ශ්‍රී ලංකා නැනෝ තාක්ෂණ ආයතනය (SLINTEC) මහ පරිමාණ වාණිජ නිෂ්පාදන තලයට ගෙන ඒමට සැලසුම්
සාම්ප්‍රදායික නිෂ්පාදන රටාවෙන් ඔබ්බට
මැක්‍රෝ ආර්ථික ස්ථාවරත්වයෙන් පසුව ශ්‍රී ලංකාවේ ප්‍රධාන කාර්මික ක්ෂේත්‍ර නියාමන නවීකරණය, අපනයන යථා තත්ත්වයට පත්වීම සහ ව්‍යුහාත්මක ව්‍යාප්තියක් කරා ගමන් කරමින් සිටින පසුබිමක, මෙරට කර්මාන්ත ක්ෂේත්‍රය සෘජුවම කෘත්‍රිම බුද්ධිය (AI) මූලික කරගත් උසස් ද්‍රව්‍ය තාක්ෂණික නිෂ්පාදන (Advanced Materials Manufacturing) තලයට පරිවර්තනය කිරීමට සැලසුම් කර තිබේ. කර්මාන්ත අමාත්‍යාංශයේ ජ්‍යෙෂ්ඨ නිලධාරියෙකු ප්‍රකාශ කර ඇත්තේ පරිසර හිතකාමී සහ සංවර්ධිත තාක්ෂණික නිෂ්පාදන කෙරෙහි ගෝලීය අවධානය යොමු වී ඇති බැවින්, නවීන ද්‍රව්‍ය පරිවර්තනය සම්පූර්ණයෙන්ම AI පදනම් කරගත් පර්යේෂණ සහ ගණනය කිරීමේ යටිතල පහසුකම් මත පදනම් වන බවයි.
ගෝලීය ආයෝජකයින් සහ තාක්ෂණික විශේෂඥයින් පෙන්වා දෙන්නේ පවතින සීමිත සම්පත් හමුවේ වුවද, දේශීයව සකස් කරන ලද AI තාක්ෂණයන් භාවිත කරමින් ශ්‍රී ලංකාවේ පොහොසත් ඛනිජ සම්පත් පදනමෙන් උපරිම ඵල නෙලා ගැනීමේ ස්මාර්ට් "පිම්මක" (Leapfrog Strategy) නිරත වීමට ශ්‍රී ලංකාවට අද්විතීය හැකියාවක් පවතින බවයි.
ශ්‍රී ලංකාවේ අද්විතීය ඛනිජ සම්පත් සහ AI එකතුව
දියුණු ආර්ථිකයක් සහිත රටවල් උසස් ද්‍රව්‍ය නිෂ්පාදනය සහ කෘත්‍රිම බුද්ධිය වෙන් වෙන් ක්ෂේත්‍ර ලෙස නොසලකන අතර, සෝලිඩ්-ස්ටේට් බැටරි (Solid-state batteries), අර්ධ සන්නායක ස්ථර (Advanced semiconductor layers) සහ අධි-තාක්ෂණික බහුඅවයවික (High-tech polymers) වැනි නිෂ්පාදන සම්පූර්ණයෙන්ම AI මත පදනම් වූ ‘මෙටීරියල්ස් ඉන්ෆොමැටික්ස්’ මත යැපෙන බව ආයෝජකයෝ පෙන්වා දෙති.
එක්සත් ජනපදය සහ යුරෝපය මුල් කරගත් භූ-දේශපාලන, ආරක්ෂක සහ ප්‍රතිපත්ති පිළිබඳ උපායමාර්ගික උපදේශක අසංග ඩී. මාගෙදරගමගේ සඳහන් කරන්නේ, ඛනිජ නිසාරණය සහ මූලික සැකසුම් මට්ටමේ සිටම සෘජුවම AI තාක්ෂණය යොදාගැනීම මගින් සාම්ප්‍රදායික කාර්මික නිෂ්පාදන අදියරයන් පසුවෙමින්, අමුද්‍රව්‍ය අපනයනය වෙනුවට ඉහළ වටිනාකමකින් යුත් AI-ඕප්ටිමයිස් කරන ලද 'ස්මාර්ට් ද්‍රව්‍ය' අපනයනය කිරීමට ශ්‍රී ලංකාවට හැකිවන බවයි.
විශේෂයෙන්ම 99%කට වඩා වැඩි කාබන් පිරිසිදුතාවයෙන් යුත් ශ්‍රී ලංකාවේ අද්විතීය නහර ග්‍රැෆයිට් (Vein graphite), ග්‍රැෆීන් (Graphene), අර්ධ සන්නායක ඇනෝඩ සහ විද්‍යුත් වාහන (EV) සඳහා වන බැටරි නිෂ්පාදනයට විශිෂ්ට පදනමක් සපයන බව හෙතෙම පෙන්වා දෙයි. මීට අමතරව, ඉල්මනයිට්, රූටයිල් සහ සර්කෝන් වැනි උසස් තත්ත්වයේ ඛනිජ තැන්පතු ද මීට උපයෝගී කරගත හැකිය.
SLINTEC වාණිජකරණය සහ ජාත්‍යන්තර ආකර්ෂණය
කර්මාන්ත අමාත්‍යාංශ නිලධාරියා වැඩිදුරටත් සඳහන් කළේ ඉල්මනයිට්, රූටයිල් සහ සර්කෝන් වෙන් කිරීමේ අධි-තාක්ෂණික ක්‍රියාවලිය විද්‍යුත් වාහන (EV), අභ්‍යවකාශ තාක්ෂණය සහ හරිත බලශක්ති යටිතල පහසුකම් සඳහා වන ගෝලීය සැපයුම් දාමයන් ඉලක්ක කරගනිමින් යාවත්කාලීන කිරීමට රජය අවධානය යොමු කර ඇති බවයි.
මේ වන විටත් ශ්‍රී ලංකාව අමුද්‍රව්‍ය කැණීමේ සිට පේටන්ට් බලපත්‍ර ලත් ග්‍රැෆීන් සංශ්ලේෂණය දක්වා ඉදිරියට පැමිණ ඇත. SLINTEC ආයතනය කාබන් නැනෝටියුබ් සහ ග්‍රැෆීන් ඔක්සයිඩ් නිෂ්පාදනය සඳහා ගෝලීය පේටන්ට් බලපත්‍ර කිහිපයක්ම හිමිකරගෙන තිබේ. තවද, කෘෂිකාර්මික අංශය සඳහා භාවිත වන ස්මාර්ට් නැනෝ-පොහොර, MAS Holdings වැනි ගෝලීය ඇඟලුම් සන්නාම භාවිත කරන කාර්යක්ෂම ස්මාර්ට් රෙදිපිළි සහ හයිඩ්‍රොෆෝබික් කාර්මික ආලේපන වැනි දේශීයව සංවර්ධනය කරන ලද උසස් ද්‍රව්‍ය මේ වන විටත් වාණිජකරණය වී තිබීම විශේෂත්වයකි.
ඉන්දියන් සාගර කලාපය තුළ හරිත බලශක්තියෙන් බලගැන්වෙන ප්‍රමුඛ ඛනිජ සැකසුම් මධ්‍යස්ථානයක් ලෙස ශ්‍රී ලංකාව ස්ථානගත කිරීම මගින්, තීරණාත්මක ඛනිජ සැපයුම් දාමයන් විවිධාංගීකරණය කිරීමට අපේක්ෂා කරන බටහිර තාක්ෂණික නිෂ්පාදකයින්ගේ ආකර්ෂණය දිනා ගැනීමට ශ්‍රී ලංකාවට හැකියාව ලැබෙනු ඇතැයි අසංග ඩී. මාගෙදරගමගේ පවසයි.
(සටහන | සම්පත් ධීරසේකර )
මුලාශ්‍රය :
