කැලණිය විශ්වවිද්‍යාලයේ සිට හවායි සහ හොංකොං සරසවි දක්වා විහිදුණු ජාත්‍යන්තර ශාස්ත්‍රීය මෙහෙවර
ශාස්ත්‍රීය ක්ෂේත්‍රයට අහිමි වූ ප්‍රමුඛ විද්වතා
මෙරට ජන සන්නිවේදන විෂය ශාස්ත්‍රීය මට්ටමින් විශ්වවිද්‍යාල පද්ධතියට හඳුන්වාදීමට පුරෝගාමී වූත්, ආසියානු සන්නිවේදන න්‍යායයන් (Asian Communication Theory) සම්බන්ධයෙන් ජාත්‍යන්තර කීර්තියට පත් ප්‍රමුඛ විද්වතෙකු වූත් මහාචාර්ය විමල් දිසානායක මහතා අභාවප්‍රාප්ත වී තිබේ.
ඇමෙරිකා එක්සත් ජනපදයේ හවායි හිදී අභාවප්‍රාප්ත වන විට ඒ මහතා 86 වැනි වියෙහි පසුවිය. ශ්‍රී ලාංකේය සාහිත්‍ය විචාරය, ජන සන්නිවේදනය, සිනමා අධ්‍යයනය, කාව්‍ය සම්ප්‍රදාය සහ සංස්කෘතික අධ්‍යයනය වෙනුවෙන් දශක ගණනාවක් පුරා සිදුකළ මෙහෙවර වෙනුවෙන් හෙතෙම ජාත්‍යන්තර ප්‍රසාදයට ලක්වූවෙකි.
මහාචාර්ය විමල් දිසානායකයන්ගේ ශාස්ත්‍රීය ගමන් මග
| පාසල් අධ්‍යාපනය: මහනුවර ත්‍රිත්ව විද්‍යාලය
| ප්‍රථම උපාධිය: ශ්‍රී ලංකා විශ්වවිද්‍යාලයෙන් (පේරාදෙණිය) සිංහල, සංස්කෘත සහ ඉංග්‍රීසි පිළිබඳ ගෞරව උපාධිය
| ආචාර්ය උපාධිය: කේම්බ්‍රිජ් විශ්වවිද්‍යාලය, එංගලන්තය (ඉංග්‍රීසි සාහිත්‍යය)
| පශ්චාත් ආචාර්ය උපාධිය: පෙන්සිල්වේනියා විශ්වවිද්‍යාලය, ඇමෙරිකාව (ජන සන්නිවේදනය සහ සිනමාව) |
| ප්‍රධාන තනතුරු: කැලණිය සරසවියේ ජන සන්නිවේදන ප්‍රථම අංශාධිපති, හවායි සරසවියේ මහාචාර්ය, හොංකොං සරසවියේ සම්මාන මහාචාර්ය
කැලණිය සරසවියේ නියමුවාගේ සිට ජාත්‍යන්තර කීර්තිය දක්වා
මහනුවර ත්‍රිත්ව විද්‍යාලයෙන් මූලික අධ්‍යාපනය ලබා පේරාදෙණිය ගුරුකුලයෙන් බිහි වූ ස්වාධීන බුද්ධිමතෙකු වන විමල් දිසානායක මහතා, සිය ප්‍රථම උපාධිය සඳහා සිංහල, සංස්කෘත හා ඉංග්‍රීසි යන භාෂා ත්‍රිත්වය හදාරන ලදී. පසුව එංගලන්තයේ කේම්බ්‍රිජ් විශ්වවිද්‍යාලයෙන් ඉංග්‍රීසි සාහිත්‍යය පිළිබඳ ආචාර්ය උපාධියත්, 1975 දී පෙන්සිල්වේනියා විශ්වවිද්‍යාලයෙන් ජන සන්නිවේදනය හා සිනමාව පිළිබඳ පශ්චාත් ආචාර්ය උපාධියත් හිමිකර ගත්තේය.
කැලණිය විශ්වවිද්‍යාලයේ ජන සන්නිවේදන අධ්‍යයනාංශය ආරම්භ කිරීමේ ප්‍රධාන නියමුවෙකු වූ ඒ මහතා, එහි ප්‍රථම අංශාධිපතිවරයා ලෙස කටයුතු කරමින් මෙරට උසස් අධ්‍යාපන ක්ෂේත්‍රය තුළ සන්නිවේදන විෂයයන් ස්ථාපිත කිරීමට මූලික අඩිතාලම දැමීය.
ගෝලීය ඇගයීම් සහ ශාස්ත්‍රීය දායකත්වය
1979 වසරේදී ඇමෙරිකා එක්සත් ජනපදයේ හවායි විශ්වවිද්‍යාලයේ ජන සන්නිවේදන අධ්‍යයන අංශයේ මහාචාර්ය පදවියට පත්වූ ඒ මහතා පසුව විදේශගතව සිය ශාස්ත්‍රීය සේවය ජාත්‍යන්තර තලයට ව්‍යාප්ත කළේය. හවායි හි ඊස්ට්-වෙස්ට් සෙන්ටර් (East-West Center) හි ජ්‍යෙෂ්ඨ පර්යේෂකයෙකු ලෙස ද කටයුතු කළ ඔහු, හොංකොං විශ්වවිද්‍යාලයේ සම්මාන මහාචාර්ය (Honorary Professor) පදවියකින් ද පිදුම් ලැබීය.
ජන සන්නිවේදනය, සිනමාව සහ සාහිත්‍ය විචාරය අනුබද්ධයෙන් ග්‍රන්ථ හා පර්යේෂණ පත්‍රිකා විශාල සංඛ්‍යාවක් සම්පාදනය කර ඇති මහාචාර්ය දිසානායකයන්ගේ මෙහෙවර වෙනුවෙන් බ්‍රිතාන්‍ය BBC ගුවන්විදුලි සේවය මගින් ද විශේෂ ඇගයීමක් සිදුකර තිබේ.
