2027 වන විට අක්කර 40,000ක වගා ඉලක්කයක් සමඟ උතුරේ පශ්චාත් යුධ ආර්ථිකය ජාතික ප්‍රවාහයට
සාම්ප්‍රදායික වැවිලි ආර්ථිකය සහ පොල් ත්‍රිකෝණයේ පසුබෑම
අතීතයේ ශ්‍රී ලංකාවේ ප්‍රධාන අපනයන ආර්ථිකය රඳා පැවතුණේ තේ, පොල් සහ රබර් යන වැවිලි බෝග මතය. එහෙත් කාලයාගේ ඇවෑමෙන් වතු ආර්ථිකයේ සිදු වූ විවිධ වෙනස්කම් හමුවේ මෙම ක්ෂේත්‍ර අභියෝගයන්ට මුහුණ දුන්නේය.
විශේෂයෙන්ම කුරුණෑගල, ගම්පහ සහ පුත්තලම යා කරමින් පැවැති සාම්ප්‍රදායික පොල් ත්‍රිකෝණය ශීඝ්‍ර නාගරීකරණය, ඉඩම් කුඩා කැබලි බවට පත්වීම, කොප්පරා මෝල් වැසී යාම සහ වැළඳුණු දිලීර රෝග හේතුවෙන් බිඳවැටීමට ලක්විය.
එහි අහිතකර ප්‍රතිඵලයක් ලෙස දේශීය පරිභෝජනයට පවා පොල් හිඟයක් නිර්මාණය වූ අතර, පිරිසිදු පොල්තෙල් වෙනුවට ශරීරයට අහිතකර ඇෆ්ලොටොක්සින් (Aflatoxin) සංඝටක සහිත ආනයනික තෙල් සහ පාම් ඔයිල් භාවිතයට ජනතාවට සිදු විය.
උතුරේ පොල් ත්‍රිකෝණය ව්‍යාපෘතිය - ප්‍රධාන දත්ත
| ආවරණය වන දිස්ත්‍රික්ක: යාපනය, කිලිනොච්චිය, මුලතිව්, මන්නාරම සහ වවුනියාව
| භූගෝලීය මායිම්: පේදුරුතුඩුව, සිලාවතුර සහ කෝකිලායි යා කෙරෙන කලාපය
| මූල්‍ය වෙන්කිරීම්: 2025 අයවැයෙන් රු. මිලියන 500ක් සහ 2026 අයවැයෙන් රු. මිලියන 600ක්
| වගා ඉලක්ක: පළමු අදියරේ අක්කර 10,000 සිට 2027 වන විට අක්කර 40,000 දක්වා ව්‍යාප්ත කිරීම
| ප්‍රතිලාභීන්: පළමු අදියර යටතේ ගොවි පවුල් 12,000කට ආර්ථික ප්‍රතිලාභ
උතුරේ පොල් ත්‍රිකෝණය සහ පශ්චාත් යුධ සමාජීය පරිවර්තනය
ගෝලීය වශයෙන් ශාකසාර හා සෞඛ්‍යාරක්ෂිත ආහාර (Plant-based, Dairy-free, Vegan) සඳහා ඇති විශාල ඉල්ලුම සලකා බලමින් උතුරේ පොල් ත්‍රිකෝණය (Northern Coconut Triangle) ව්‍යාපෘතිය ආරම්භ කර ඇත.
යාපනය, කිලිනොච්චිය, මුලතිව්, මන්නාරම සහ වවුනියාව යන දිස්ත්‍රික්ක ආවරණය වන පරිදි පේදුරුතුඩුව, සිලාවතුර සහ කෝකිලායි යා කරමින් මෙය සැලසුම් කර තිබේ.
2025 අයවැයෙන් රුපියල් මිලියන 500ක් වෙන් කරමින් පළමු අදියර යටතේ අක්කර 10,000ක පොල් වගා කිරීමට පියවර ගැනුණු අතර, එමගින් ගොවි පවුල් 12,000කට සෙත සැලසේ.
2025 සිට 2027 දක්වා වසර 3 තුළ මෙම වගා භූමිය අක්කර 40,000 දක්වා වැඩි කිරීමට ඉලක්ක කර ඇති අතර, 2025 සැප්තැම්බර් මාසයේදී යාපනයේ පලෙයි ප්‍රදේශයේ උතුරු පළාතේ පළමු පොල් බීජ නිෂ්පාදන ඒකකය ද ආරම්භ කෙරිණි. ව්‍යාපෘතිය තවදුරටත් ඉදිරියට ගෙන යාම සඳහා 2026 අයවැයෙන් ද රුපියල් මිලියන 600ක් වෙන් කර ඇත.
මෙම ව්‍යාපෘතිය හුදෙක් වගා සංවර්ධනයකට පමණක් සීමා නොවී, උතුරේ පශ්චාත් යුධ ආර්ථිකය ජාතික ආර්ථිකය සමඟ සෘජුව සම්බන්ධ කරන සංවර්ධන පාලමක් ලෙස ද ක්‍රියාත්මක වේ. සහනාධාර මත යැපෙනවා වෙනුවට තමන් විසින්ම රටට ආර්ථික වටිනාකමක් එකතු කරන නිෂ්පාදන මානසිකත්වයක් ප්‍රදේශයේ ජනතාව තුළ ගොඩනැගීමට ද මෙය උපකාරී වන බව පෙනී යයි.
ගෝලීය වෙළඳපොළ සහ ශ්‍රී ලංකාවේ අපනයන ඉලක්ක
2025 වන විට ඇමෙරිකානු ඩොලර් බිලියන 5.46ක් වූ ගෝලීය පොල් නිෂ්පාදන වෙළඳපොළ 2030 වන විට ඩොලර් බිලියන 8.78 දක්වා (9.98%ක වාර්ෂික සංයුක්ත වර්ධනයක් - CAGR) වර්ධනය වනු ඇතැයි පුරෝකථනය කර ඇත.
ශ්‍රී ලංකාවේ සමස්ත පොල් නිෂ්පාදනයෙන් 70%ක්ම දේශීය පරිභෝජනයට වැය වන අතර, ඉතිරි 30% පමණක් අපනයනය කරමින් ශ්‍රී ලංකාව ලෝකයේ 4 වන විශාලතම පොල් අපනයනකරුවා බවට පත්ව සිටී. 2025 වසර සඳහා මෙරට පොල් අපනයන ආදායම ඩොලර් බිලියන 1.2ක් පමණ වූ අතර, 2026 ජනවාරි - අප්‍රේල් කාලසීමාව තුළ පමණක් එම ආදායම ඩොලර් මිලියන 406.28ක් දක්වා (121.38%ක වර්ධනයක්) ඉහළ ගොස් තිබේ.
ගෝලීය ඉල්ලුම සහිත ප්‍රධාන අගය එකතු කළ නිෂ්පාදන
| පොල්කිරි (Liquid Coconut Milk) සහ පිටි කළ පොල්කිරි (Coconut Milk Powder)
| පොල් ක්‍රීම් (Coconut Cream) සහ වියළි පොල් (Desiccated Coconut)
| කොකෝපීට් (Cocopeat) සහ සක්‍රිය කාබන් (Activated Carbon)
| පිරිසිදු පොල්තෙල් (Virgin Coconut Oil)
පොල්කිරි, පොල් ක්‍රීම්, පිටි කළ පොල්කිරි, කොකෝපීට් සහ සක්‍රිය කාබන් වැනි අගය එකතු කළ නිෂ්පාදන සඳහා ලෝක වෙළඳපොළේ විශාල ඉල්ලුමක් පවතින බැවින්, උතුරේ පොල් ත්‍රිකෝණය වැනි ව්‍යාපෘති හරහා නිෂ්පාදන ධාරිතාව ඉහළ නැංවීම මගින් මෙරට විදේශ විනිමය ඉපැයීමේ හැකියාව තවදුරටත් පුළුල් කරගත හැකි වනු ඇත.
මතු පලවන්නේ අද (13) උදැසන ලීඩර් යු ටියුබ් නාලිකාවේ විකාශය වූ ''ආරම්බම්'' වැඩසටහනයි.
