*ඩොලර් මිලියන 450ක සහනාධාර සහ ණය පැකේජය ඇතුළු අමාත්‍යාංශ කිහිපයක නතර වී තිබූ ව්‍යාපෘති යළි සක්‍රීය කිරීමට පියවර
ඉන්දීය ව්‍යාපෘති නැවත සක්‍රීය කිරීම සහ ඉහළ මට්ටමේ සමාලෝචනය
ශ්‍රී ලංකාවේ වර්තමාන ආර්ථික යථා තත්ත්වයට පත්වීමේ ක්‍රියාවලිය ශක්තිමත් කිරීම, යටිතල පහසුකම් ව්‍යාප්ත කිරීම සහ දෙරට අතර දීර්ඝකාලීන ආයෝජන සහයෝගීතාව වර්ධනය කිරීමේ අරමුණින්, ඉන්දියානු ආධාර සහ ණය පදනම යටතේ ක්‍රියාත්මක සංවර්ධන ව්‍යාපෘති වේගවත් කිරීමට ශ්‍රී ලංකා රජය පියවර ගෙන තිබේ. විවිධ ක්ෂේත්‍ර ගණනාවක පැවැති ප්‍රගතිය අන්දමන්ද කරමින් පැවැති පාලන හා මෙහෙයුම් බාධාවන් නිරාකරණය කිරීම මෙම පියවරේ ප්‍රධාන අරමුණයි.
මේ සම්බන්ධයෙන් වන ඉහළ මට්ටමේ විශේෂ සමාලෝචන සාකච්ඡාවක් ශ්‍රී ලංකා රජය වෙනුවෙන් කම්කරු අමාත්‍ය සහ මුදල් හා ක්‍රමසම්පාදන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු සහ ශ්‍රී ලංකාවේ ඉන්දීය මහකොමසාරිස් සන්තෝෂ් ජා අතර ජනාධිපති ලේකම් කාර්යාලයේදී පැවැත්විණි. එහිදී ව්‍යාපෘති ප්‍රමාද වීමට බලපෑ රතු පටි සහ පරිපාලනමය ගැටලු ඉවත් කිරීම, පැරණි ගිවිසුම් යාවත්කාලීන කිරීම සහ ව්‍යාපෘති කාර්යක්ෂමව ඉදිරියට ගෙනයාම සඳහා වඩාත් සක්‍රීය යාන්ත්‍රණයක් සකස් කිරීම පිළිබඳව දීර්ඝ ලෙස සාකච්ඡා විය.
ආර්ථික වැදගත්කම සහ අමාත්‍යාංශ මට්ටමේ නිරීක්ෂණ
යටිතල පහසුකම්, ප්‍රවාහන, බලශක්ති, නිවාස, ධීවර සහ ප්‍රජා සංවර්ධන වැනි ප්‍රධාන ක්ෂේත්‍රයන්හිදී ඉන්දියාව ශ්‍රී ලංකාවේ ප්‍රධානතම සංවර්ධන පාර්ශ්වකරුවෙකු ලෙස කටයුතු කරයි. මෙවැනි දැවැන්ත ව්‍යාපෘති ප්‍රමාද වීම මගින් ව්‍යාපෘති පිරිවැය ඉහළ යාම, ආර්ථික ප්‍රතිලාභ ජනතාව වෙත ළඟා වීම කල්යාම මෙන්ම රැකියා උත්පාදනය සහ ප්‍රාදේශීය සංවර්ධනය කෙරෙහි එල්ල වන සෘණාත්මක බලපෑම පිළිබඳවද මෙහිදී අවධානය යොමු කෙරිණි.
ප්‍රවාහන, මහාමාර්ග සහ නාගරික සංවර්ධන, වරාය සහ සිවිල් ගුවන්සේවා, වතු යටිතල පහසුකම්, නිවාස හා ජල සම්පාදන, ධීවර හා සාගර සම්පත්, විද්‍යා හා තාක්ෂණ මෙන්ම අධිකරණ සහ ජාතික ඒකාබද්ධතා යන අමාත්‍යාංශ යටතේ ක්‍රියාත්මක වන ඉන්දීය ආධාර ලබන සියලුම ව්‍යාපෘති සම්බන්ධයෙන් මෙහිදී පුළුල් ඇගයීමක් සිදු කරන ලදී.
ජනාධිපති ලේකම් කාර්යාලීය අධීක්ෂණ ඒකකය සහ ඩොලර් මිලියන 450ක පැකේජය
ව්‍යාපෘති ක්‍රියාත්මක කිරීමේදී පවතින ගැටලු කඩිනමින් හඳුනාගෙන අමාත්‍යාංශ අතර සන්නිවේදනය වැඩිදියුණු කිරීම සඳහා ජනාධිපති ලේකම් කාර්යාලය තුළම විශේෂිත අධීක්ෂණ ඒකකයක් පිහිටුවීමට රජය තීරණය කර ඇත. එමගින් රාජ්‍ය තාන්ත්‍රික මට්ටමින් වෙන් කෙරෙන මූල්‍ය ප්‍රතිපාදන ප්‍රායෝගික යටිතල පහසුකම් බවට පරිවර්තනය වන බව තහවුරු කෙරේ.
විශේෂයෙන්ම, ආපදා තත්ත්වයන්ගෙන් පසු යටිතල පහසුකම් නැවත ගොඩනැගීම සහ පීඩාවට පත් ප්‍රජාවන් නැංවීම උදෙසා ඉන්දියාව විසින් ලබා දී ඇති ඩොලර් මිලියන 450ක සහනාධාර සහ ණය සහන පැකේජය යටතේ ඇති ව්‍යාපෘති කඩිනම් කිරීමට මෙම සාකච්ඡාවලදී මුලිකත්වය හිමි විය.
විදේශ ආධාර ලබන ව්‍යාපෘති වේගවත් කිරීම තුළින් දේශීය ඉදි කිරීම් ක්ෂේත්‍රයට පණදීම, නව රැකියා උත්පාදනය, ප්‍රවාහන හා වරාය ක්ෂේත්‍රවල පිරිවැය අඩු කිරීම මෙන්ම ජාත්‍යන්තර ආයෝජක විශ්වාසය තහවුරු කිරීම ද අපේක්ෂා කෙරේ. ශ්‍රී ලංකාව සහ ඉන්දියාව අතර පවතින ආර්ථික සහයෝගීතාව හුදෙක් මූල්‍ය ආධාර ලබාගැනීමෙන් ඔබ්බට ගොස් ප්‍රායෝගික හා තිරසාර සංවර්ධන ඉලක්ක කරා මෙහෙයවීම මෙහි මූලික අරමුණයි.
(සටහන | සම්පත් ධීරසේකර )
මුලාශ්‍රය :
India Lanka Projects Face Revival Push amid Economic Recovery Drive
