සිද්ධිය සම්බන්ධයෙන් හම්බන්තොට වනජීවී කාර්යාලයෙන් විශේෂ විමර්ශනයක්
හම්බන්තොට මහ රෝහල ආසන්න පරිශ්‍රයේදී ඊයේ (අගෝස්තු 03) පස්වරු 5:00 ට පමණ සිදු වූ වන අලි ප්‍රහාරයකින් පුද්ගලයෙකු බරපතල තුවාල ලබා තිබේ.
මෙසේ වන අලි ප්‍රහාරයට ලක්ව ඇත්තේ හම්බන්තොට මහ රෝහලේ කැන්ටිමේ සේවය කරනු ලබන පුද්ගලයෙකි. ඔහු තවත් අයෙකු සමඟ රෝහලට යාබද ප්‍රදේශයකට ගොස් සිටි අවස්ථාවේදී හදිසියේ මතුවූ වන අලියෙකුගේ ප්‍රහාරයට ලක්ව ඇත. එම අවස්ථාවේදී ඔහු සමඟ සිටි අනෙක් පුද්ගලයා වහා ක්‍රියාත්මක වී එම ස්ථානයෙන් දිවගොස් දිවි බේරා ගැනීමට සමත්ව තිබේ.
ප්‍රතිකාර සහ වනජීවී විමර්ශන
වන අලි ප්‍රහාරයෙන් බරපතල තුවාල ලැබූ කැන්ටිම් සේවකයා වහාම හම්බන්තොට මහ රෝහලට ඇතුළත් කර ඇති අතර, ඔහු මේ වන විට රෝහල් කාර්ය මණ්ඩලයේ දැඩි නිරීක්ෂණය යටතේ ප්‍රතිකාර ලබමින් පසුවෙයි.
මහජනතාව වැඩිවශයෙන් ගැවසෙන රෝහල් පරිශ්‍රයක් ආසන්නයේ වන අලියෙකු සැරිසැරීම සහ මෙම ප්‍රහාරය සිදුවීම සම්බන්ධයෙන් ප්‍රදේශයේ වනජීවී නිලධාරීන්ගේ අවධානය යොමු වී ඇත. ඒ අනුව, සිද්ධිය සම්බන්ධයෙන් හම්බන්තොට වනජීවී කාර්යාලයේ නිලධාරීන් විසින් වැඩිදුර පරීක්ෂණ සහ විමර්ශන කටයුතු ආරම්භ කර තිබේ.
(වාර්තාව| රාහුල් සමන්ත හෙට්ටිආරච්චි)
Rahul Samantha Hettiarachchi
ගවේෂණාත්මක මාධ්‍යවේදී
'යුගල් කිෂෝර් ශුක්ලා’ ජාත්‍යන්තර සම්මානලාභී
rahulnews.srilanka@gmail.com
