ශ්‍රම බලකා සහභාගීත්වය සහ වෘත්තීය පුහුණුව ඉහළ නැංවීමේ දිගුකාලීන අවශ්‍යතාව ඉස්මතු වෙයි
අපනයන ක්ෂේත්‍රයේ ශ්‍රම හිඟය සහ එහි බලපෑම
නිෂ්පාදන පිරිවැය, විදේශ විනිමය අනුපාත සහ ගෝලීය ඉල්ලුම යන සාධකවලට අමතරව ශ්‍රී ලංකාවේ අපනයන ක්ෂේත්‍රය මේ වන විට බරපතළ ශ්‍රම හිඟයකට මුහුණ දෙමින් සිටින බව ජාතික අපනයනකරුවන්ගේ මණ්ඩලය (National Chamber of Exporters - NCE) අනතුරු අඟවයි. එහි සමාජිකත්වය දරන සමාගම් 700කට ආසන්න ප්‍රමාණයකින් විශාල සංඛ්‍යාවක් සිය නියමිත ශ්‍රම ධාරිතාව පූර්ණය කර ගැනීමට නොහැකිව අර්බුදයකට ලක්ව ඇත.
මෙම තත්ත්වය හේතුවෙන් ධාරිතාවට වඩා අඩු පිරිසකින් නිෂ්පාදන කටයුතු පවත්වාගෙන යාමට සිදු වීමෙන් ජාත්‍යන්තර වෙළෙඳපොළ ඇණවුම් නියමිත වේලාවට ලබාදීමට නොහැකි වීමේ අවදානමක් මතු වී තිබේ. එමෙන්ම, මෙරට ප්‍රධාන විදේශ විනිමය උපයන කෘෂිකර්මාන්තය සහ ඇඟලුම් ඇතුළු නිෂ්පාදන ක්ෂේත්‍රයන් හි පවතින මෙම ශ්‍රම හිඟය හේතුවෙන් අපනයන වර්ධන ඉලක්ක සපුරා ගැනීමට ද බාධා එල්ල විය හැකිය.
ශ්‍රම වෙළෙඳපොළේ ව්‍යුහාත්මක අභියෝග සහ දත්ත
පසුගිය වසරවල මෙන්ම 2026 වසරේ මුල් කාර්තුවේදී නිකුත් වූ ශ්‍රම බලකා සමීක්ෂණ දත්තවලට අනුව ශ්‍රී ලංකාවේ ශ්‍රම බලකා සහභාගීත්ව අනුපාතය 49.2%ක් ලෙස සටහන් වන අතර, සමස්ත රැකියා විරහිතභාවය 3.7%ක් සහ වයස අවුරුදු 15-24 අතර තරුණ රැකියා විරහිතභාවය 16.1%ක් ලෙස සටහන් වේ.
කෙසේ වෙතත්, සාමාන්‍ය රැකියා නොමැති පිරිසක් සිටියද නවීන අපනයන ක්ෂේත්‍රයන්ට අවශ්‍ය විශේෂිත තාක්ෂණික කුසලතා, අධීක්ෂණ පළපුරුද්ද සහ යන්ත්‍ර සූත්‍ර මෙහෙයුම් නිපුණතා සහිත ශ්‍රමිකයන්ගේ දැඩි අඩුවක් පවතින බව අපනයනකරුවෝ පෙන්වා දෙති. මෙරටින් විදේශ රැකියා සඳහා විගමනය වන පිරිස ඉහළ යාම ද මෙම දේශීය ශ්‍රම හිඟයට බලපා ඇති තවත් ප්‍රධාන සාධකයකි.
විදේශීය ශ්‍රමික ප්‍රතිපත්තිය සහ ඉදිරි පියවර
දේශීය වශයෙන් පවතින මෙම කෙටිකාලීන ශ්‍රම හිඟයට විසඳුමක් ලෙස විදේශීය ශ්‍රමිකයන් මෙරටට ගෙන්වා ගැනීමේ විධිමත් ප්‍රතිපත්තියක් (Inbound Labour Migration Policy) සකස් කිරීමට රජය ගෙන ඇති තීරණය අපනයනකරුවන්ගේ මණ්ඩලයේ ඇගයීමට ලක්ව ඇත. එමගින් අවශ්‍යතාව පරිදි නීත්‍යානුකූලව විදේශීය ශ්‍රමිකයන් සේවයේ යෙදවීමට මාර්ගය විවෘත වේ.
එහෙත්, විදේශීය ශ්‍රමිකයන් ගෙන්වීම පමණක් දීර්ඝකාලීන විසඳුමක් නොවන බවත්, දේශීය වෘත්තීය අධ්‍යාපන ආයතන සහ තාක්ෂණික පුහුණු මධ්‍යස්ථාන කර්මාන්ත අවශ්‍යතාවලට ගැලපෙන පරිදි යාවත්කාලීන කරමින් දේශීය ශ්‍රම බලකායේ කුසලතා වර්ධනය කිරීම අත්‍යවශ්‍ය බවත් NCE මණ්ඩලය පෙන්වා දෙයි.
(සටහන |සම්පත් ධීරසේකර )
මුලාශ්‍රය :
Worker Shortage Puts Sri Lanka’s Export Ambitions at Risk
