වරාය, සිවිල් ගුවන්සේවා හා බලශක්ති අමාත්‍යවරයාගේ නිරීක්ෂණයෙන් පසු ආයෝජන කැඳවීමට පියවර
ත්‍රිකුණාමල තෙල් ටැංකි සංවර්ධනයේ නව පියවර
ශ්‍රී ලංකාවේ බලශක්ති සුරක්ෂිතතාව තහවුරු කිරීම සහ ඛනිජ තෙල් ගබඩා කිරීමේ හා බෙදාහැරීමේ ධාරිතාව ඉහළ නැංවීමේ අරමුණින් ත්‍රිකුණාමල තෙල් ටැංකි සංකීර්ණයේ මීළඟ සංවර්ධන අදියර ආරම්භ කිරීමට ලංකා ඛනිජ තෙල් නීතිගත සංස්ථාව (CPC) පියවර ගෙන තිබේ. ඒ අනුව තෙල් ටැංකි 29ක් ප්‍රතිසංස්කරණය කිරීම සහ නව තෙල් බට පද්ධතියක් (Pipeline) ඉදි කිරීම ඇතුළත් මෙම ව්‍යාපෘතිය ඉදිරි වසර දෙක ඇතුළත නිම කිරීමට අපේක්ෂිතය.
මේ පිළිබඳව කරුණු පැහැදිලි කරමින් ලංකා ඛනිජ තෙල් නීතිගත සංස්ථාවේ කළමනාකාර අධ්‍යක්ෂ ආචාර්ය මයුර නෙත්තිකුමාරගේ සඳහන් කළේ, අදාළ තෙල් ටැංකි 29 සංවර්ධනය කිරීම සඳහා වන යෝජනා කැඳවීමේ ලේඛන (RFP) සකස් කර අවසන් බවයි. ප්‍රසම්පාදන කමිටුවල අනුමැතිය හිමිවූ වහාම ඒ සඳහා වන ටෙන්ඩර් නිල වශයෙන් ප්‍රකාශයට පත් කිරීමට නියමිතය.
ටැංකි හිමිකාරීත්වය සහ පවතින ප්‍රගතිය
සමස්ත තෙල් ටැංකි 99කින් සමන්විත මෙම සංකීර්ණයේ ටැංකි 61ක හිමිකාරීත්වය ශ්‍රී ලංකාව සහ ඉන්දියාව අතර ඒකාබද්ධ ව්‍යාපාරයක් වන 'ත්‍රින්කෝ පෙට්‍රෝලියම් ටර්මිනල් ලිට්' (Trinco Petroleum Terminal Ltd) සමාගම සතුව පවතී. ඉතිරි ටැංකි අතුරින් 24ක් ලංකා ඛනිජ තෙල් නීතිගත සංස්ථාව සතුවන අතර ටැංකි 14ක හිමිකාරීත්වය ලංකා IOC (LIOC) සමාගම සතු වේ.
ඛනිජ තෙල් නීතිගත සංස්ථාව දැනටමත් ටැංකි 2ක ප්‍රතිසංස්කරණ කටයුතු අවසන් කර ඇති අතර තවත් ටැංකි 3ක් අලුත්වැඩියා කිරීම සඳහා මේ වන විටත් ටෙන්ඩර් කැඳවා තිබේ. යෝජිත නව තෙල් බට පද්ධතිය ද සංස්ථාව මගින්ම ඉදිකිරීමට සැලසුම් කර ඇති අතර, එයද ඉදිරි වසර දෙක තුළ අවසන් කිරීමට නියමිතය.
අමාත්‍ය නිරීක්ෂණය සහ යටිතල පහසුකම් ප්‍රවර්ධනය
වරාය, සිවිල් ගුවන්සේවා සහ බලශක්ති අමාත්‍ය අනුර කරුණාතිලක ගේ ප්‍රධානත්වයෙන් පසුගියදා ත්‍රිකුණාමලය වරාය, තෙල් ටැංකි සංකීර්ණය, නව බට පද්ධතිය පිහිටුවන භූමිය සහ චීන වරාය ගුවන් තොටුපළ යන ස්ථානයන්හි විශේෂ නිරීක්ෂණ චාරිකාවක් ද පැවැත්විණි.
මෙම සංවර්ධන ව්‍යාපෘති මගින් රටේ ඉන්ධන සංචිත පවත්වාගෙන යාමේ හැකියාව වැඩිදියුණු වන අතරම, ප්‍රාදේශීය බලශක්ති මධ්‍යස්ථානයක් ලෙස ත්‍රිකුණාමලයේ ඇති උපායමාර්ගික වැදගත්කම තවදුරටත් වර්ධනය වනු ඇතැයි අපේක්ෂා කෙරේ.
