ඉදිරියේදී ඇති විය හැකි බවට පුරෝකථනය කර ඇති ‘එල් නිනෝ’ (El Niño) දේශගුණික විපර්යාසය හේතුවෙන් ශ්‍රී ලංකාවට එල්ල විය හැකි දැඩි බලපෑම් කළමනාකරණය සඳහා ජනාධිපතිවරයාගේ යෝජනාවකට අනුව විශේෂ අමාත්‍ය මණ්ඩල අනුකමිටුවක් පත් කර තිබේ.
එල් නිනෝ තත්ත්වයක් යනු හුදෙක් කාලගුණ විපර්යාසයක් පමණක් නොවේ; එය රටේ ආහාර සුරක්ෂිතතාව, බලශක්තිය සහ සමස්ත ආර්ථිකය කෙරෙහි සෘජුවම බලපාන දාම ප්‍රතික්‍රියාවකි.
කෘෂිකාර්මික කඩා වැටීම:
දිගුකාලීන නියඟය හේතුවෙන් වී, එළවළු සහ වැවිලි භෝග (තේ, පොල්, රබර්) අස්වැන්න සීඝ්‍රයෙන් පහත වැටීමේ අවදානමක් පවතී.
බලශක්ති අර්බුදය:
ජලාශවල ජල මට්ටම් පහත වැටීම නිසා ජල විදුලි උත්පාදනය සීමා වී, අධික පිරිවැයක් සහිත තාප විදුලිය මත යැපීමට සිදුවිය හැක.
පානීය ජල හිඟය:
භූගත ජල මට්ටම් පහත යෑම හේතුවෙන් ප්‍රදේශ රැසක ජල සැපයුමට බාධා එල්ල වීම.
නව සැලැස්මේ ක්‍රියාකාරීත්වය
මෙම අර්බුදයට මුහුණ දීම සඳහා සාම්ප්‍රදායික රාජ්‍ය යාන්ත්‍රණයෙන් බැහැරව, ආයතන කිහිපයක ඒකාබද්ධ දායකත්වය ලබා ගැනීමට රජය තීරණය කර ඇත.
සම්බන්ධීකරණය:
රාජ්‍ය ආයතන, පළාත් පාලන ආයතන, පෞද්ගලික අංශය සහ ප්‍රජා සංවිධාන එක් ජාලයකට ගොනු කිරීම.
කමිටු ව්‍යුහය:
විෂය පථයන් 5ක් ආවරණය වන පරිදි අමාත්‍යවරුන් පස්දෙනෙකුගෙන් යුත් අනුකමිටුවක් සහ ඊට සහාය වීමට නිලධාරී මණ්ඩලයක් පත් කිරීම.
අර්බුදය කළමනාකරණයට පත්කළ "පංචකාර්ය" කමිටුව
දම්මික පටබැඳි - පරිසර පද්ධති ආරක්ෂාව සහ දේශගුණික උපදේශනය.
ලාල් කාන්ත - කෘෂිකර්ම, පශු සම්පත්, ඉඩම් සහ වාරිමාර්ග කළමනාකරණය (ආහාර සුරක්ෂිතතාව).
සමන්ත විද්‍යාරත්න - වැවිලි ක්ෂේත්‍රය සහ වතු ප්‍රජාවගේ යටිතල පහසුකම් ආරක්ෂා කිරීම.
වසන්ත සමරසිංහ - වෙළෙඳ, වාණිජ, සමූපාකාර සහ අත්‍යවශ්‍ය ආහාර ද්‍රව්‍ය තොග පාලනය.
වෛද්‍ය සුසිල් රණසිංහ - නිවාස, ඉදිකිරීම් සහ ජල හිඟයකදී පානීය ජල සැපයුම ස්ථාවරව පවත්වා ගැනීම.
අනුර කරුණාතිලක - වරාය සහ සිවිල් ගුවන් සේවා (හදිසි ආනයන සහ සැපයුම් දාම කළමනාකරණය).
එමෙන්ම එම අනුකමිටුවට සහාය වීම සඳහා නිලධාරීන් කමිටුවක්ද පත් කර තිබේ.
එම අනුකමිටුව පහතින්,
කමිටු පත්කිරීම කඩදාසිවලට පමණක් සීමා නොකර, ක්ෂණික ප්‍රතිපත්තිමය තීන්දු ක්‍රියාවට නැංවීම මෙහි සාර්ථකත්වයේ රහසයි. විශේෂයෙන්ම වාරි ජලය කලමනාකරණය, සහල් ඇතුළු අත්‍යවශ්‍ය ද්‍රව්‍ය කළුකඩ මුදලාලිලාගේ ග්‍රහණයට පත්වීම වැළැක්වීම සහ සහනදායී ජල/විදුලි සැලසුම් සැකසීම මෙම කමිටුව හමුවේ ඇති ප්‍රධානතම අභියෝගයන් වේ.
