නව ඉලක්කය අනුව ඉදිකිරීම් ලබන නොවැම්බරයට පෙර ඇරඹීමට සැලසුම්
ආර්ථික අර්බුදය හා විදෙස් ණය ප්‍රතිව්‍යුහගතකරණ ක්‍රියාවලිය හේතුවෙන් වසර හතරකට අධික කාලයක් ඇනහිට තිබූ කටුනායක බණ්ඩාරනායක ජාත්‍යන්තර ගුවන්තොටුපොළේ (BIA) දෙවන පර්යන්තයේ (Terminal 2) ඉදිකිරීම් කටයුතු 2026 නොවැම්බර් මාසයට පෙර යළි ආරම්භ කිරීමට ජපාන රජය නිල වශයෙන් එකඟතාව පළ කර තිබේ.
ජනාධිපති අනුර කුමාර දිසානායක සහ ජපාන රජය අතර පැවති සාකච්ඡාවලින් අනතුරුව, වරාය, සිවිල් ගුවන්සේවා සහ බලශක්ති අමාත්‍ය අනුර කරුණාතිලක සහ ජපාන ජාත්‍යන්තර සහයෝගිතා ඒජන්සියේ (JICA) ජ්‍යෙෂ්ඨ උප සභාපති හරා ෂොහෙයි (Hara Shohei) හා මෙරට ප්‍රධාන නියෝජිත හොන්සු ෂිගෙයෝ (Honzu Shigeo) ඇතුළු දූත පිරිස අතර පැවති විශේෂ සාකච්ඡාවකදී මෙම තීරණය තහවුරු විය.
මුල්‍ය ප්‍රතිපාදන යළි සක්‍රීය වීම
2022 වසරේ මෙරට ඇති වූ ආර්ථික අර්බුදය සහ විදේශ ණය ගෙවීම් අත්හිටුවීමත් සමඟ, ජපන් යෙන් බිලියන 75ක පමණ වටිනාකමකින් යුත් ජයිකා (JICA) සහන ණය පහසුකම අත්හිටුවීමට පියවර ගැනිණි. ජයිකා ආයතනික රීතීන්ට අනුව ණය ප්‍රතිව්‍යුහගතකරණය සම්පූර්ණ වන තෙක් මුදල් නිදහස් කිරීමේ හැකියාවක් නොපැවතිණි.
කෙසේ වෙතත්, ශ්‍රී ලංකාවේ බාහිර ණය ප්‍රතිව්‍යුහගතකරණ රාමුව නිමාවට පත්වීමත් සමඟ, අදාළ මුල් ණය මුදල යළි නිදහස් කිරීමට මෙන්ම, ව්‍යාපෘතිය අත්හිටුවා තිබූ කාලසීමාව තුළ ඉහළ ගිය ඉදිකිරීම් පිරිවැය සහ උද්ධමනය පියවා ගැනීම සඳහා අවශ්‍ය අතිරේක මූල්‍ය පහසුකම් ලබාදීමට ද ජපාන පාර්ශ්වය එකඟ වී ඇත.
ඉදිකිරීම් කාලසටහන සහ වත්මන් තත්ත්වය
සංශෝධිත Package A1 රාමුව යටතේ කෙටිලැයිස්තුගත ජපන් ඉදිකිරීම් සමාගම සමඟ අවසන් කොන්ත්‍රාත් සාකච්ඡා මේ වන විට සිදුකෙරෙමින් පවතී. නව සැලසුමට අනුව ඉදිකිරීම් යළි ආරම්භ කළ දින සිට මාස 30ක කාලයක් තුළ ව්‍යාපෘතිය අවසන් කිරීමට අපේක්ෂිත අතර, ඒ අනුව 2029 මැද භාගය වන විට පර්යන්තයේ මෙහෙයුම් ආරම්භ කිරීම ඉලක්කයයි.
ව්‍යාපෘතිය අතරමග නතර වන විට සිදුකර තිබුණේ මූලික අත්තිවාරම් හා උප ව්‍යුහාත්මක කටයුතුවලින් සුළු කොටසක් පමණි. ප්‍රධාන පර්යන්ත ගොඩනැගිල්ල (Main Terminal Building), මගී පිවිසුම් පියර්ස් (Piers), ගුවන් මංමාවත් සහ ප්‍රවේශ මාර්ග ඇතුළු අත්‍යවශ්‍ය යටිතල පහසුකම් ඉදිරියේදී සම්පූර්ණ කළ යුතුව ඇත.
පරිසර හිතකාමී සංකල්පය සහ ධාරිතාව
දෙවන පර්යන්තය පූර්ණ වශයෙන් ක්‍රියාත්මක වීමත් සමඟ වාර්ෂිකව මගීන් මිලියන 9කට පහසුකම් සැලසීමේ හැකියාව ලැබේ. දැනට පවතින පර්යන්තයේ ධාරිතාව සමඟ ඒකාබද්ධ වූ විට කටුනායක ගුවන්තොටුපොළේ සමස්ත වාර්ෂික මගී හැසිරවීමේ ධාරිතාව මිලියන 15ක් දක්වා ඉහළ යනු ඇත.
මෙම පර්යන්තය සූර්ය බලශක්ති භාවිතය, වැසි ජලය රැස්කිරීම, බලශක්ති කාර්යක්ෂම ඉදිකිරීම් ද්‍රව්‍ය සහ ප්‍රතිචක්‍රීකරණය කළ අපජල පද්ධතිවලින් සමන්විත පූර්ණ පරිසර හිතකාමී ‘Eco-Airport’ සංකල්පය යටතේ නිර්මාණය කෙරේ.
මුලාශ්‍රය :
