*ව්‍යවස්ථා සංශෝධනයෙන් අධිකරණ ස්වාධීනත්වයට හානියක් නැති බවට ඇමතිවරුන්ගෙන් සහතිකයක්
මහනායක හිමිවරුන් හමුවීම සහ රජයේ ස්ථාවරය
අධිකරණ පද්ධතියේ සියලු තලයන්හි සේවය කරන විනිසුරුවරුන්ගේ විශ්‍රාම යෑමේ වයස් සීමාව අවුරුදු දෙකකින් (02) දීර්ඝ කිරීම සඳහා අමාත්‍ය මණ්ඩලය විසින් අනුමැතිය ලබාදී ඇති පනත් කෙටුම්පත සම්බන්ධයෙන් රජයේ පාර්ශ්වයෙන් මහනායක හිමිවරුන් දැනුවත් කිරීමේ හමුවක් මහනුවරදී ඊයේ පැවැත්විණි. සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස සහ අධිකරණ හා ජාතික ඒකාබද්ධතා අමාත්‍ය, නීතිඥ හර්ෂණ නානායක්කාර , අස්ගිරි සහ මල්වතු පාර්ශ්වයේ මහනායක හිමිවරුන් බැහැදැක මේ පිළිබඳ කරුණු පැහැදිලි කර තිබේ.
එහිදී අදහස් දැක්වූ මල්වතු පාර්ශ්වයේ මහනායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල මහනායක හිමිපාණන් වහන්සේ සඳහන් කළේ, යම් එක පුද්ගලයෙකු ඉලක්ක කරගනිමින් ව්‍යවස්ථා සංශෝධන ගෙන ඒම සුදුසු නොවන නමුත්, සමස්ත අධිකරණ පද්ධතියේම විනිසුරුවරුන්ගේ විශ්‍රාම වයස දීර්ඝ කරන්නේ නම් එහි වරදක් නොමැති බවයි. එමෙන්ම විනිසුරුවරුන්ට මෙන්ම දිසාපතිවරුන් සහ ප්‍රාදේශීය ලේකම්වරුන් වැනි පරිපාලන ක්ෂේත්‍රයේ ජ්‍යෙෂ්ඨ නිලධාරීන්ට ද මෙවැනි සේවා දීර්ඝ කිරීම් පිළිබඳ සාකච්ඡා කිරීම සුදුසු බව උන්වහන්සේ පෙන්වා දුන්හ.
අධිකරණ අමාත්‍ය හර්ෂණ නානායක්කාර පෙන්වා දුන්නේ මෙම සංශෝධනය මගින් අධිකරණයේ ස්වාධීනත්වයට කිසිදු බලපෑමක් සිදු නොවන බවත්, ලොව බොහෝ රටවල විනිසුරුවරුන් වයස අවුරුදු 70 හෝ ඊට වැඩි කාලයක් සේවයේ යෙදෙන බවත්ය. ගොඩගැසී ඇති නඩු කඩිනමින් විභාග කර අවසන් කිරීම සඳහා පළපුරුදු විනිසුරුවරුන්ගේ සේවය පද්ධතිය තුළ තබා ගැනීම සහ අධිකරණ සේවයේ ආකර්ෂණීය බව වැඩිදියුණු කිරීම මෙහි ප්‍රධාන අරමුණ බව ද අමාත්‍යවරයා වැඩිදුරටත් කියා සිටියේය.
නීතිඥ සංගමයේ (BASL) ස්ථාවරය සහ පැනනැගී ඇති සංවාදය
කෙසේ වෙතත්, ශ්‍රී ලංකා නීතිඥ සංගමයේ (BASL) සභාපති රජීව් අමරසූරිය ඊයේ මල්වතු මහනායක හිමියන් හමුවීමෙන් අනතුරුව මාධ්‍ය වෙත අදහස් දක්වමින් කියා සිටියේ, යෝජිත ව්‍යවස්ථා සංශෝධනය සුදුසු නොවන බවට ත්‍රෛනිකායික මහනායක හිමිවරුන් විසින් ජනාධිපති අනුර කුමාර දිසානායක වෙත ලිඛිතව දැනුම් දී ඇති බවයි. හදිසියේ ගෙන එනු ලබන මෙවැනි සංශෝධනයන් අධිකරණ පද්ධතියේ ස්වාධීනත්වයට සහ ආයතනික පටිපාටියට බාධාවක් විය හැකි බව නීතිඥ සංගමය පෙන්වා දෙයි.
මේ අතර, අස්ගිරි මහා සංඝ සභාවේ ලේඛකාධිකාරී පූජ්‍ය ආචාර්ය මැදගම ධම්මානන්ද හිමියන් මාධ්‍ය වෙත අදහස් දක්වමින් සඳහන් කළේ, මේ සම්බන්ධයෙන් ජනාධිපතිවරයා වෙත යැවීම සඳහා ලිපියක් සකස් කළ නමුත් එය යවා ඇත්දැයි යන්න පිළිබඳව තමන් වහන්සේට ස්ථිර ලෙස තහවුරු කළ නොහැකි බවයි.
යෝජිත විශ්‍රාම වයස් සංශෝධනයේ ස්වභාවය
අමාත්‍ය මණ්ඩල අනුමැතිය හිමිව ඇති යෝජනාවට අනුව අධිකරණ පද්ධතියේ සියලු තලයන්හි විශ්‍රාම වයස පහත පරිදි වසර 02කින් ඉහළ දැමීමට නියමිතය:
*ශ්‍රේෂ්ඨාධිකරණ විනිසුරුවරුන්: වයස අවුරුදු 65 සිට 67 දක්වා
*අභියාචනාධිකරණ විනිසුරුවරුන්: වයස අවුරුදු 63 සිට 65 දක්වා
*මහාධිකරණ විනිසුරුවරුන්: වයස අවුරුදු 61 සිට 63 දක්වා
*දිසා විනිසුරුවරුන් සහ මහේස්ත්‍රාත්වරුන්: වයස අවුරුදු 60 සිට 62 දක්වා
අදාළ සංශෝධන පනත් කෙටුම්පත සකස් කිරීම සඳහා නීති කෙටුම්පත් සම්පාදක වෙත යොමුකර ඇති අතර, නීතිපතිවරයාගේ නිසි අනුමැතිය ලැබීමෙන් අනතුරුව පාර්ලිමේන්තුව වෙත ඉදිරිපත් කිරීමට නියමිතව ඇත.
