ඇමෙරිකානු ඩොලර් මිලියන 60ක ප්‍රතිදාන අරමුදල් භාවිත කෙරෙන ආකාරය සහ හිමිකාරීත්වය පිළිබඳ නීතිපති උපදෙස් අනුව කටයුතු
කන්කසන්තුරේ (KKS) වරාය සංවර්ධනයේ වත්මන් ප්‍රගතිය
උතුරු පළාතේ පිහිටි උපායමාර්ගික වැදගත්කමකින් යුත් කන්කසන්තුරේ (KKS) වරාය නවීකරණය කිරීම සඳහා ශ්‍රී ලංකා රජය සහ ඉන්දියානු රජය අතර ඇති කර ගැනීමට නියමිත අවබෝධතා ගිවිසුම (MOU) සම්බන්ධ සාකච්ඡා මේ වන විට අවසන් අදියරට පැමිණ තිබේ. ව්‍යාපෘතියට අදාළ ශක්‍යතා අධ්‍යයනයන්, ඉංජිනේරු සැලසුම් සහ අනෙකුත් ප්‍රධාන තාක්ෂණික තීරණ මේ වන විටත් සාර්ථකව අවසන් කර ඇති බව වරාය සහ සිවිල් ගුවන්සේවා නියෝජ්‍ය අමාත්‍ය ජනිත රුවන් කොඩිතුවක්කු තහවුරු කරයි.
කෙසේ වෙතත්, ව්‍යාපෘතියේ භෞතික ඉදිකිරීම් කටයුතු මෙතෙක් ආරම්භ කර නොමැති අතර, ගිවිසුම අත්සන් කිරීමට පෙර දෙරට අතර පවතින නෛතික හා කොන්දේසිමය කරුණු පරික්ෂා කිරීමේ ක්‍රියාවලිය දැනට සිදු වෙමින් පවතී.
නෛතික නිරීක්ෂණ සහ රාජ්‍ය තාන්ත්‍රික සාකච්ඡා
අදාළ ව්‍යාපෘති ගිවිසුම සම්බන්ධයෙන් නීතිපති දෙපාර්තමේන්තුවේ නිරීක්ෂණ සහ උපදෙස් ලබාගෙන ඇති අතර, එකී උපදෙස් හා නෛතික රාමුවට අනුකූලව සකස් කරන ලද කොන්දේසි ඉන්දීය මහ කොමසාරිස් කාර්යාලය වෙත යොමු කිරීමට පියවර ගෙන ඇත.
ගිවිසුම නිල වශයෙන් අත්සන් කිරීමට පෙර දෙපාර්ශ්වයේම එකඟතාවය තහවුරු කරගැනීම සඳහා වන පරීක්ෂණ කටයුතු මේ දිනවල ක්‍රියාත්මක වන බව නියෝජ්‍ය අමාත්‍යවරයා වැඩිදුරටත් සඳහන් කළේය.
ඩොලර් මිලියන 60ක ඉන්දීය අරමුදල් සහ හවුල්කාරීත්වය
මෙම ව්‍යාපෘතිය සඳහා ඉන්දීය රජය විසින් ලබාදීමට එකඟ වී ඇති ඇමෙරිකානු ඩොලර් මිලියන 60ක ප්‍රදානය (Grant) තවදුරටත් නොවෙනස්ව පවතින අතර, වර්තමාන සාකච්ඡාවල ප්‍රධාන අවධානය යොමුව ඇත්තේ එකී ප්‍රදානය භාවිත කරන ආකාරය, ව්‍යාපෘතියේ හිමිකාරීත්වය සහ ක්‍රියාත්මක වන හවුල්කාරීත්ව ආකෘතිය තීරණය කිරීම කෙරෙහිය.
අවබෝධතා ගිවිසුම අවසන් අත්සන් තැබීමෙන් පසුව අදාළ අරමුදල් නිල වශයෙන් ලබාගනිමින් ක්ෂේත්‍රයේ ප්‍රායෝගික සංවර්ධන කටයුතු ආරම්භ කිරීමට රජය අපේක්ෂා කරයි. මෙමගින් උතුරු පළාතේ සමුද්‍රීය සබඳතා සහ කලාපීය වෙළඳ-ප්‍රවාහන කටයුතු ප්‍රවර්ධනය වනු ඇතැයි ගණන් බලා තිබේ.
