* අධිකරණයේ ස්වාධීනත්වය සහ ආණ්ඩුක්‍රම ව්‍යවස්ථා මුලධර්ම සුරැකීමට තීරණාත්මක පියවරක්...
විනිසුරුවරුන්ගේ විශ්‍රාම යෑමේ වයස් සීමාව දීර්ඝ කිරීම සඳහා රජය විසින් ගෙන යනු ලබන ක්‍රියාමාර්ගයට එරෙහිව ඉදිරියේදී ගනු ලබන පියවර පිළිබඳව සාකච්ඡා කිරීම වෙනුවෙන් ශ්‍රී ලංකා නීතිඥ සංගමයේ (BASL) විශේෂ මහසභා රැස්වීමක් අද (ජූලි 29) කොළඹ පිහිටි ශ්‍රී ලංකා නීතිඥ සංගම් මූලස්ථානයේදී පැවැත්වීමට කටයුතු යොදා තිබේ.
අද පෙරවරු 11.00ට ආරම්භ වන මෙම විශේෂ සාකච්ඡාව සඳහා නීතිඥ සංගමයේ සියලුම සාමාජිකයන් වෙත ආරාධනා කර ඇති බව එහි සභාපති නීතිඥ රජීව් අමරසූරිය ප්‍රකාශ කළේය.
ආණ්ඩුක්‍රම ව්‍යවස්ථාව සහ අධිකරණ ස්වාධීනත්වය
මෙම විශේෂ මහසභා රැස්වීම පිළිබඳ කරුණු පැහැදිලි කරමින් ශ්‍රී ලංකා නීතිඥ සංගමයේ සභාපති නීතිඥ රජීව් අමරසූරිය අවධාරණය කළේ, මෙම තීරණය කිසිදු පුද්ගලයෙකු හෝ එක් විනිසුරුවරයෙකු ඉලක්ක කරගනිමින් ගනු ලබන එකක් නොවන බවයි.
"මෙය කිසිදු පුද්ගලයෙකු හෝ විනිසුරුවරයෙකු සම්බන්ධ ප්‍රශ්නයක් නොවේ. මෙය අධිකරණයේ ස්වාධීනත්වය, ආණ්ඩුක්‍රම ව්‍යවස්ථාවේ මූලධර්ම සහ මහජන විශ්වාසය ආරක්ෂා කිරීම සම්බන්ධයෙන් වූ ඉතා වැදගත් ජාතික කාරණයක්. එවැනි මූලික ආණ්ඩුක්‍රම ව්‍යවස්ථාමය වෙනස්කම් සිදුකළ යුත්තේ, පුළුල් මහජන සහ පාර්ශ්වකරුවන්ගේ සංවාදයකින්, විනිවිදභාවයකින් සහ නිසි ක්‍රියාපටිපාටියට අනුකූලවයි." - නීතිඥ රජීව් අමරසූරිය
තීරණාත්මක ජාතික අභියෝගයක්
මෙවැනි මූලික ප්‍රතිසංස්කරණ ක්‍රියාත්මක කිරීමේදී නිසි විනිවිදභාවයක් පැවැතිය යුතු බවත්, අදාළ සියලු පාර්ශ්වයන්ගේ සහ මහජනතාවගේ අදහස් විමසීමකින් තොරව හදිසියේ සිදුකරන ව්‍යවස්ථාමය සංශෝධන මඟින් අධිකරණ ක්ෂේත්‍රය කෙරෙහි පවතින මහජන විශ්වාසයට බලපෑම් එල්ල විය හැකි බවත් නීතිඥ සංගමය පෙන්වා දෙයි.
ඒ අනුව මෙම වැදගත් ජාතික කාරණය සම්බන්ධයෙන් සමස්ත නීතිඥ ප්‍රජාවේ එකඟතාවයෙන් ගතයුතු වෘත්තීය සහ නීතිමය ක්‍රියාමාර්ග තීරණය කිරීම අද පැවැත්වෙන මෙම විශේෂ මහසභා රැස්වීමේ ප්‍රධාන අරමුණ වී තිබේ.
