිතිය පොලිසිය සතු වුවද, සැකකරුවන් අධිකරණයකින් වරදකරුවන් වන තෙක් ඔවුන්ගේ මානුෂීය ගරුත්වය ආරක්ෂා කිරීම සිවිල් නීති පද්ධතියක මූලික වගකීමක් වේ. ඉදිරියේදී මානව හිමිකම් කොමිසම විසින් ලබාදෙන නිර්දේශ මත මෙම සිදුවීමේ ඉදිරි ක්‍රියාමාර්ග තීරණය වනු ඇත.



සබැඳි ලිපියක් :

ස්පා වැටලීම හෙවත් කුහකබවේ ප්‍රදර්ශනය | චින්තන ධර්මදාස