මහා සංඝරත්නයේ සහ නීතිඥ සංගමයේ විරෝධය කෙරෙහි අවධානය යොමුකරමින් පද්ධතිමය ප්‍රතිසංස්කරණ ඉල්ලයි
විනිසුරු විශ්‍රාම වයස සහ ව්‍යවස්ථාමය නෛතික තර්කය
අධිකරණවල විනිසුරුවරුන්ගේ විශ්‍රාම යන වයස දීර්ඝ කිරීම සඳහා වන ඕනෑම ව්‍යවස්ථා සංශෝධනයක් සඳහා ජනමත විචාරණයක් පැවැත්වීම අනිවාර්ය වන බවට ශ්‍රේෂ්ඨාධිකරණයේ පූර්ව නඩු තීන්දුවක් පදනම් කරගනිමින් විපක්ෂ නායක සජිත් ප්‍රේමදාස පාර්ලිමේන්තුවේදී නෛතික තර්කයක් මතුවෙයි.
අද (04) පාර්ලිමේන්තුවේදී ස්ථාවර නියෝග 27(2) යටතේ විශේෂ ප්‍රකාශයක් කරමින් විපක්ෂ නායකවරයා පෙන්වා දුන්නේ, ශ්‍රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්‍රාම යන වයස ආණ්ඩුක්‍රම ව්‍යවස්ථාවේ පැහැදිලිව දක්වා ඇති බවයි. 2022 වසරේ දේශීය ආදායම් (සංශෝධන) පනත් කෙටුම්පත සම්බන්ධයෙන් බුවනෙක අලුවිහාරේ, මුර්දු ප්‍රනාන්දු සහ ජනක් ද සිල්වා යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ලබාදුන් නඩු තීන්දුව උපුටා දක්වමින් ඔහු සඳහන් කළේ, ධුරයේ නියුතු විනිසුරුවරුන්ගේ විශ්‍රාම වයසට හෝ ධුර කාලයට සෘජුව හෝ වක්‍රව බලපාන සංශෝධනයක් මගින් අධිකරණයේ ස්වාධීනත්වයට බාධා වන බැවින්, එය ආණ්ඩුක්‍රම ව්‍යවස්ථාවේ 3 වන වගන්තිය උල්ලංඝනය කිරීමක් ලෙස අධිකරණය තීන්දු කර ඇති බවයි. එබැවින් එවැනි සංශෝධනයකට ජනමත විචාරණයක් අත්‍යවශ්‍ය වන බව ඒ මහතා අවධාරණය කළේය.
පාර්ශ්වකරුවන්ගේ විරෝධය සහ සභාගත කිරීම්
යෝජිත විශ්‍රාම වයස දීර්ඝ කිරීමේ පියවරට ශ්‍රී ලංකා නීතිඥ සංගමය (BASL) මෙන්ම දේශීය හා ජාත්‍යන්තර නීති ආයතන ගණනාවක්ම විරෝධය පළකර ඇති බව පැවසූ විපක්ෂ නායකවරයා, නීතිඥ සංගමයට පාර්ලිමේන්තුවට පැමිණ මන්ත්‍රීවරුන් දැනුවත් කිරීමට අවස්ථාව දෙන ලෙස ඉල්ලා සිටියේය. එමෙන්ම, මෙම සංශෝධනයට විරෝධය පළ කරමින් ත්‍රෛනිකායික මහා සංඝරත්නය විසින් ජනාධිපතිවරයා වෙත යොමු කර ඇතැයි කියන ලිපිය පාර්ලිමේන්තුව හමුවේ සභාගත කරන ලෙස ද ඔහු ආණ්ඩු පක්ෂයෙන් ඉල්ලා සිටියේය.
අධිකරණ පද්ධතිය තුළ ගොඩගැසී ඇති මිලියන 1.1කට අධික නඩු සංඛ්‍යාව අඩුවීම කෙරෙහි විනිසුරුවරුන්ගේ විශ්‍රාම වයස දීර්ඝ කිරීම සෘජුව බලපාන ආකාරය පැහැදිලි කරන ලෙස රජයෙන් ඉල්ලා සිටි සජිත් ප්‍රේමදාස, නීතිපති දෙපාර්තමේන්තුව, රජයේ රසපරීක්ෂක දෙපාර්තමේන්තුව සහ අධිකරණ පරිපාලනයේ පවතින ප්‍රමාදයන් පිළිබඳ නිල දත්ත වාර්තාවක් ඉදිරිපත් කරන ලෙස ද ඉල්ලා සිටියේය.
පද්ධතිමය ප්‍රතිසංස්කරණ සහ පොරොන්දු ඉටුකිරීම
ආසියානු සංවර්ධන බැංකුවේ (ADB) තාක්ෂණික සහාය ඇතිව 2023 වසරේදී අධිකරණ ක්ෂේත්‍රයේ කාර්යක්ෂමතාව ඉහළ නැංවීම සඳහා සකස් කළ වාර්තාව පදනම් කරගනිමින් පද්ධතිමය ප්‍රතිසංස්කරණ සඳහා ප්‍රමුඛතාව නොදෙන්නේ මන්දැයි විපක්ෂ නායකවරයා ප්‍රශ්න කළේය.
විධායක ජනාධිපති ක්‍රමය අහෝසි කිරීම සඳහා නව ආණ්ඩුක්‍රම ව්‍යවස්ථාවක් ගෙන එන බවට ජනතාවට පොරොන්දු වූ ආණ්ඩුව, අධිකරණ පද්ධතියට පමණක් සීමා වූ ව්‍යවස්ථා සංශෝධනයකට යොමුවීම ගැටලුසහගත බව පැවසු විපක්ෂ නායකවරයා, ජනතාව වෙත ලබාදුන් මූලික පොරොන්දු වහාම ක්‍රියාත්මක කිරීමට පියවර ගන්නා ලෙස වැඩිදුරටත් ඉල්ලා සිටියේය.
