යුද්ධය ඉවර වී වසර 16ක් ගියත් අවතැන් වූවන් ස්ථාවර නොකිරීම ජාතික ආරක්ෂාවට තර්ජනයක් බව කැබිනට් මණ්ඩලය පිළිගනී
වසර 5ක් පුරා ව්‍යාපෘති නොකර නිකරුණේ තබාගෙන සිටි වාණිජ මහවැලි ඉඩම් වහාම පවරා ගැනීමට නියෝග
නැගෙනහිර පළාත තුළ දේශපාලන බලය සහ සබඳතා අවභාවිත කරමින් සිදුවන මහා පරිමාණ නීති විරෝධී ඉඩම් අල්ලා ගැනීම්, අනවසර ගොඩකිරීම් සහ වෙරළාශ්‍රිත ඉදිකිරීම් වහාම මැඩපැවැත්වීම සඳහා ආරක්ෂක අංශ වෙත පූර්ණ බලතල පවරමින් විශේෂ කැබිනට් තීරණ කිහිපයක් ප්‍රකාශයට පත් කර ඇත.
ඒ අනුව, මෙම අනීතික ක්‍රියා මර්දනය කිරීම සඳහා නියෝජ්‍ය පොලිස්පතිවරයෙකුගේ (DIG) ප්‍රධානත්වයෙන් යුත් විශේෂ නීති බලාත්මක කිරීමේ ඒකකයක් වහාම පිහිටුවීමට අමාත්‍ය මණ්ඩල අනුමැතිය හිමිව තිබේ.
නැගෙනහිර පළාතේ ඉඩම් පරිහරණය දිගින් දිගටම දැඩි සමාජීය, ආර්ථික සහ පරිපාලනමය ගැටුම් ඇති කරන කේන්ද්‍රස්ථානයක් වී තිබුණි. දේශපාලන රැකවරණය මත සිදුවන පාරිසරික විනාශය හේතුවෙන් නැගෙනහිර වෙරළ තීරය වේගයෙන් ඛාදනය වෙමින් පැවතීම මෙන්ම, සිවිල් යුද්ධය අවසන් වී වසර 16ක් ගතවීත් අවතැන් වූ ජනතාව ස්ථාවරව ප්‍රතිස්ථාපනය කිරීමට රජයන් අපොහොසත් වීම කලාපීය සංවර්ධනයට මෙන්ම ජාතික ආරක්ෂාවට (National Security) සෘජු තර්ජනයක් වී ඇති බව වත්මන් රජය නිල වශයෙන් පිළිගෙන ඇත.
අලුත්ම කැබිනට් තීන්දු හරහා සිදුවන ප්‍රධාන වෙනස්කම්
විශේෂ ආරක්ෂක කමිටුව:
හිටපු ඉඩම් කොමසාරිස් සහ වත්මන් දකුණු පළාත් පාලන කොමසාරිස් සේනක පල්ලියගුරුගේ ගේ සභාපතිත්වයෙන් "නැගෙනහිර පළාත් ඉඩම් ආරක්ෂා කිරීමේ" විශේෂ කමිටුවක් පත් කර ආයතනික සම්බන්ධීකරණය ශක්තිමත් කිරීම.
මහවැලි ඉඩම් ආපසු ගැනීම:
ශ්‍රී ලංකා මහවැලි අධිකාරිය විසින් මීට වසර පහකට හෝ ඊට පෙර වාණිජ අරමුණු සඳහා ලබාදී ඇති, නමුත් මෙතෙක් කිසිදු ව්‍යාපෘතියක් ආරම්භ කර නොමැති ඉඩම් වහාම රජයට පවරාගෙන ප්‍රාදේශීය ලේකම්වරුන් හරහා දේශීය ජනතාවගේ සංවර්ධන කටයුතු සඳහා ප්‍රතිබෙදා හැරීම.
පරිසර හිතකාමී සංචාරක සැලසුම්:
නැගෙනහිර වෙරළ තීරයේ ඉහළ සංචාරක විභවය (Tourism potential) උපයෝගී කරගන්නා අතරම, වෙරළ පද්ධතිය ආරක්ෂා වන පරිදි නව සැලැස්මක් සැකසීම සහ වෙරළේ පවත්වාගෙන යන හෝටල් සම්බන්ධයෙන් රජයේ නිලධාරීන් නීතිය අපක්ෂපාතීව ක්‍රියාත්මක කරන යාන්ත්‍රණයක් හැදීම.
භූ-දේශපාලනික සහ ආර්ථික විචාරකයන් පෙන්වා දෙන පරිදි, නැගෙනහිර ඉඩම් ගැටලුව හුදු නීතිමය ප්‍රශ්නයක් පමණක් නොව ජනවාර්ගික සහ දේශපාලනික වශයෙන් අතිශය සංවේදී මාතෘකාවකි. මීට පෙර පැවැති ආණ්ඩු දේශපාලන හිතවත්කම් මත මෙම අනවසර ඉඩම් අත්පත් කරගැනීම් සම්බන්ධයෙන් මෘදු ප්‍රතිපත්තියක් අනුගමනය කළ ද, නව රජය DIG වරයෙකු යටතේ බලකායක් පිහිටුවීමට තීරණය කිරීම සාධනීය ප්‍රවේශයකි.
කෙසේ වෙතත්, හෝටල් ව්‍යාපාරිකයන් සහ දේශපාලන ක්‍රියාකාරීන්ගෙන් එල්ල වන බලපෑම් හමුවේ නිලධාරීන්ට ස්වාධීනව සහ විනිවිදභාවයකින් යුතුව නීතිය ක්‍රියාත්මක කිරීමට ඉඩ සැලසීම මෙම වැඩපිළිවෙළේ සාර්ථකත්වය තීරණය කරන ප්‍රධාන සාධකය වනු ඇත.
